Budyšin (SN/bn). „Spuk von draußen oder Karaseks Schatz“ rěka lětuša inscenacija Němsko-Serbskeho ludoweho dźiwadła, kotruž wot 18. junija pod hołym njebjom na dworje Budyskeho hrodu pokazaja. Kruch po motiwach telewizijneje serije Clausa Ulricha Wiesnera a Güntera Meyera, za jewišćo wot intendanta NSLDź a režisera Lutza Hillmanna wobdźěłany, nawjazuje na před lětomaj předstajenu produkciju „Spuk unterm Riesenrad – Jetzt ist Bautzen dran“. Zdobom je to „echo spočatka Budyskeho lěćneho dźiwadła, kotrež dźě bu před 30 lětami z dyrdomdejom rubježnika Johannesa Karaseka zahajene“, Hillmann we wobłuku wčerawšeje nowinarskeje rozmołwy rozłoži. Publikumej přilubi „chwalospěw a hommage na Hornju Łužicu“, kiž wopřijima tójšto lokalneho kolorita, pokazki na dotalne inscenacije lěćneho dźiwadła kaž tež na towaršnostne zjawy a po dlěšej přestawce tež zaso live-hudźbu. Nimo nimale cyłeho hrajerskeho ansambla NSLDź wustupi kopica komparsow na „najnaročnišo wuhotowanym jewišću, kotrež smy dotal měli“, intendant podšmórny. Hač do 27. julija je cyłkownje 35 předstajenjow planowanych.