Choćebuz (SN/CoR). Něhdźe pjatnaće zajim­cow je wčera dr. Tonijej Brukej, loni njejapcy zemrě­temu, wěnowane fil­mo­we popołdnjo do Choćebuskeho Serbskeho muzeja přiwabiło. W koope­raciji z telewiziju RBB pokazachu jeho film „Wenn Sprache stirbt – Die Kärntener Slowenen“, nastaty we wobłuku jeho dokumentaciskeho rjadu wo małych rěčach w Europje 2006. Pozadk zarjadowanja bě aktualna wustajeńca „WOBRAZY KRAJINY – PŘECHOD 03“. W přihotach třikrajoweho wuměłstwoweho projekta bě so tež Toni Bruk jako jedyn z dohromady 15 serbskich wuměłcow na wupisanju wobdźělił, a to z tymle filmom. Jury pak njeje so dokumentariskeho charaktera jeho přinoška dla za njeho rozsudźiła.