Radwor (SN/BŠe). Na slědy serbskich spisowaćelow su so přećeljo Smolerjec kniharnje minjeny pjatk w Radworju podali a zdobom jubilej a premjeru woswjećili. Towarstwo eksistuje mjeztym hižo 25 lět, a tuž chcychu čłonojo něšto wosebiteho iniciěrować. „W Serbach je wjele mytow, ale žane literarne“, předsyda towarstwa dr. Franc Šěn rozłoži. Tuž bě towarstwo přećelow Smolerjec kniharnje na swojej sobustawskej zhromadźiznje w januaru wobzamknyło, „Literarne myto Smolerja“ za najlěpšu słownu wuměłsku twórbu zańdźenych třoch lět wupisać. Z nim ma so šěrši zajim za serbskorěčne literarne tworjenje budźić a prestiž serbskeho wuměłskeho słowa zwyšić. Předsydstwo towarstwa jako jury wuzwoli za myto basnisku zběrku Sylwije Šěnoweje ­„Mosty přez morjo“, kotraž je w lěće 2023 w Ludowym nakładnistwje Domowina wušła. Smolerjowy dźeń skići najlěpšu składnosć, poetce z 1 000 eurami dotěrowane myto spožčić.