To a tamne (20.03.25)
Finska wostanje kraj z najzbožownišimi ludźimi swěta. Kraj na sewjeru Europy je sej wosmy raz za sobu wodźace městno na swět wopřijacej lisćinje zbožownych ludźi zawěsćił. Sćěhuja Danska, Islandska a Šwedska. Němska je wot 24. na 22. Městno postupiła. USA je wo jedne městno na 24. poziciju zestupiła, najšpatniše hódnoćenje w stawiznach kraja.
Nadměrne wužiwanje digitalnych medijow wuskutkuje so špatnje na derjeměće dorosćenych w Němskej. To je wuslědk reprezentatiwneho naprašowanja instituta Stragetija & slědźenje. 1 680 dorosćenych je so na naprašowanju wobdźěliło. Najbóle ćerpi skupina 18 do 27lětnych. 92 procentow ludźi tuteje starobneje skupiny wužiwa socialne medije. Jenož 32 proc. čuje so po tym hišće derje. Zwěsćichu zdobom, zo su młodostni w Němskej mjeztym dźesać hodźin wob dźeń w interneće po puću.
Kandidaća za zwjazkowe předsydstwo so předstajeja (1)
Na hłownej zhromadźiznje Domowiny spočatk apryla wola delegaća nowu zestawu gremija
Roman Dźisławk
staroba:
49 lět
powołanje: zawodny hospodar, nawoda logistiki pola Hornjołužiskich klinikow ptzwr
towarstwo:
Towarstwo Cyrila a Metoda z. t.
Kak dołho sće hižo čłon ZP?
Dotal hišće čłon njejsym.
Čehodla chceće so w Zwjazkowym předsydstwje Domowiny angažować?
Wažnej stej mi serbske šulstwo a serbske rěčne kubłanje. Nimo toho chcu nabožno-narodne herbstwo wobchować a so za dalewuwiće pastoralneho ruma zasadźować. Mam hižo někotre nazhonjenja z dalšeho čestnohamtskeho angažementa: Sym čłon staršiskeje iniciatiwy Radwor z.t., čłon župneho předsydstwa župy Budyšin, čłon předsydstwa TCM, čłon CDU a čłon sportoweje jednotki Radwor.
Što su po Wašim měnjenju najwažniše temy serbskeho ludu?
Wobchowanje serbskeje rěče a kultury a serbske rěčne wukubłanje na šulach.
Wo čo chceće so prócować, jeli Was wola?
Chcu so za to zasadźować, zo wostanje Domowina jenička rěčnica Serbow.
Wizija – hač do 2100 chcemy 100.000 rěčnikow zdobyć. Što je Waša wizija za 2100?
Dalše miliardy za Ukrainu
Berlin (dpa/SN). Zwyšenje pjenježneje pomocy na dobro Ukrainy wo tři miliardy eurow po přizwolenju unije CDU/CSU a SPD k nowemu hoberskemu pjenježnemu paketej nětko spěšnje zwoprawdźa. Zwjazkowe financne ministerstwo je wotpowědny naćisk etatowemu wuběrkej pósłało. Tón nětko wo rozdźělenju srědkow rozsudźi. Wo pomocny paket za Ukrainu běchu so do wólbow zwjazkoweho sejma dołho wadźili.
Guterres Gazy dla rozhorjeny
New York (dpa/SN). Generalny sekretar UNO António Guterres je Israel doraznje namołwjał, zo přiměr w Gazaskim pasmje dodźerži. „Namołwjam nuznje, zo přiměr respektuja, zastaranje ciwilneje ludnosće dale zaruča a wšitkich zastajencow hnydom a bjez wuměnjenjow pušća, Guterres piše. „Sym rozhorjeny israelskich nalětow w Gazy dla“, wón doda. Při nadpadach w nocy na wutoru přisadźi po informacijach Palestiny 400 ludźi swoje žiwjenje.
Trump wumjetuje sudnikam
Derje přizemiła je kapsla swětnišćoweje łódźe SpaceX Dragon ...
Kandidata opozicije zajeli
EU předstaji plan zakitowanja
Dalše rozmołwy wo skónčenju wójny
Kijew/Washington (dpa/SN). Jednanja wo skónčenju wójny w Ukrainje pokročuja po informacijach społnomócnjeneho USA Steva Witkoffa njedźelu w sawdi-arabskim přistawnym měsće Dshidda. W tym zwisku dyrbja hišće tójšto nadrobnosćow zrjadować, Witkoff sćelakej Fox News rjekny.
Prezident USA Donald Trump a ruski prezident Wladimir Putin běštaj so wčera telefonisce na to dojednałoj, zo Ruska w přichodnych 30 dnjach žane ukrainske energijowe zawody njenadpaduje. Ukrainski prezident Wolodymyr Zelenskyj dojednanje zasadnje witaše, prošeše pak zdobom wo dalše informacije.
Běły dom we Washingtonje po telefonaće Trumpa a Putina zdźěli, zo chcedźa puć k měrej zahajić. Trump rěčeše wo dobrej a konstruktiwnej rozmołwje.
Zwjazkowy kancler Olaf Scholz (SPD) žadaše sej w swojim stejišću dospołny přiměr a trajacy měr po wšej Ukrainje. Tole rjekny wón po zetkanju z francoskim prezidentom Emmanuelom Macronom.
Škitany rum kreatiwity
Zo wo schadźowance lajskich dźiwadłowych skupinow hišće ničo słyšał njejsym, drje na tym zaleži, zo njeběch hišće na swěće, jako so poslednja wotměwaše. Ideju pak mam za přewšo dobru. W časach stajnje dale so roztřěskaneje towaršnosće je derje, zo mamy konstanty, kotrež ju zwjazuja. Naše lajske, wjesne dźiwadłowe skupiny su tajki lěpk. Derje tuž je, zo wone w mjezsobnej konkurency njesteja. Nawopak pytaja nětko ze schadźowanku rum, kotryž nowe styki zmóžni. Tež hdyž chcychu zarjadowanje poprawom za wjetšu zjawnosć zarjadować, so mi skerje intimny ramik bjez wulkeho eksterneho publikuma přewšo spodoba. Tak skići mjenujcy škitanu sferu, w kotrejž móža so kreatiwni wuspytać. Tole drje je tež móžnosć do přichoda. Z dale a wjace synergetiskimi efektami pohłubšamy kooperaciju. Přetož jasne je: Najsprawniši kritikar je čłowjek, kotryž sam hdys a hdys na jewišću steji.
Maximilian Gruber
Sydom dotal njeznatych wersijow „Rjaneje Łužicy“
Pod hesłom „O lužickosrbské hymně“ je dźens tydźenja w Praskim Serbskim seminarje přednošował aktualny knihownik Towarstwa přećelow Serbow (SPL) a něhdyši stipendiat Załožby za serbski lud na Lipšćanskej uniwersiće Martin Boukal, wo serbskej hymnje „Rjana Łužica“. Tež wo jeje čěskich instrumentacijach z 30tych lět zašłeho lětstotka rěčeše. Něhdźe 15 zajimcam, mjez nimi běchu tež někotři z Budyšina, předstaji nowe namakanki z archiwa SPL kaž tež ze zawostajenstwa wjacorych něhdyšich čłonow towarstwa z Čěskich Budějovic.
Royals chcedźa bamža zetkać
London (dpa/SN). Kralowski por Wulkeje Britaniskeje nadźija so dale zetkanja z bamžom Franciskusom, kotryž leži hižo dlěje hač měsac w chorowni. Jeho lěkuja tam ćežkeho zahorjenja płucow dla. Strowotny staw bamža je so naposledk polěpšił. Wukrajnu jězbu Krala Charlesa III. (76) a kralowny Camille (77) přewjedu wot 7. hač do 10. apryla, kralowski palast w Londonje zdźěla.
W tym zwisku planuja tež awdiencu pola Franciskusa (88). Wšitcy so nadźijeja a so modla, zo móhł kralowski por jeho po planje wopytać, cituje powěsćernja PA sobudźěłaćerja palasta.
Nimo toho wopytaja royalni Rom a Ravennu. Jězba budźe na 20. kwasnym dnju kralowskeho pora. Charles a Camilla běštaj so 9. apryla 2005 zmandźeliłoj. Za wobeju je to druhe mandźelstwo. Što składnostnje jubileja hišće planuja, njeje znate.
Charles chce na statnym wopyće w italskim parlamenće rěčeć. W Romje wočakujetaj jeho statny prezident Sergio Mattarella a ministerska prezidentka Giorgia Meloni. Charles je tež nawoda anglikanskeje Church of England.
