Jubilejny Smochčanski hudźbny swjedźeń z parličkami kultury Rumunskeje
Smochćicy (SN/bn). Pod hesłom „Rumunskej nocy“ stej Serbski ludowy ansambl (SLA) a kubłanišćo swj. Bena minjeny pjatk a předwčerawšim 20. Smochčanski hudźbny swjedźeń wuhotowałoj. Jubilej bě intendantej SLA Tomasej Kreibichej-Nawce a jednaćelce kubłanišća Sibylle Richards po powitanju hosći z přičinu, „nanow swjedźenja“ na jewišćo prosyć. Bywši intendant SLA Wolfgang Rögner podšmórny, zo „njeby sej w lěće 2005 nichtó myslił, zo tak dołho předźeržimy“. Wjelelětny nawoda kubłanišća dr. Peter Straube pak wuzběhny podpěru tehdyšeho biskopa Joachima Reinelta, kiž je do dźensnišeho nic jenož hladajo na swjedźeń „aktiwna a pozbudźaca wosobina“, a sposrědkowa wšitkim sobuskutkowacym kaž tež wopytowarjam postrowy dušepastyrja na wuměnku.
