Kubłanišćo swj. Bena a Serbski ludowy ansambl hotujetej so na Smochčanski hudźbny swjedźeń. Pod hesłom „Słowakskej nocy“ předstaja chór, spěwni kaž tež instrumentalni solisća, orchester a balet SLA kaž tež hosćo Okteto Danubiana, Paľa Škodová a Jaroslav Pukač zajutřišim a slědowacu sobotu folkloru a wuměłsku hudźbu južnych susodow Serbow pod hołym njebjom na dworje kubłanišća. Dźensa je mustwo wokoło Christofa Bjarša (srjedźa) natwar jewišća zahajiło, mjeztym zo hudźbnicy a rejwarjo na wustupje filuja a kuchar kubłanišća hišće pobrachowace ingrediencije za specielny słowakski menij wobstaruje. Foto: SN/Bojan Benić

Po wolejbulowymaj hromaj mjez wučerjemi a dwanatkarjemi na Budyskim Serbskim gymnaziju (SN rozprawjachu) slědowaše dźeń po tym tradicionalna kopańca. Bě to mjeztym 31. rozestajenje, kotrehož spočatki sahaja do lěta 1994.Maturanća dobychu dotal jedynadwaceći króć, nětko je dalši triumf k tomu přišoł. Woni nastupichu ze šěsć aktiwnymi hrajerjemi ze zjednoćenstwow z Radworja, Chrósćic a Njebjelčic a přesadźichu so přećiwo wučerjam po dwójce 15 mjeńšinach 5:1.Pola pedagogow njemóžeštaj so aktiwnaj koparjej Bosćij Bejma (Sokoł Ralbicy/Hórki) a referendar Matej Wjeńka (ST 1922 Radwor) zasadźić, dokelž běštaj zranjenaj. Znowa wupomha Michał Wowčer, wučer na Serbskej wyšej šuli Ralbicy.

Zwjazkowy policist zadźerži na awtodróze A64 bus z pućowacymi. K zahajenju europskeho koparskeho mišterstwa přewjedźe policija w Trierskej kónčinje kontrole runje tak kaž při mjezach Pólskeje a Čěskeje. Hłowny zaměr wot zwjazkoweho nutřkowneho ministerstwa wukazanych kontrolow je, k namocy zwólniwych koparskich fanow kaž tež politisce motiwowanych ekstremistow spóznać a jim dale jězbu do Němskeje znjemóžnić. Foto: dpa/Harald Tittel

Minjeny pjatk stej Corina Rönschowa a Bernada Bulankowa na Budyskich Drjewowych wikach swjedźeń pod hołym njebjom organizowałoj. Z hudźbnymi poskitkami, kofejom a tykancom postaraštej so wo spodobnu a přitulnu atmosferu. Wšelacy wikowarjo su wudźěłki z drjewa a metala poskićili. Samo z masažu móžeše so wopytowar zapleńčić dać. Foto: SN/Bojan Benić

Zaměrowy zwjazk Łužiska jězorina Sakska podpěruje komuny při jězorach nastupajo wobhospodarjenje přibrjohow a šćežkow, za čož wužiwaja spěchowanske srědki Zwjazka. Bórze pak so doba zakónči.Wojerecy (AK/SN). Zaměrowy zwjazk Łužiska jězorina chce komunam, kotrež su čłonojo w gremiju, nastupajo wobhospodarjenje přibrjohow a kolesowarskich šćežkow při jězorach sylnišo podpěrać. Předewšěm maja so spěchowanske srědki ze zwjazkoweho programa STARK wužiwać, wo kotrež chce so zwjazk prócować. Program Zwjazka je za kónčiny ze změnu strukturow předwidźany. Radźićeljo wobzamknychu na wčerawšim posedźenju we Wojerecach jednohłósnje, zo dyrbi so spěšnje wotpowědna próstwa zdźěłać. Nowe spěchowanje měło wot klětu spočatka septembra do kónc awgusta 2029 płaćić. „Dźe wo to jězdźidła, graty a wosebite mašiny kupić. Chcemy komuny wolóžić a sami nadawki při jězorach přewzać. Tak maja so na přikład přibrjohi wurjedźić a kolesowarske šćežki hladać“, wuswětli jednaćel zaměroweho zwjazka Łužiska jězorina Sak ...

Dr. Měrćin Wałda z Njeswačidła wupraja so k wólbam europskeho parlamenta w zwisku ze serbskimi debatami:Dołho planowane a wočakowane štyri Serbske debaty su nimo. Wjele problemow je so načało a hišće wjele prašenjow je wotewrjene wostało, kotrež sebi hłubšu diskusiju žadaja. Njeńdźe wšak wo ničo mjenje hač wo naše serbske sebjezrozumjenje. Po poslednjej debaće bě wjetšina přitomnych połneje chwalby, kak „kultiwěrowane“ su diskusije wotběželi. Na kóncu běchu mjenje bóle wšitcy měnjenja, zo dyrbja debaty dale hić. Samo dr. Löffler, šef Sakskeje centrale za politiske kubłanje, kotryž je debaty elegantnje sobu organizował, bě měnjenja, zo „su so Serbja kompetentnje wadźili“. Wón chcyše so tež za to zasadźić, zo debaty dale du. Ale mjeztym je wjele časa zašło a ničo njeje hižo wo tym słyšeć.