Budyšin (SN/MiR). Nawodnica Smolerjec kniharnje Annett Šołćic witaše wčera na wšě połsta wopytowarjow na prezentaciju wjace hač sto stronow wopřijaceje knihi a dwójneje CD „Juro Mětšk – Jewišćowa hudźba“, kotrež je Załožba za serbski lud loni wudała. Dr. Theresa Jacobsowa, moderatorka wječora, kotryž dlěje hač hodźince traješe, přewšo wušiknje a na zabawne wašnje na projekće wobdźělenych do rozmołwy wabješe. Tak zhonichu přitomni wot Paula Viebega, kiž je projekt wuwił a koordinował, zo je Ulrike Mětškowa trěbnosć za nahrawanje jewišćoweje hudźby jeje mandźelskeho zwurazniła. John Petrik, kiž je ze strony załožby produkciju nawjedował, připowědźi, zo ma so hudźba na streaming-kanalach wozjewić runje tak kaž na digitalnym poskitku Sorbian Music załožby sameje. Wuměłsce wot Ralfa Reimanna wuhotowana kniha přeswědči mjez druhim jewišćowych wobrazow a dalšich materialijow k inscenaciji dla, kotrež je Ulrike Mětškowa stworiła. Dr. Gerald Felber zbliža čitarjej na jara žiwe wašnje tworjenje serbskeho komponista.