Jubilejny swětowy dźeń šulerskeho dźiwadła w Budyšinje so wotměł

Budyšin (SN/bn). Z artistisko-rejowanskej prezentaciju „Pětr a wjelk“ Sportoweho towarstwa Kubšicy je so wčera 25. swětowy dźeń šulerskeho dźiwadła w Budyšinje zahajił. Wjace hač 600 sobuskutkowacych předstaji na dwanaće jewišćach po wšěm měsće dohromady 31 programow. Na hłownym jewišću Němsko-Serbskeho ludoweho dźiwadła, kotrež je zarjadowanje wospjet wuhotowało, wustupi na přikład spěwna skupina Brěznjanskeje zakładneje šule „Sophie Scholl“ z inscenaciju „Josefine, die Weihnachtsgans“. W awli Powołanskošulskeho centruma Budyšin přestaji dźiwadłowa skupina wyšeje šule Rödertal z Wulkich Rědorjec musical „Die Brück‘ am Tay“ a w Kamjentnym domje pokaza dźěćaca skupina Sebničanskeho towarstwa Theatre Libre ludowu bajku „Der gestiefelte Kater“.