Jana Buka z mjezynarodnym kolokwijom wobswětlili a počesćili

Budyšin (SN/bn). Pod hesłom „Jan Buk – po puću k wuměłstwu“ wuhotowachu Budyski Serbski muzej, Institut wizuelnych wuměłstwow Uniwersity Zielona Góra a Maćica Serbska minjeny pjatk mjezynarodny wědomostny kolokwij, wobswětlacy najwšelakoriše aspekty žiwjenja a tworjenja drje najwuznamnišeho načasneho serbskeho molerja. W prěnim dźělu wěnowaše so pjeć fachowcow ze šěsć přednoškami mjez druhim estetice, tworićelskim wliwam a wuskej zwjazanosći Buka k Pólskej; druhi dźěl bě „kulojte blido“ z rowjenkami wuměłca.