Tři filmy rjadu „Serbska utopija“, kiž su w nadawku rbb za magazin „Łužyca“ nastali, su internetnje přistupne. Nětko je tónle prěni delnjoserbski rjad wo serbskich wizijach za přichod kontrowersnu debatu nastorčił.

Choćebuz (SN/mb). Jako dr. Willi W. Barthold spočatk februara swój nowy job we wotrjedźe kulturne wědomosće Serbskeho instituta (SI) w Choćebuzu nastupi, knježeše wonkownje hišće měr w serbskej Delnjej Łužicy. Stawiznar dr. Pětš Šurman bě po 38 lětach na wuměnk šoł a literarny wědomostnik Barthold, absolwent Delnjoserbskeho gymnazija, kiž bě we Washingtonje promowował a při katedrje prof. Christiana Prunitscha za zapadosłowjansku literarnu a kulturnu wědomosć na Drježdźanskej uniwersiće dźěłał, jeho naslědowaše. Na třećim městnje dołheje lisćiny publikacijow młodeho wědomostnika steji nastawk „Serbska utopija? Entgrenzte Ruralität (wjesne wašnje, přisp. red.) und die Frage der ‚sorbischen Zukunft‘“. Loni bě jón Barthold w knize wozjewił, kotruž z dalšimi wědomostnikami, mjez druhim z prof. Prunitschom, wuda.