Mjeztym 13. zetkanje sakskich dźiwadłow wotměje so wot 21. hač do 26. apryla w zamołwitosći Gerharta-Hauptmannoweho dźiwadła Zhorjelc/Žitawa. Wo nadrobnosćach su wčera informowali.
Žitawa (SN/MkWj). Kóždej dwě lěće zetkawaja so sakske měšćanske, statne a krajne dźiwadła na zhromadnu přehladku wukonow, přeco na druhim městnje. Hłowny iniciator je sakska wotnožka Zwjazka dźiwadłow Němskeje. Lětsa zarjaduja wulke zetkanje dźiwadźelnikow a přihladowarjow w Zhorjelcu a Žitawje. Tole su zamołwići Zhorjelsko-Žitawskeho dźiwadła z intendantom dr. Danielom Morgenrothom na čole wčera zastupnikam medijow zdźělili. Na festiwalu wobdźěli so tež Budyske Němsko-Serbske ludowe dźiwadło.
Festiwalny program wopřija jědnaće „za wubědźowanje relewantnych“ dźiwadłowych inscenacijow za publikum kóždeje staroby. Mjez nimi su prapremjery, němskorěčna premjera, produkcije za młody publikum kaž tež přinoški swobodneje dźiwadłoweje sceny. Wobsahowje saha program wot klasikarjow swětoweje literatury přez načasnu dramatiku hač k eksperimentalnym twórbam.
