Kulturnu zahrodu na žurli zahajili
Dorost brigady na koncerće talent dopokazał
Budyšin (SN/bn). Dorostowy chór a rejowanska skupina 1. serbskeje kulturneje brigady stej wčera „trochu zapozdźeny nalětni koncert“ w połnje wobsadźenej awli Serbskeho gymnazija Budyšin wuhotowałoj. Po słowach nawodnicy chóra Judith Škodźineje zwažichu so ze zarjadowanjom na „mały eksperiment“, kombinujo je ze swačinu. Zdobom bě koncert „zakónčenje přewšo aktiwneho lěta z tójšto wjerškami“, wona rjekny. Při tym wuzběhny mjez druhim wustup na lońšej Schadźowance a wobrubjenje lětušeho wopomnjeća padnjenych pólskich wojakow składnostnje 80. róčnicy kónca Druheje swětoweje wójny. Program spěwneho cyłka wotbłyšćowaše narok ćělesa, „wobchowować tradicije a zwjazać je z modernu“ kaž tež „wobkedźbować wšitke rěče“, kotrež na gymnaziju podawaja. Tak zaklinčachu na přikład sadźby „Ja znaju kraj“, „California dreaming“, „W moim ogródecku“ a „Vois sur ton chemin“.
Preußlerowy Krabat wotnětka hornjoserbsce přistupny
Budyšin (SN/bn). Na zakładźe serbskeho mytosa bě Otfried Preußler w běhu dźesać lět swój najwuspěšniši roman „Krabat“ spisał. Po prěnim wudaću 1971 bu kniha mjeztym we wjace hač 40 rěčach publikowana. Wotnětka je tež hornjoserbska wersija Lubiny Hajduk-Vjelikovićoweje a Dušana Hajduka-Veljkovića, wušła pod titulom „krabat a čorny mišter“ w jeju nakładnistwje Veles, na předań. Wčera staj ju přełožowarjej w kopaće połnej Smolerjec kniharni premjernje předstajiłoj. „Originalny roman je sej zeserbšćenje prosće zasłužił. Preußler spleće swoje figury na přewšo wuměłske wašnje, a sym horda, zo je so nam poradźiło, tomu wotpowědować“, Hajduk-Veljkovićowa zjima. Wosebje dźakowaše so w tym zwisku Rejzy Šěnowej a Boženje Braumanowej za lektorat kaž tež wuměłči Evje Gaeding za ilustracije a nic naposledk Załožbje za serbski lud za spěchowanje. Na prašenje z publikuma wona rozłoži, zo je přełožk w běhu dweju lět nastał, při čimž je so mjez druhim na čěsku wersiju „sadu po sadźe přirunujo“ złožiła.
Budyski Kamjentny dom je jutře, sobotu, z hosćićelom koncerta ...
Hotuja so na wjeršk pod hołym njebjom
Bórkowy (SN). „Wukšadnjony pókład abo kak jo kulka do Błotow pśišła“ – to je titul lětušich Błótowskich powěsćowych nocow, kotrež Serbski ludowy ansambl mjeztym 16. raz wuhotuje. Hudźbno-sceniski spektakl pod hołym njebjom wotměje so wospjet na Hrodźe (Schlossberg) při Bismarckowej wěži w Bórkowach, a to wot přichodneje soboty hač do swjatkowneje póndźele.
Originalny scenarij z pjera Choćebuskeje comic-wuměłče Siggiko je Werner Měškank do delnjoserbšćiny přełožił. Režiju wukonja Annika Nitsch a wuhotowanje ma Linda Siegismund na starosći. Nimo znatych serbskich melodijow zaklinča ekstra za inscenaciju spisane kompozicije Wolfganga Böhmera. Choreografije je baletna mišterka SLA Mia Facchinelli nadźěłała. Na jewišću skutkuja chór a balet kaž tež spěwni solisća SLA a hóstnaj hrajerjej Božena Bjaršec a Marvin George.
Wuměna w nakładnistwje wažna
Kuzłaja w swětle dnja
Němsko-Serbske ludowe dźiwadło hotuje so na 29. Budyske lětne dźiwadło. Premjera musicala „Alice im Wunderland“ wotměje so jutře za tydźeń. Dohromady chcedźa jón hač do 20. julija 35 króć pod hołym njebjom na Budyskim Hrodźe předstajić.
Budyšin (SN/bn). Zakład za hru twori klasikar fantastiskeje literatury Lewisa Carrolla, kotryž staj Janet Yates Vogt a Mark Friedmann w lěće 2015 za jewišćo wobdźěłałoj. Zastupjerjam medijow předstajichu titulnu rólu alternujo sćělesnjacej Julia Leinweder a Julia Klingnerec, Měrko Brankačk jako „Wrótny kłobukar“, István Kobjela jako „Pozdatna nopawa“ kaž tež Larissa Ruppert a Leoni Mann jako dwójnikaj „Dideldum“ a „Dideldei“ předwčerawšim wurězk z inscenacije. Prěni zaćišć: Přećeljo kóždolětneho spektakla měli na swoje kóšty přińć, znawcam kiwaja wospjet tójšto popkulturnych referencow a někotražkuli pokazka na dotalne lětne produkcije NSLDź.
Stawizny serbskeje drasty znazorniła
Chronika w kniharni dóšła
Akterojo serbskeho kreatiwneho hospodarstwa so zešli
Slepo (AK/SN). Serbska identita móže po mnohostronskich pućach nastać a so posrědkować. Za to trjebaja wuměłcy wobstajnu wuměnu. To wopokaza so wospjet minjenu sobotu we wobłuku 27. zetkanja syće TAKATAK w Slepom.
Drjeworězbar a hosćićel Thomas Schwarz je zetkanje zhromadnje ze Zwjazkom serbskich wuměłcow, z towarstwom Kreatiwna Łužica a z projektom strukturneje změny „regeneracija – reprodukcija – inowacija“ wuhotował. Něhdźe 20 zajimcow je so na nim wobdźěliło, mjez druhim Jan Lorenc z projekta „drasta digital“, tworjacy wuměłc Jörg Tausch a hudźbnik Jacke Schwarz.
