Berlin (SN/MiP). Wóń horceho wóska je wopytowarjow Zastupnistwa swobodneho stata pola Zwjazka w Berlinje sobotu hižo na chódniku před zachodom witała. Knjez domu njedaloko Humboldtoweho foruma, Markus Franke, běše prěni raz wšitkich zajimowanych w stolicy Němskeje na serbske jutrowne wiki přeprosył a mnozy běchu přichwatali, mjez nimi tež někotryžkuli Berlinski Serb.

Wjele hosći je w rumnosći za dołhimi blidami sedźo z wulkej koncentraciju jutrowne jejka wóskowało. Na dohromady třoch dźěłarničkach móžachu sej wobdźělnicy kóždeje staroby pod nawodom serbskich fachowčow rjanu jutrownu debjenku stworić. Nimo toho běchu zamołwići Domowiny a Spěchowanskeho kruha za serbsku ludowu kulturu tež prezentaciskej blidźe zarjadowali, hdźež demonstrowaštej serbskej ludowej wuměłči Weronika Suchowa a Luisa Jurkec rozdźělne techniki wozdebjenja jejkow.