To a tamne (14.02.25)
Kaž Jonas w bibliskich stawiznach: Wjelryba je 24lětneho čołmikarja na juhu Chile spóžrěła a sekundy po tym wuplunyła. Nan muža je njesłyšany podawk z mobilnym telefonom dokumentował. Čołmikarjej njebě spočatnje ani wědome, što so z nim stała. Jako bě w ćmowej tlamje ryby, mysleše na smjerć. Hakle pozdźišo sej situaciju prawje wuwědomi. Najebać to chce dale čołmikować.
Starc je we wobchodźe w Nossenje z pistolu w ruce zasadźenje policije zawinował. Swědcy běchu muža wobkedźbowali a zastojnikow wołali. Tući muža kontrolowachu. Při tym so wukopa, zo je 74lětny hrajkansku pistolu za wnučka kupił a hnydom wupruwował, hač nastroj z papjerjanymi šlebjerdkami woprawdźe praska. Pistolu móžeše starc wobchować. Zdobom pak jeho policisća powučichu, kak ma so z njej w zjawnosći zadźeržeć.
Wopominaja wopory nalětow
Wjacore zarjadowanja a čłowjeski rjećaz k 80. róčnicy zničenja Drježdźan
Drježdźany (dpa/SN). Sakska krajna stolica wopomina dźensa zničenje města w Druhej swětowej wójnje. Składnostnje 80. róčnicy nalětow 13. a 14. februara 1945 chcychu wosebje sylne znamjo wujednanja a zhromadnosće sadźić. Pod hesłom „Zhromadnje kedźbliwi“ chcedźa sej wječor dźesaćitysacy ludźi ruce zawdać a čłowjeski rjećaz wokoło nutřkowneho města wutworić.
Započinał je so dźeń z kładźenjom wěncow na kěrchowach města. Při cyrkwi Našeje knjenje su ludźo swěčki a kwětki stajili. Wječor zanjesetej Drježdźanska filharmonija a Statna kapała koncerty. Po wječornej Božej słužbje maja zwony zwonić, runje za čas prěnich nalětow 1945, tři měsacy do kónca wójny.
Nowe mjezwočo w kuratoriju
Budyšin (SN). Prezidij Domowiny je so na wčerawšim posedźenju w Budyskim Serbskim domje z předłohami za hłownu zhromadźiznu zaběrał. Tak běchu tež dźěłowe směrnicy Domowiny tema. Naćisk tutych nadawkow, kotrež su na program třěšneho zwjazka wusměrjene, su na webstronje Domowiny wozjewili. Zajimcy su přeprošeni, přispomnjenja abo namjety hač do kónca měsaca zapodać na: .
Prezidij je Julianu Kaulfürstowu jako zastupjerku z Hornjeje Łužicy do kuratorija Myta Ćišinskeho delegował. Domowina je z dwěmaj čłonomaj – z Hornjeje a Delnjeje Łužicy – zastupjena. Prezidij so dotalnemu zastupjerjej Manfredej Hermašej za wjelelětne skutkowanje w gremiju wutrobnje dźakuje. Z Delnjeje Łužicy dźěła Marion Stenselowa w kuratoriju.
Dale je prezidij dorostowy chór a rejowansku skupinu 1. serbskeje kulturneje brigady delegował. Chór budźe 28. apryla na swjatočnym spominanju za padnjenych pólskich wojakow w Chrósćicach spěwać. Rejowanska skupina pojědźe wot 2. do 5. meje na wubědźowanje do Prahi. Domowina přewza jězbne kóšty.
Scholz wo sebi přeswědčeny
Berlin (dpa/SN). Dobry tydźeń do wólbow zwjazkoweho sejma trochuje zwjazkowy kancler Olaf Scholz swoje šansy na znowawuzwolenje na 60 procentow. Tójšto ludźi je hišće njerozsudźenych, rjekny politikar SPD časopisej Spiegel. To je wosebje při tutych wólbach tak. Po tuchwilnych woprašowanjach matej CDU/CSU z Friedrichom Merzom z 30 procentami najlěpše wuhlady, sćěhuje AfD z 20 procentami. Strona kanclera SPD wostanje z 15 procentami daloko za tym.
Granata w barje rozbuchnyła
Grenoble (dpa/SN). W juhowuchodnym francoskim měsće Grenoble su njeznaći granatu do bary ćisnyli, kotraž je tam rozbuchnyła. Po informacijach policije je so při njeskutku w socialnje kritiskej měšćanskej štwórći dwanaće ludźi zraniło. Měšćanosta Éric Piolle rěčeše wčera wječor wo „kriminelnym njeskutku njesměrneje namocy“. Terorowy nadpad policija wuzamkuje. Prawdźepodobnje dźe wo namócne rozestajenje mjez cwólbami wikowarjow drogow.
Kancler ze senatorom rěčał
Kickl sej dobyća wěsty
Sakski sejm po nowym puću
Drježdźany (dpa/SN). Sakski krajny sejm je kooperaciske zrěčenje mjez knježerstwom a opoziciju z wjetšinu schwalił. Za „konsultaciske a informaciske dojednanje“ hłosowachu nimo zapósłancow CDU a SPD tež Lěwica a Zeleni a nimale wšitcy zastupnicy Zwjazka Sahry Wagenknecht. Po nowym dojednanju chce knježerstwo opoziciju hižo zahe do nowych zakonskich předewzaćow zapřijeć a jich namjety wobkedźbować. Po tutym puću móhli tež projekty opozicije wjetšinu w sejmje dóstać. Zastupnicy CDU rěčachu wo „nowej politiskej kulturje“.
AfD ma dojednanje za „simulaciju demokratije“ a nochce so na mechanizmje wobdźělić, wšako stej CDU a SPD dźěło z AfD tak a tak wuzamknyłoj.
Trump a Putin telefonowałoj
Washington/Moskwa (dpa/SN). Prezident USA Donald Trump je z ruskim prezidentom Wladimirom Putinom telefonował a je so z nim na hnydomne rozmołwy wo skónčenju wójny w Ukrainje dojednał. Tole je Trump na swojej internetnej platformje zdźělił. W Krjemlu su telefonat wobeju statnikow wobkrućili. Trump je po tym tež z ukrainskim prezidentom Wolodymyrom Zelenskym rěčał.
W tym zwisku je knježerstwo Trumpa prěni króć zjawnje předstajiło, kak sej deal k skónčenju wójny předstaji – a to we wjacorych dypkach w zmysle Ruskeje. Tak měła so Ukraina móžneho čłonstwa w NATO wzdać. Wojacy USA njesměli dźěl mjezynarodneje měroweje jednotki być. Trump rěčeše wo „dołhim a jara produktiwnym telefonaće“. Wobaj chcetaj so bórze zetkać. Po rozmołwje z Putinom telefonowaše Trump ze Zelenskym. Tón chce so jutře w Mnichowje z wiceprezidentom USA J.D. Vanceom zetkać.
Mjeztym žada sej Europska unija, zo smě so na rozmołwach wo přichodźe Ukrainy wobdźělić.
Wubědźowanje wažne
Móst hłubšo přepytuja
Bad Schandau (dpa/SN). Na wot spočatka nowembra zawrjenym mosće nad Łobjom w Bad Schandauwje chcedźa nětko prěni króć tež hornje woršty mosta pruwować. Přihoty za to hišće tutón tydźeń zakónča, krajny zarjad za dróhotwar a wobchad zdźěla. Tam chcedźa na wjacorych městnach asfalt wotdypać a sej beton pod nim bliže wobhladać.
Zo bychu dokładnišo wědźeli, hdźe móhła nošna struktura mosta přez zymsku sel a dźěry w asfalće chutnje wobškodźena być, su minjeny čas elektromagnetiske pruwowanja přewjedli. Na kritiskich městnach chcedźa přichodny tydźeń asfalt wočinić a kuski wocloweje konstrukcije wurězać. Kónc februara chcedźa městna pruwowanja zaso dospołnje začinić, zamołwići zdźěleja.
Móst nad Łobjom w Bad Schandauwje běchu 7. nowembra njewočakowano z wěstotnych přičin zawrěli. Łódźe smědźa mjeztym zaso jězdźić, nadróžny wobchad dyrbi dale dołhe wokołopuće na so brać. Nastork zawrjenja bě wurjadne pruwowanje mosta po sypnjenju Carolineho mosta w Drježdźanach. Tam běchu swój čas samsny wocl wužiwali.
To a tamne (13.02.25)
Nimale 900 kilogramow kokaina je policija w mašinje namakała, kotruž běchu z Kolumbiskeje do Luxemburga přiwjezli. Wopojny jěd bě we walcach schowany, kotrež słužachu k rozkuskowanju kamjenjow. Hódnotu sćazaneho kokaina trochuja na 160 milionow eurow. Zo bychu pakćiki z walcow wućahnyć móhli, dyrbjachu mašinu kompletnje rozebrać. Policija je dweju podhladneju zajała.
Chrobły pad ćeknjenja po njezbožu policija w poruhrskim Herdecke přepytuje. Njeznaty bě na parkowanišću do druheho awta prasnył a na to cedlku zawostajił, tola jenož po zdaću. „Bohužel sym runje do wašeho awta zajěł. Pěšk pak je mje wobkedźbował. Tuž nětko tak činju, jako bych swoje daty zawostajił“, na papjerce steješe. Jako tróšt bě małe słónčko namolowane. Policija pyta nětko za swědkom, wo kotrymž njeznaty piše.
