Prawicarske njeskutki přiběraja
Póst šmórnje 8 000 městnow
Bonn (dpa/SN). Póst šmórnje w Němskej hač do kónc lěta 8 000 dźěłowych městnow. Potrjechena je wotnožka za listy a pakety, w kotrejž dźěła tuchwilu 187 000 přistajenych. Štyri procenty tutych dźěłowych městnow chcedźa wottwarić. Zwoprawdźić ma so tole na socialnje znjesliwe wašnje. Lutowanje wuskutkuje so na globalnje dźěłacu logistisku wotnožki DHL ze 600 000 sobudźěłaćerjemi. Přiběrace kóšty a woteběracy dobytk koncern poćežuja.
USA so Ukrainje přibližuja
Washington (dpa/SN). Po eklaće w Běłym domje a přetorhnjenym dodawanju brónjow so knježerstwo USA po swójskich informacijach zaso Ukrainje přibližuje. „Hibamy so do pozitiwneho směra“, rjekny poradźowar za wěstotne prašenja Mike Waltz sćelakej Fox News. Tuchwilu rěča z Ukrainu wo tym, hdy a hdźe móhli so zastupnicy zetkać. Tež namjety za polěpšenje mjezsobneje dowěry tuchwilu zdźěłuja. Plan chcedźa Ruskej předpołožić.
Bamž dźeń w křesle přežiwił
Přistajeni łužiskeho energijoweho zastaraćela LEAG su w ramiku ...
FDP kritizuje nowe zadołženje
„Posledni raz“ Hamas warnował
SPD zawrjenje mjezow wotpokazuje
Berlin (dpa/SN). Do dalšich sonděrowanskich rozmołwow wo wutworjenju noweho zwjazkoweho knježerstwa z CDU/CSU je předsyda SPD Lars Klingbeil jasnu mjezu w migraciskej politice ćahnył. „Móžu wam cyle jasnje rjec – SPD njebudźe žanomu faktiskemu zawrjenju mjezow přizwolić“, rjekny wón wčera w sćelaku ARD. „Tole njemóžemy narodnje přesadźić. Z europskeho wida by tole tež chětro njerozumne było“, Klingbeil potwjerdźi.
Unija CDU/CSU bě do wólbow zwjazkoweho sejma z hłosami AfD naćisk w zwjazkowym sejmje schwaliła, kotryž wobsahuje wotpokazanje za azylom pytacych při mjezach Němskeje. Frakciski šef unije Friedrich Merz bě připowědźił, zo chcył prěni dźeń w zastojnstwje zwjazkoweho kanclera nutřkownemu ministerstwu přikazać, „bjez wuwzaća wšitke pospyty ilegalneho zapućowanja wotpokazać“. SPD bě tole hišće we wólbnym boju jako zakonje ranjace wotpokazała. Bjezposrědnje po wólbach bě Merz rjekł, zo nochce mjezy zawrěć, byrnjež so tole we wólbnym boju pječa takle rjekło.
Francoska za atomarny škit
Zastupjerjo krajow EU na wjeršku wo zhromadnej strategiji wuradźuja
Brüssel/Berlin (dpa/SN). Wonkowna politika prezidenta USA Donalda Trumpa wobydlerjow Europy starosći. Na krizowym wjeršku chcedźa zastupjerjo krajow dźensa wo konsekwencach a strategijach wuradźować.
Što je wuchadźišćo tuchwilu hubjeneho poćaha mjez USA a EU? Hižo tydźenje Trump a swój team cyle jasnje zwuraznitaj, zo chcetaj wójnu w Ukrainje zakónčić. Při zetkanjach z ruskim knježerstwom jednaše USA bjez zastupjerjow z Ukrainy a EU. Přiwšěm ma po předstawach Trumpa EU nadawk dóstać, měr w Ukrainje zaručić. Za potrjechene kraje tole woznamjenja, zo maja w běhu krótkeho časa swoje wójska wuhotować a spřihotować. Tajne słužby z toho wuchadźeja, zo je Ruska w lěće 2030 kmana, dalšu wójnu zahajić. Tohodla je wažne, zo Europa swoju wojersku móc tež za wottrašenje wutwarja. Kraje drje su sej přezjedne, zo dyrbja wudawki za zakitowanje jasnje powyšić. Tola mnohe knježerstwa njewědźa, kak dyrbja to financować.
Give pěsk a chance?
Stawkuja težw pěstowarnjach
Drježdźany (dpa/SN). W trajacej tarifowej zwadźe za přistajenych komunow a Zwjazka hroža kónc tydźenja znowa warnowanske stawki. Dźěłarnistwo ver.di namołwja swojich čłonow, jutře, 7. měrca, po wšěm swobodnym staće dźěło złožić. Před měšćanskej radnicu w Drježdźanach planuja centralnu demonstraciju. Wot stawka potrjechene su mjez druhim měšćanske a gmejnske zarjadnistwa kaž tež lutowarnje, dźěłowe agentury a job-centery.
Na wobćežnosće měli so zdobom starši mjeńšich dźěći nastajić. Tež w komunalnych žłobikach, pěstowarnjach a hortach móhli stawkować. Datum stawka su dźěłarnicy cyle wědomje wuzwolili, zo bychu składnostnje Dnja žonow znamjo sadźili. Towaršnosć njesměła so na to zwučić, zo přewozmu žony kubłanske dźěło a zo so ze špatnymi wuměnjenjemi wotnamakaja. To zdźěla dźěłarnistwo za kubłanje a wědomosć GEW. Dźěłarnistwo žada sej za přistajenych mjez druhim wosom procentow wjace mzdy, znajmjeńša pak 350 eurow wob měsac, kaž tež wyše přiražki za nadhodźiny. Přichodne jednanja planuja wot 14. do 16. měrca.
