Róčnica zničenja wopominana
W sakskej stolicy mnohe zarjadowanja byli
Drježdźany (dpa/K/SN). Sakska metropola je dźensa z mnohimi zarjadowanjemi swoje rozbiće w Druhej swětowej wójnje wopominała. 13. februara 1945 a naslědnjej dwaj dnjej běchu britiske a ameriske bombowcy centrum „połobskeho Florenza“ do procha a popjeła přeměnili. Něhdźe 25 000 ludźi tehdy w płomjenjach zahiny.
Wopominajo tragediju chce město zdobom na tuchwilne strašne konflikty na swěće dopominać a znamjo humanity znazornić. „W Drježdźanach su drje mnohe rany zažili, před samymi wrotami Europy widźimy pak dale rozbombardowane a wuludnjene města“, bě wyši měšćanosta Dirk Hilbert (FDP) při předstajenju programa zwuraznił. „Njeńdźe wo to, na swójsku bědu spominajo so zawrěć, ale dać ruku tym, kotrymž su bomby wšitko rubili.“ Za wšelake wuprajenja nastupajo 13. februar běchu prawicarscy ekstremisća Hilberta raznje přimali, tak zo dyrbješe jeho samo policija škitać.
Wuzwolenje Steinmeiera zwjetša witaja
Berlin (dpa/SN). Wuzwolenje Franka-Waltera Steinmeiera (SPD) za noweho zwjazkoweho prezidenta je přewažnje pozitiwne reakcije zbudźiło. Zwjazkowa kanclerka Angela Merkel (CDU) je sej wěsta, zo budźe Steinmeier hladajo na noweho ameriskeho prezidenta Donalda Trumpa a přiběracy nacionalizm wusahowacy zwjazkowy prezident „w tychle ćežkich časach“.
Sydom měsacow do wólbow zwjazkoweho sejma 24. septembra běštej unija a SPD swojeho zhromadneho kandidata wčera w Zwjazkowej zhromadźiznje w Berlinje z dobrymi 75 procentami hłosow přesadźiłoj. Steinmeier je tak najlěpši wuslědk wšitkich dotalnych wólbow zwjazkoweho prezidenta docpěł.
Kaž rjekny předsyda CSU Horst Seehofer w telewiziji ARD, je jeho stronje wažne, zo naslědnik Joachima Gaucka zastojnstwo w samsnej kwaliće dale wukonja. Městopředsyda CDU Thomas Strobl zwurazni, zo trjeba Němska „zwjazkoweho prezidenta, kiž jednoća, integruje a stabilizuje“.
Zmužity měšćanosta
To a tamne (13.02.17)
Z pozdatnym infarktom wutroby je Berlinjan w pfalcskim Landauwje sanitetarjow zjebał, zo by wot nich morfium dóstał. Z tajkim trikom bě 25lětny hižo časćišo po wšej Němskej napadnył. Wočiwidnje wot drogow wotwisny muž bě při tankowni bolosćow w hrudźi dla skoržił a typiske symptomy infarkta wutroby rysował. Přiwołani sanitetarjo dachu jemu na to morfium. W chorowni wšak so spěšnje wukopa, zo njebě to infarkt. Skónčnje dyrbjachu policiju wołać, dokelž muž w chorowni randalěrowaše.
Na wšě 270 000 eurow je podružnik w Awstriskej při wurumowanju pincy swojeho noweho bydlenja w kartonje namakał. Muž zdźěli na to swoju namakanku policiji, kaž nowiny rozprawjeja. Komu pjenjezy słušeja a zwotkel pochadźeja, dotal hišće njewědźa. Policija za tym slědźi.
Rumunojo dale protestuja
Bukarest (dpa/SN). Najebać wčerawši wotstup justicneho ministra a zymske wjedro přećiwnicy knježerstwa w Rumunskej dale protestuja. Tež wčera wječor su tysacy ludźo w stolicy Bukaresće a dalšich městach kraja na dróhu šli. Demonstracije, kotrež traja mjeztym dźesać dnjow, su najmócniše w Rumunskej po powalenju socializma. Wone měrja so přećiwo socialnoliberalnemu knježerstwu, kotrež chcyše z nowym zakonjom bój přećiwo korupciji haćić. Justicny minister Florin Iordache bě protestow dla wčera wotstupił.
Konop nětko na recept
Berlin (dpa/SN). Ćežkochorym smě so w Němskej konop jako lěk dawać. Zwjazkowa rada je dźensa naćisk wotpowědneho zakonja schwaliła. Chorobne kasy dyrbja terapiju ze sušenymi konopjowymi kćenjemi zapłaćić. Wočakuje-li lěkar pozitiwny wuskutk na wuwiće symptomow, móže wón konop jako medikament zapisać. Jeje plahowanje chcedźa statnje rjadować, jako wopojny srědk wostanje konop dale zakazana.
Knježerstwo bjez wjetšiny
Bomby turkowskich wojakow morili
Trump nětko tola za „jednu Chinu“
Wšelake reakcije na plany wotsunjenja
Berlin (dpa/SN). Zwjazkowy justicny minister Heiko Maas (SPD) je dojednanje mjez Zwjazkom a krajemi k spěšnišemu wotsunjenju witał. Powěsćerni dpa wón rjekny: „Jenož, hdyž swoje prawidła přesadźimy, móžemy akceptancu ludźi za zapućowanje dołhodobnje zachować.“
Zwjazk a kraje běchu so wčera na 15dypkowy plan dorozumili. W srjedźišću steji rjadowanje, zo móža požadarjow azyla bjez kóždeho wuhlada na to, w Němskej wostać směć, hižo z prěnjeje přebywarnje zaso wróćo pósłać. Jich nochcedźa scyła hakle do komunow słać, zo bychu so tam zažiwili. Ćěkancow, kotřiž z wopačnymi identitami němske instancy jebaja abo su kriminelni, chcedźa raznišo chłostać.
Braniborski ministerski prezident Dietmar Woidke (SPD) plany wita a praji: „Smy dobry wuslědk namakali.“ Zdobom na to pokaza, zo su mnozy wukrajnicy zwólniwi so integrować. Jim dyrbimy tež na dźěłowych wikach šansu dać. „Trjebamy skónčnje zakoń wo zapućowanju.“
Samowrota sej třěliła
Poprawom wěšća stare burske kaznje wjedro a sćěhi za ratarstwo. Přez generacije dale dawane słušeja wone dźensa k wšědnemu žiwjenju. Zwjazkowa ministerka za wobswět Barbara Hendricks (SPD) je nětko nowe tajke kaznje wuwiła. Z wabjenskej kampanju chcyše na njedostatki w ratarstwje skedźbnić. Akcija pak je wulku zjawnu debatu zawiniła; a hač je woprawdźe swój zaměr docpěła, na tym dwěluju. Runje w tuchwilnym połoženju ratarjow, kotřiž bědźa so z niskimi płaćiznami za swoje wudźěłki, je absolutnje njepřiměrjene na njedostatki pokazać. Zo su ratarjo zranjeni, móžu rozumić. Poprawny wotmysł, wobswět a ratarstwo wujednać, njeje so ministerce poradźiło. Runje nětko we wólbnym lěće je sej ministerka Barbara Hendricks prawdźepodobnje samowrota třěliła. Sym wćipna, kak so tomu wuwinje.
Bianka Šeferowa
