Załožba za serbski lud spěchuje třoch serbsko-łužiskich wuměłcow
Miłoćicy (SN/MiR). Towarstwo Kamjenjak chce lětsa swoju mjeztym 15. mjezynarodnu wuměłsku dźěłarničku přewjesć. W tydźenjomaj wot 16. do 29. awgusta maja na ležownosći w Miłočanskej skale „Při Krabatowym kamjenju“ wuměłcy na swojich twórbach dźěłać.
Srjedu wječor su so předsydstwo a někotři čłonojo towarstwa na to dojednali, přeprosyć třoch serbskich resp. łužiskich wuměłcow. Su to Jörg Tausch ze Slepoho, Willi Selmer z delnjołužiskeho Łaza (Laasow) a Gabriel Čornak z Njebjelčic. Jich wobdźělenje je móžne dźakowano pjenježnej pomocy Załožby za serbski lud. Na dalšu přilubjenu podpěru nadźija so towarstwo ze stron Kulturneho ruma Hornja Łužica–Delnja-Šleska.
W cyłku je so 34 wuměłcow, pochadźacych mjez druhim ze Šwicarskeje, Italskeje, Armenskeje, USA, Ruskeje, Čěskeje, Pólskeje, Bołharskeje, Argentinskeje a Němskeje, wo přeprošenje prócowało. Napadnyło předsydstwu Kamjenjaka je, zo su wjacore požadanja na jara naročne wašnje zhotowjene byli. Dwaj wuměłcaj staj ćežow dla mjeztym zaso wotprajiłoj.
