Dešno (SN/CoR). Po třoch měsacach wobnowjenja su wčera nowu stajnu wustajeńcu w Dešnjanskim domizniskim muzeju zjawnosći přepodali. „Smy bohaći, smy serbscy. Mamy dwě kulturje. Tele začuće chcemy z nowej stajnej wustajeńcu hosćom našeho muzeja sobu na puć dać“, rjekny nawodnica muzeja Babette Zenkerowa w swojich witanskich słowach. Po załoženju muzeja před 35 lětami su wustajeńcu znowa wuhotowali. Zakładna struktura je wostała, zmóžnja pak wopytowarjam nowe perspektiwy a dohlady. Nowe su tirkisowe witriny, kotrež su wot Choćebuskeho Serbskeho muzeja přewzali.
„Smy zbožowni, zo dóstachmy wot ministerstwa za slědźenje, wědomosć a kulturu trěbne financne srědki, zo smy sej přetwar dowolić móhli“, Zenkerowa dale wuwjedźe, dźakujo so rjemjeslnikam kaž tež muzejowemu mustwu za kreatiwne sobudźěło. „Kóždy kitl, kóždu falu, kóžde rubiško drasty dyrbjachmy płokać, žehlić a figuriny znowa zhotować. Tydźenje dołho njejsmy so w běrowje pohibować móhli a njejsmy wjace wědźeli, do kotreho róžka móhli hišće něšto stajić.“
