Juliana Kaulfürstowa zhladuje na 16 intensiwnych lět w Slepom

Cyłkownje 16 lět je so Juliana Kaulfürstowa za serbsku rěč, kulturu a hajenje tradicijow w Slepjanskej wosadźe angažowała. Předewšěm Njepilic statok w Rownom a Hanza Šusterowy statok w Trjebinje jej na wutrobje ležitej. W běhu wjacorych lět je wona swědomiće dopomnjenki serbskich drastynošerkow zběrała. Čestnohamtsce angažuje so Juliana Kaulfürstowa dźensa w towarstwje Njepilic statok w Rownom kaž tež w Slepjanskim towarstwje Kólesko. Wo wažnych měznikach jeje skutkowanja a wo jeje přichodźe je so Andreas Kirschke ze 46lětnej slawistku rozmołwjał.

Njedawno sće na swoje poslednje pućowanje jako rěčna motiwatorka w Slepom přeprosyła. Dokal sće pućowali?

Dźěše něhdźe dwanaće kilometrow wot Slepoho podłu železniskeje čary do Grodka. Mjez 25 wobdźělnikami běchu samo ludźo z Choćebuza, Budyšina a Drježdźan. Po puću powědach jim lóštnej serbskej anekdoće. Zdobom mějach serbsku hru ze słowami přihotowanu. Zhromadnje zaspěwachmy Handrija Zejlerjowu pěseń „Što radosć rjeńšu dawa“.