Moskwa (dpa/K/SN). Ruski prezident Wladimir Putin je zemrěteho wulkopósłanca pola UNO Witalija Čurkina po jeho smjerći z Rjadom zmužitosće wuznamjenił. Počesćeny bu za swój angažement, swoju wutrajnosć a profesionalnosć w skutkowanju pola Zjednoćenych narodow, rěka k tomu z Krjemla.

Čurkin bě póndźelu w New Yorku njenadźicy zemrěł. Dźeń pozdźišo by 65ćiny swjećił. Što je k smjerći dowjedło, njeje najprjedy jónu znate było. Medije rozprawjachu, zo je problemy z wutrobu měł. Swój kraj je wón wot lěta 2006 w UNO zastupował. Bjezstrašnostna rada UNO je wutoru na wurjadnym zeńdźenju z mjeńšinu mjelčenja njeboh diplomata wopominała. Němske zastupnistwo pola UNO wupraji swójbje a přećelam Čurkina tohorunja swoju sobuželnosć. Peter Wittig, něhdyši wulkopósłanc pola UNO a nětko we Washingtonje, mjenowaše Čurkina „brilantneho diplomata, rady polemizowaceho, žortniweho, z darom přećelstwa“.

Pytajo za nowymi wobsedźerjemi swojich kóčkow kroči jedna ze zwěrjatownjow w Islandskej njezwučene puće. Wona­ prezentuje kóčki w internetnym livestreamje. Z třomi kamerami wšitko zapopaduje, štož kóčki w swojim dwuposchodowym klankowym domje činja. Cyły dźeń wusyłana dokusoap je iniciatiwa islandskeje towaršnosće za škit kóčkow, kotraž zwěrjatownju Kattholt w stolicy Reykjavíku wobhospodarja. Namaka-li so nowy wobsedźer, přińdźe druha bjezdomna kóčka na městno dotalneje.

Slědy kopytow a konjace zawostajenki wjedźechu policiju w Delnjej Frankskej k pohončej, kiž bě so po njezbožu zminył. 78lětny bě so z kuču parkowaceho awta šmórnył a 2 000 eurow škody zawostajił. Jeho šofer pak zawoła policiju, kotraž slědam sćěhowaše. Tak dojědźe runjewon do konjenca pohonča.

Składnostnje wčerawšeho Mjezynarodneho dnja maćeršćiny schadźowaše so Mjeńšinowa rada Němskeje minjeny kónc tydźenja w Sewjernej Friziskej a wopyta tam nałožk Biikebrennen. Serbow zastupowaše mjez druhim předsyda Domowiny Dawid Statnik, kiž je zdobom předsyda mjeńšinoweje rady.

Dagebüll (SN/JaW). Rada awtochtonych mjeńšin Němskeje – wobstejaca ze zastupnikow Danow, Frizow, Sintow a Romow a Serbow – wotmě swoje wuradźowanje k zazběhej lěta w sewjerofriziskim Dagebüllu. Wo tym informuje dźensa Berlinski mjeńšinowy sekretariat. W srjedźišću steještej nimo přihotow planowaneje debaty w zwjazkowym sejmje wo mjeńšinowych rěčach tež parlamentariske zarjadowa­nje składnostnje 20. róč­nicy připóznaća narodnych mjeńšin w Němskej, rěka w zdźělence.

Erfurt (dpa/K/SN). Durinski krajny sejm zaběraše so dźensa připołdnju z předwidźanej předanju Opela francoskemu awtotwarcej Peugeot-Citroën. Zapósłancow je zajimowało, kotre šansy so z tejle změnu wobsydstwa skića a što to za 1 850 dźěłowych městnow w Eisenachskej tworni Opela woznamjenja. Hospodarski minister Wolfgang Tiefensee (SPD) rozprawješe, zo knježi tuchwilu wulka njewěstosć mjez sobudźěłaćerjemi runje tak kaž mjez dodawarjemi Opelej.

Amnesty: Swět ćmowši

Berlin (dpa/SN). Organizacija Amnesty International (AI) kritizuje přiběrace ignorowanje čłowjeskich prawow w USA a Europje. Wosebje retorika loni wuzwoleneho prezidenta USA Donalda Trumpa politisku atmosferu přiběrajcy zajědojća, piše generalny sekretar AI Salil Shetty. „Swět je wot lěta 2016 ćmowši a njewěsćiši.“ Po cyłej zemi rozšěrja so politika rozzłobjenosće a pačenja.

AfD hłosy přisadźiła