Ćěkancy na łódźi zaměstnjeni
Faeser z namjetom kritiku zbudźiła
Berlin (dpa/SN). Hišće dołho tomu njeje, zo bě zwjazkowa ministerka za nutřkowne naležnosće Nancy Faeser namjetowała, njezasudźenych čłonow tak mjenowanych kriminelnych clanow wotsuwać. Nětko žněješe wona raznu kritiku wot koaliciskeho partnera. Parlamentariska jednaćelka strony Irene Mihalic zwurazni, zo Zeleni namjety k naprawam, kotrež steja zwonka prawizniskeho stata, na žadyn pad njepodpěruja. Wona žadaše sebi slubjenja koaliciskeho zrěčenja dodźeržeć a wotsuwansku politiku jasnje reformować, zo by wona efektiwniša była. W diskusijnej papjerje ministerstwa rěka mjenujcy, zo měło za wotsuwanje hižo dosahać, ma-li něchtó jasny poćah ke kriminelnym aktiwitam. Jednory swójbny poćah jako přičina njedosaha.
Politikarjo opozicije kritizuja namjet Faeser tohorunja. Tak wumjetuje jej frakcija unije, zo je wony namjet jeničce slubjenje za wólbny bój w Hessenskej, hdźež je Faeser načolna kandidatka. Tež na praktikabelnosći postupowanja maja woni wobmyslenja.
Wulke škody po zapławjenjach
Słowjenska, Awstriska a Chorwatska wojuja přećiwo wulkej wodźe
Ljubljana (dpa/SN). W Słowjenskej, Awstriskej a Chorwatskej bědźa so dale ze sćěhami ćežkich njewjedrow a zapławjenjow. W Słowjenskej steja po sylnych zliwkach minjeneho tydźenja doły rěkow Davy, Savy a Mury pod wodu. Połoženje so hakle poněčim zaso wotputa.
Wopačna kroma
To a tamne (08.08.23)
Dochody swójskeho wobchoda spakosćił je 34lětny nawoda superwikow w Berlinje. Statne rěčnistwo mužej wumjetuje, zo je sej nimale dwě lěće dołho pjenjezy wobchoda zdźeržał a na tute wašnje 135 000 eurow pokradnył. Nadawk 34lětneho mjez druhim bě, dochody wobchoda po swjatoku we wosebitych wobalkach na banku donjesć. Znajmjeńša 66 króć je muž jednu wobalku za sebje zdźeržał.
Ze zjednoćenymi mocami su policisća kruwu z kolijow wuhnali. Njewšědny podawk sta so runje w bayerskim Ochsenfurće. Zwěrjo bě njedźelu rano z pastwy twochnyło a na kolijach do susodneje wsy běžało. Po krótkim wulěće na dróze dundaše kruwa znowa na kolijach. Bližacy so ćah dyrbješe zastać. Čaru dyrbjachu za železnicu kompletnje zawrěć. Zastojnikam policije so skónčnje poradźi, zwěrjo z picu z kolijow wabić.
Město rezidency ekocentrum
Castel-Gandolfo (B/SN). Wot zažneho 17. lětstotka přebywachu bamžojo w lěćnych měsacach w něhdźe 30 kilometrow wot Roma zdalenym Castel-Gandolfje. Bamž Franciskus chce tam na 55 hektarow wulkej ležownosći centrum za ekologiske kubłanje a ratarstwo zarjadować. Nowy centrum ma po jeho wobswětowej encyklice „Borgo Laudato Si“ rěkać.
Bydlenje a dowolowy dom
Vatikan (B/SN). Bamž Franciskus ma dwustwowe bydlenje we vatikanskim hóstnym domje Santa Marta na 70 kwadratnych metrach z dźěłarnju, spanskej a kupjelu. Tam přežiwja tež swój lětni dowol. W hóstnym domje ze 120 stwami ma wón stajnje dosć ludźi k bjesadźe. Rady z nimi tež za wulkim skupinskim blidom wobjeduje abo wječerja.
Křesćenjo přesćěhani
Imphal (B/SN). Po posudku katolskeho pomocneho skutka „Cyrkej w nuzy“ w indiskim zwjazkowym staće Manipur konflikta mjez ludowymi skupinami dla křesćanow wotewrjenje přesćěhuja. Wot spočatka meje bu něhdźe sto wěriwych morjenych a 350 cyrkwjow a cyrkwinskich zarjadnišćow wotpalenych. Něhdźe poł miliona ludźi je na ćěkańcy.
Za runostajenje žonow w cyrkwi
Dźěłarnistwo žada sej inwesticije
Berlin (dpa/SN). Nuzowy staw w hladanju, kubłanska katastrofa a klimowa kriza – wuhlady za Němsku w socialnym wobłuku su po měnjenju předsydki dźěłarnistwa DGB Yasmin Fahimi wšo druhe hač róžojte. Wona kritizuje njedostatki w socialnej infrastrukturje a žada sej inwesticije miliardow eurow. Dale a wjace ludźi bydli pod mjezu chudoby. Runočasnje je mały dźěl stajnje bohatši. Tutón dźěl dyrbjał wjace dawkow płaćić.
Za lěpše wotsunjenje
Berlin (dpa/SN). Zwjazkowe nutřkowne ministerstwo namjetuje w diskusijnej papjerje spěšniše wotsunjenje ludźi z tak mjenowanych clanowych strukturow. Přisłušnikow zhromadnosće organizowaneje kriminality móhli po tutym namjeće přichodnje „njewotwisnje wot chłostansko-prawniskeho zasudźenja“ wotsunyć, nowinarjo rozprawjeja. Změna zakonja móhła ludźi potrjechić, kotřiž kriminelnemu zjednoćenstwa přisłušeja, bjez toho zo bychu sami kriminelni byli.
China z najwyšim mostom swěta
Słowjenska bědźi so z najhóršimi zapławjenjemi w stawiznach ...
Weber: Wólbny program AfD deklaracija wójny
Berlin/Brüssel (dpa/SN). Europski politikar CSU Manfred Weber je wólbny program a lisćinu kandidatow AfD za wólby Europskeho parlamenta deklaraciju wójny přećiwo uniji a europskim křesćanskim demokratam (EVP) mjenował. „Woni su přećiwo wšemu, za čož su generacije předchadnikow wojowali“, rjekny Weber wčera wječor w sćelaku ZDF. Europska unija trjeba reformy. Štóž pak sej stawizny AfD wobhlada, tón widźi, zo dźe AfD wo cyle hinašu a nacionalistisce wusměrjenu Europu. „Tohodla dyrbimy k přichodnym wólbam zasadne prašenje rozrisać, hač tutón Europu zakitujemy a kak jako CDU/CSU k njej stejimy. Weber zasadźowaše so za wohnjowu murju k AfD, kotraž dyrbi jasnje definowana być. „Jenož, štóž steji poboku Ukrainy, štóž chcył Europu pozitiwnje wuwiwać a nochce ju wotstronić a štóž prawniski stat zakituje, móže demokratiski partner CDU/CSU być. Štóž so na to njedźerži, kaž AfD, je přećiwnik. Přećiwo tomu wojujemy“, Weber rjekny.
Předsydka frakcije Lěwicy wotstupi
Berlin (dpa/SN). Předsydka frakcije Lěwicy w zwjazkowym sejmje Amira Mohamed Ali so wobchadźenja strony ze Sahru Wagenknecht dla swojeho zastojnstwa wzda. „Sym so rozsudźiła, zo při přichodnych wólbach wjace za předsydku frakcije Lěwicy w zwjazkowym sejmje njekandiduju“, rěka w zdźělence politikarki. Posledni nastork za tutu kročel dało je wobzamknjenje nawodnistwa strony přećiwo Sahrje Wagenknecht spočatk junija, Mohamed Ali piše.
W swojim stejišću 43lětna skorži, zo je jej dale a ćešo, kurs nawodnistwa strony w zjawnosći zastupować. Wón spřećiwja so na mnohich městnach jeje politiskemu přeswědčenju. Nawodnistwo Lěwicy bě 10. junija jednohłósnje wobzamknyło, zo nima Sahra Wagenknecht w stronje žanoho politiskeho přichoda wjace a zo dyrbjała swój mandat złožić. „Tole pokazuje w dotal njewidźanej jasnosći wotpohlad, dźěl čłonstwa ze strony wutłóčić.“
Zapósłanc strony Alexander Ulrich rjekny: „Nětko nima Lěwica žaneje šansy wjace, do zwjazkoweho sejma přińć.“
