Serbski program na 38. filmowym swjedźenju w Drježdźanach

Drježdźany (SN/lmc). Na program „Wiźeś. Sichtbar. Widźomne“ je Filmowy zwjazk Sakska zhromadnje ze serbsko-němskej filmowej syću Łužycafilm wčera popołdnju we wobłuku 38. filmoweho swjedźenja w Drježdźanach do Ligneroweho hroda přeprosył. Zarjadowanje wěnowaše so filmowym projektam ze serbskeje Łužicy a předstaji šěroki spektrum filmowych formatow.

Zazběh programa tworješe hudźbne widejo „Toś ta lubosć“ filmowče Katje Hrjehorjec. Prěni raz zaklinča na festiwalu spěw w delnjoserbskej rěči. W jeho centrumje njesteji klasiska lubosćinska, ale swójbna stawizna a wosebje sotrowstwo. Wuchadźišćo bě spěw spěwotwórca Jakuba Čornaka, ke kotremuž wuwi Katja Hrjehorjec cyle swójsku wizuelnu interpretaciju. „Sym kóždy dźeń serbska, ale njechodźu kóždy dźeń w narodnej drasće“, wona praji a wuzběhny z tym wotpohlad, serbski wšědny dźeń zwonka folkloristiskich klišejow pokazać.