Folklornu galu w Budyskim NSLDź publikum zahorjeny přiwzał

Budyšin (SN/CoR/JaW). XIII. mjezynarodny folklorny festiwal „Łužica 2019“ su wčera w Budyšinje oficialnje zahajili. Hač do njedźele zwjesela nas nětko we Łužicy něhdźe 1 000 wobdźělnikow z dohromady 15 krajow ze zynkami, barbami a rytmami ludoweje hudźby z cyłeho swěta. Budyšenjo su hižo wčera prěni zaćišć dóstali, jako je nimale 400 čłonow folklornych ćělesow rejujo, hudźo a spěwajo wot Serbskeho domu po měsće ćahnyło a na Žitnych wikach woptančko swojich talentow dało, zaramikowane wot serbskeju hosćićelow festiwala, Smjerdźečanskeje rejwanskeje skupiny a Wudworskeho folklorneho ansambla. Ze zhromadnym teptanjom koła na spěw „Wjesele dźensa“ a z moderaciju Bena Bělka bě prezentacija prěni spodobny podawk.