We wysokej starobje 97 lět je Zbigniew Kościów 13. měrca w Opolu zemrěł. Wón běše publicist, hudźbny wědomostnik a wučer na hudźbnej šuli w Opolu. Narodźił bě so 1929 w měsće Brody w dźensnišej Ukrainje. Po Druhej swětowej wójnje buchu Polacy do dźensnišeje Pólskeje přesydleni. Po dwutydźenskej odyseji docpě swójba nowu domiznu w dospołnje wuprózdnjenym měsće Opole. Zbigniewoweho nana bě sowjetska tajna słužba NKWD spočatk wójny zatřěliła.
Styki do Serbow nawjaza jako młody muž w zažnych 1960tych lětach, při čimž tež spěšnje serbsce nawukny. Sylny zaćišć zawostaji w nim zetkanje z Michałom Nawku a serbske kulturne prócowanje. Wón nawjaza kontakty ze serbskimi komponistami, mjez druhim z Janom Rawpom, a so wo předstajenje jich twórbow w Pólskej staraše. Jura Mětška podpěrowaše z hudźbnej literaturu a notami, kotrež w Němskej demokratiskej republice přistupne njeběchu.
