W Čornochołmčanskim Krabatowym młynje wotmě so zawčerawšim dalekubłanje we wobłuku kultury. Přeprosyłoj běštej Dompro (Domowina Delnja Łužica projekt tzwr) a Syć za serbsku rěč a regionalnu identitu Zari. Něhdźe 60 čestno- abo hłownohamtsce skutkowacych kulturnikow z Delnjeje a Hornjeje Łužicy so na tym wobdźěli.

Čorny Chołmc (SN). Zahajejo dalekubłanje wodźeše jednaćel Krabatoweho młyna Anton Fuchs wobdźělnikow po młynje a rozprawješe wo nastaću terena, zarjadowanjach a dalšich zajimawostkach. Tomu sćěhowaše rjad přednoškow. Sobudźěłaćer Dompro Michael Apel přednošowaše wo organizowanju zarjadowanjow. Mjez druhim dźěše wo to, što ma so při planowanju zarjadowanja wobkedźbować a wosebje, kotre dowolnosće su za to trěbne. Wón přitomnym tež rozkładźe, hdźe formulary namakaja a kotre zawěsćenja su wažne.