Šule dale a bóle wohrožene?
Erfurt (dpa/SN). Na třoch šulach w stolicy Durinskeje Erfurće su dźensa rano hroženja dóšli. Kaž rěčnica policije na naprašowanje powěsćernje dpa zdźěli, jedna so wo hroženja z namocu. Powěsće su so na wotpowědnych šulach w Erfurće k wšelakim časam čitali, praji rěčnica. Tak su zamołwići jednu šulu hišće do zahajenja wučby zawrěli, na tamnej dyrbjachu hortowe dźěći ewakuować. Na dalšej šuli je policija dopołdnja wěstotne naprawy zahajiła.
Nimo toho su dźensa we Weimarskim wusyłanskim centrje „anteny Durinskeje“, „Krajneje žołmy Durinska“ a „Radio Top40“ hroženja dóšli. Tež kubłanišćo w bayerskim Bayreuthu dyrbjachu šulerjo tajkich wohroženjow dla wopušćić.
Wčera su hroženja přećiwo wjacorym šulam po cyłym Zwjazku zasadźenja policije zawinowali. Potrjechene běchu mjez druhim šule w Erfurće, Augsburgu, Regensburgu, Karlsruhe, Mannheimje, Solingenje, Wuppertalu a Kamjenicy.
Wolerjo maja alternatiwu
Sahra Wagenknecht a jeje přiwisnicy wulki njeměr zbudźili
Berlin (dpa/SN). Dotal najprominentniša politikarka Lěwicy, Sahra Wagenknecht, je wčera z wjacorymi sobuwojowarjemi w Berlinje wustupjenje z Lěwicy wozjewiła a plany za załoženje noweje strony prezentowała. Na nowinarskej konferency předpołožichu Wagenknecht a jeje podpěraćeljo papjeru z wobsahowymi pozicijemi. Tak woni swoje zaměry hladajo na hospodarsku, socialnu, wonkownu, migracisku a towaršnostnu politiku njedawno załoženeho towarstwa „Zwjazk Sahra Wagenknecht“ wuswětlichu. Towarstwo ma załoženje strony přihotować. Stronu chcedźa akterojo w januarje załožić.
Nowa strona ma k europskim wólbam klětu w juniju nastupić. Tež při wólbach krajnych sejmow w Sakskej, Durinskej a Braniborskej klětu prócuja so kandidatow nańć, Wagenknecht wujasni. W třoch mjenowanych zwjazkowych krajach ma AfD wjele přiwisnikow. Nowa strona móhła konkurenca być. Znajmjeńša maja wólbokmani nětko dobru alternatiwu.
Nowa konkurentka
Debjenki sćazali
Madrid (dpa/SN). Španiska policija je w zhromadnym dźěle z ukrainskimi zarjadami antiksku debjenku z Ukrainy sćazała. Fachowcy cyłkownu hódnotu na 60 milionow eurow trochuja. Třoch Španičanow a dweju Ukrainjanow, mjez nimi měšnik jedneje prawosławneje cyrkwje kraja, su zastojnicy zajeli, policija wčera zdźěli. Cyłkownje jědnaće debjenkow je policija zawěsćiła. Při tym jedna so mjez druhim wo wudebjeny złoty pas z časa baroka, wuměłsce dźěłana hrudźna debjenka a z drohotnymi kamjenjemi wuhotowane rjećazy. Debjenki běchu posledni raz mjez lětom 2009 a 2013 w ukrainskej stolicy Kijewje wustajane. Do meje lěta 2016 su je njeznaći potom ilegalnje do wukraja dowjezli. Nětko zajeći prawdźepodobnje bandźe přisłušeja, kotraž chcyše drohoćinki předawać, rěka w policajskej rozprawje. Zajaty měšnik je z pomocu krajana a druhich wosobow dokumenty sfalšował. Tak wón na dokumentach wopisa, zo su debjenki swójstwo prawosławneje cyrkwje. Wo kotru z wšelakich ukrainskich prawosławnych cyrkwjow so jedna, policija zdźěliła njeje.
To a tamne (24.10.23)
Njewšědny podawk sta so w delnjosakskim Tangendorfje, jako 13 ćěkancow njewočakowano při durjach chěže młodeje maćerje steješe. Kaž tamniša nowina „Winsener Anzeiger“ nětko rozprawja, běchu sobudźěłaćerjo wokrjesneho zarjada puć do přebywanišća za ćěkancow wopak wopisali. Tuž zaklinkachu 13 muži pola Natalie L., kotraž běše runje z dźěćkom zaběrana. Dokelž je na to wulki njeměr před durjemi młodeje maćerje nastał dyrbješe policije situaciju rozrisać.
Pony je w Zhorjelskim wokrjesu po pinčnych schodach dele padnył. Wohnjowa wobora dyrbješe zwěrjo wuswobodźić. Wohnjowi wobornicy z Hainewalde a Wulkeho Šunowa trjebachu za to dwě hodźinje. Hač je so pony zranił, njemóžeše rěčnik wuchowanskeje straže rjec.
Přećiwo namocy
Jerusalem/Genf (B/SN) Křesćanske cyrkwje w Jerusalemje su sej zakónčenje wojowanja mjez Palestinjanami a Israelčanami žadali. „Nadźijamy so a nutrnje so modlimy, zo sej namołwu k hnydomnemu skónčenju namocy wšitke wobdźělene strony k wutrobje bjeru“, rěka we wozjewjenju Ekumeniskeje rady cyrkwjow (ÖRK). W njej zasudźuja jednanja, kotrež so přećiwo ciwilistam měrja, njehladajo na přisłušnosć k narodnosći, etniskemu pochadej abo wěrje.
Klóšter wostanje wočinjeny
Köln/Jerusalem (B/SN). „Wostanjemy tu, tež hdyž so nadpady Hamas na Israel kopja. Klóšter ma oaza měra być“, praji němski abt Schnabel internetnemu portalej domradio.de. Wón chce so z křesćanami solidarizować, kotřiž njemóža sej nihdźe druhdźe wućeknyć. Tohodla so tam stajnje wjace ludźi přidruža.
Najmócniša žona
Swoje měnjenje zakitować
Frankfurt nad Mohanom (dpa/SN). Spisowaćel Salman Rushdie je měrowe myto němskeho knihikupstwa dóstał. Na wuznamjenjenskim zarjadowanju wón wčera namołwja, zo měli ludźo swobodu měnjenja bjezwuwzaćnje zakitować. W swojej dźaknej narěči w Frankfurtskej Pawołskej cyrkwi wón zwurazni, zo njeby ženje z tym ličił, zo budźe hladajo na tuchwilne krizy čas dožiwić, hdźež to hižo samozrozumliwe njebudźe.
Wagenknecht stronu załoži
Berlin (dpa/SN). Politikarka Sahra Wagenknecht wopušći Lěwicu a załoži swójsku stronu, wona dźensa w Berlinje wozjewi. Towarstwo „Zwjazkarstwo Sahra Wagenknecht – za rozum a sprawnosć“ bu hižo załožene, zo by nowu stronu přihotowało. Kaž w pisomnym wozjewjenju dale rěka, knježerstwo hižo měnjenjam a přećam wjetšiny wobydlerjow njewotpowěduje. Po wuslědkach Insa-naprašowanja nowiny „Bild am Sonntag“ móže sej 27 procentow woprašowanych předstajić, stronu Wagenknecht wolić.
Přećiwo žadanjam EU
Znowa su po rozprawach medijow nakładne awta z pomocnymi tworami ...
Kretschmer „šćuwańcu“ wuskutkował?
Drježdźany/Budyšin (dpa/SN). Sakska SPD wuprajenja sakskeho ministerskeho prezidenta Michaela Kretschmera (CDU) ke kwaliće kubłanja w swobodnym staće njewšědnje wótrje kritizuje. Po słowach kubłanskeje fachowče SPD Sabine Friedel bě wona minjeny pjatk zatrašena. Kretschmer bě zašły štwórtk na diskusiji w Budyskim Schillerowym gymnaziju a tam wujasni, zo „njemóžemy kwalitu kubłanja hižo zaručić, dokelž dyrbimy šulerjow wuwučować, kotřiž z wukraja přińdu“. Friedel ma słowa Kretschmera za zahubne a měni, zo dyrbjeli zamołwitosć přewzać město winu na druhich sunyć.
„Njemóžemy kwalitu kubłanja hižo zaručić, dokelž njeje so do sakskeho kubłanskeho systema lětdźesatki inwestowało. W šulach wučerjo pobrachuja, dokelž njejsu tam před pjatnaće lětami wučerjow přistajili“, argumentowaše zapósłanča sakskeho krajneho sejma. Kóžda žołma infekcijow abo wjace porodow a wězo tež přiwzaće ćěkanych dźěći a młodostnych na šulach wupad hodźinow wuskutkuje, wšako njeje dosć kubłanskeho personala k dispoziciji.
Kandidat starosće zawinuje
Radebeul (SN). Klětu wola wobydlerjo Sakskeje nowy krajny sejm a strony so hižo na to přihotuja. Tak nominuja tuchwilu we wotpowědnych wólbnych wokrjesach swojich direktnych kandidatow. We wólbnym wokrjesu 39 (Radebeul, Coswig, Moritzburg) pak personalija wulke zadźiwanje a starosće wubudźi. W minjenych 33 lětach bě prezident krajneho sejma Matthias Rößler wólbny wokrjes stajnje jasnje za CDU dobył. Tola 68lětny hižo njenastupi. Jako naslědnik bě so sčasom Radebeulčan dr. Sven Eppinger (54) přizjewił. Jeho přećiwny kandidat běše politikar CDU Hans-Jürgen Rosch. Tola tón njeměješe minjeny štwórtk žanu šansu přećiwo Eppingerej.
Nětko wuzwoleny kandidat Eppinger pak je zdobom šef prawicarsko-konserwatiwneje unije hódnotow (Heimat-Union). Zjednoćenstwo stajnje zaso CDU kritizuje. Eppinger bě hakle w septembru na stronskim zarjadowanju w Riesy ministerskeho prezidenta Kretschmera wosobinsce namołwjał, Zelenych z knježerstwa ćisnyć a mjeńšinowe knježerstwo wutworić.
