Braniborska zahaji 2. wubědźowanje dobrych projektow

Podstupim (SN/CoR). Po lońšej wuspěšnej premjerje je nětko knježerstwowy społnomócnjeny za naležnosće Serbow w Braniborskej Tobias Dünow (SPD) znowa­ wubědźowanje „Serbski pśichod: Łužy­ca“ zahajił. „We wobłuku našeje stra­tegije za Łužicu nochcemy jenož wědomostne a slědźerske stejnišćo Łužicu wutwarić a kulturny region na juhowuchodźe kraja zesylnić, ale tež serbske kulturne namrěwstwo dale wuwić. Z krajnym wubědźowanjom ,Serbski pśichod: Łužyca‘ hódnoćimy a podpěrujemy dobre projekty a ideje ciwilnotowaršnostnych akterow na městnje. To je w času korony ćim wažniše. Serbska kultura, rěč a­ nałožki su dźěl našeho kulturneho herbstwa a k atraktiwiće re­giona wu­raznje přinošuja. Tele wusahowace bo­hatstwo chcemy sej dale wobchować“, podšmórny hakle kónc minjeneho lěta do zastojnstwa zwołany statny sekretar w braniborskim ministerstwje za wědomosć, slědźenje a kulturu.