Financny paket noweje koalicije wohroženy – prócowanja wo rozmołwy

Berlin (dpa/SN). Zeleni nochcedźa planowanemu, miliardy eurow wopřijacemu financnemu paketej na dobro zakitowanja a infrastruktury w aktualnej formje přihłosować. Předsydka frakcije Zelenych w zwjazkowym sejmje Katharina Dröge rjekny wčera w Berlinje, zo chce wona frakciji zhromadnje z městopředsydku frakcije Brittu Haßelmann namjetować, plany wotpokazać.

Dröge na to pokaza, zo su Zeleni za zasadnu reformu mjezy zadołženja, zo njemóhła Němska jenož swoju wěstotu zaručić, ale zo by tež srědki za na přichod wusměrjenu infrastrukturu a moderne hospodarstwo měła. Zeleni pak wotpokazuja, wólbne dary mjez wolerjemi rozdźěleć. „Wolfgang Schäuble by so w rowje wobroćił, by-li wón widźał, kak chce CDU mjezu zadołženja změnić, zo móhła dawkowe dobroty financować“, rjekny předsydka Zelenych Franziska Brantner nowinarjam.

Bjez kóždeho medialneho rozhorjenja přihotuja němscy politikarjo zajutřišim, štwórtk, hnydom dwaj podawkaj, kotrejž nimataj w stawiznach Němskeje swojeho runjeća. Zwjazkowy sejm, kotryž su wolerjo Němskeje 23. februara we wólbnych kabinach wotwolili, ma jenož něšto dnjow do posedźenja noweho sejma spěšnje hišće wustawu kraja změnić, kotraž zadołženje stata wobmjezuje. Tutón njesłyšany trik je trěbny, dokelž nowa koalicija CDU/CSU a SPD w nowym zwjazkowym sejmje za to žanu wjetšinu njezměje. Wobzamknyć chcedźa jako „wurjadne zamóženje“ tarnowane gigantiske přidatne zadołženje 800 miliardow eurow, kotrež bě přichodny zwjazkowy kancler Friedrich Merz (CDU) we wólbnym boju stajnje zaso wotpokazał, štož je dalši skandal. Najbóle zluda pak mje samozrozumliwosć, z kotrejž so wšitke strony nimo AfD a Lěwicy na tutym njedemokratiskim postupowanju wobdźěla. To njejsu žane dobre wuhlady do přichoda. Marko Wjeńka

Drježdźany (dpa/SN). Problemy z bateriju abo motorom: Loni su šoferojo w Sakskej wjace hač 107 000 króć ADAC wo pomoc prosyli. Tole wotpowěduje niwowej lěta 2023, kaž ADAC zdźěla. Najčasćišo zawołachu pomocnikow skóncowaneje baterije dla (45 procentow). W 22 procentach wšěch panow bě motor abo motorowy management zaprajił. Po wšej Němskej pak mějachu pomocnicy ADAC loni wjace dźěła hač 2023. Wjace hač 3,6 milionow króć buchu zawołani, 102 000 króć wjace hač lěto do toho. Najwjace zasadźenjow mějachu spočatk lěta: Z 377 000 nuzowymi telefonatami bě w januaru najwjace dźěła. Wosebje wusahowacy bě 9. januar 2024, jako dyrbjachu nimale 20 000 króć pomhać. Přičina za wyšu ličbu zasadźenjow je po měnjenju ADAC wyša pře­rězna staroba awtow, kotraž wučinja w Němskej mjeztym 10,6 lět. Tež elektroawta wostachu husćišo stejo. Wjace hač 43 600 króć dyrbjachu so pomocnicy wo e-awta starać, to je 46 procentow wjace hač 2023. Tež kolesowarjo husćišo na ADAC zawołaja: Něhdźe 17 000 króć, štož je wosom procentow wjac hač w předlěće. Zwjetša nimaja hižo powětr we wobruči.

Nimale 150 runje wulehnjenych ćipkow su njeznaći njedaloko Lipska při zymskich temperaturach na polu wusadźili. Pomocnicy su je po pokiwje swědkow zezběrali a do doma za zwěrjata dowjezli, kotryž je na zastaranje tajkeho skotu specializowany. Ćipki drje normalnu starobu klasiskeje kokoše nihdy njedocpěja, kaž nawoda zwěrjatownje rjekny. Za to pak njetrjebaja čwěle znjesć, kotrež bychu je w klětkach wočakowali.

Na wšěch 11 000 litrow mloka je nakładne awto ducy do mlokarnje při wobchadnym njezbožu w Schleswigsko-Holsteinskej njedaloko danskeje mjezy zhubiło. Šofer dyrbješe so napřećo přijěducemu awtej wuwinyć. Připowěšak mlokoweho ­awta suny so do přirowa, na čož mloko wuběža. Šofer tamneho awta jědźeše dale, bjez toho zo by so wo sćěhi njezboža starał. Policija pad přepytuje.