Diskusija na podiju w Slepom z prominentnej trójku Serbowkow

Slepo (SN/bn). „UM/BRUCH – Transformationsgesellschaft Ost 1989 – 1994“ je hesło rjadu zarjadowanjow, z kotrymž Towaršnosć za přeslědźenje stawiznow demokratije rozdźělne ćežišća doby přechoda po spadźe Berlinskeje murje wobswětluje. Po stacijach w Halle nad Solawu, Ryzawje (Riesa), Gießenje a na Hiddensee wuhotuje wot wčerawšeho we Łužicy dwudźělny „temowy dźeń“ pod hesłom „Serbska kultura“. Zazběh tworješe diskusija na podiju w Serbskim kul­turnym centrumje Slepo. Moderatorka Liane von Billerbeck postrowi snadnu horstku ani dźesać zajimcow, zamołwiwši so w mjenje zarjadowarja za zmylkaj w pozdźe rozesłanym přeprošenju, a předstaji rěčnicy wječora z próstwu skrótka rysować, što serbstwo za nich woznamjenja resp. wučinja. Filmowča Grit Lemcyna zwaži so jako prěnja na wotmołwu „drje najćešeho prašenja, wo kotrymž so sami wadźimy. Pochad hraje runje tak rólu kaž rěč a/abo pěstowanje nałožkow. Chwalu sej zakonsce zaručene prawo, so swobodnje k serbstwu wuznawać.