Wjele pjenjez za podruž
Wiesbaden (dpa/SN). W milionach domjacnosćow Němskeje dyrbja nadpřerěznje wulki podźěl dochodow za podruž bydlenja nałožować. Znajmjeńša 40 procentow zasłužby wudawaja w 3,1 milionje domjacnosćow za podruž, je Zwjazkowy statistiski zarjad za lěto 2022 wuličił. Tak słušeja po informacijach Wiesbadenskeho zarjada 16 procentow wšěch podružnych domjacnosćow do tuteje skupiny. Přerězne poćežowanje přez podruž wučinja po wšej Němskej nimale 28 procentow.
Turkowska hłosuje za Finsku
Istanbul (dpa/SN). Turkowska je jako posledni čłonski kraj NATO přiwzaću Finskeje do zwjazka přihłosowała. Wulka wjetšina turkowskeho parlamenta je wčera wječor přiwzaće sewjerneho europskeho kraja do zapadneho zakitowanskeho zwjazka schwaliła. Tak su wšitcy 30 čłonojo NAT0 čłonstwo Finskeje wotžohnowali. Turkowska pak přiwzaće Šwedskeje dale blokuje, tež ratifikowanje Madźarskeje hišće pobrachuje.
Bamžej dźe so zaso lěpje
Najebać to, zo je so nalěćo hakle započało, bědźa so ludźo w ...
Trump dyrbi před sudnistwo
Za tiket hłosowali
Charles a Camilla w Hamburgu
Knježerstwo pomha potrěbnym
Braniborska přewostaja taflam pomoc – młodźinske kluby wohrožene
Podstupim (dpa/SN). Braniborske krajne knježerstwo podpěruje dale dźěło taflow w kraju a přewostaji jim lětsa poł miliona eurow. Tak chcedźa rozdźělernje žiwidłow w časach energijoweje krizy a přiběraceho nawala pomocy potrěbnych podpěrować, rjekny socialna ministerka Ursula Nonnemacher (Zeleni) wčera nowinarjam. Nimo toho maja potrěbni składnosć, wo hnydomnu statnu pomoc prosyć, zo njebychu jim měšćanske zawody njepłaćenych zličbowankow dla milinu a płun zawjertnyli. „W tutych wosebje ćežkich časach wjacorych krizow dla je dźěło taflow nimo statneje socialneje pomocy nimoměry wažne“, ministerka rozłoži. „Jako poskićowarjo dobrowólneje pomocy w ciwilnej towaršnosći nimaja tafle bjez institucionelneje pomocy žanu móžnosć, w tutym napjatym połoženju pomhać, bjez toho zo bychu poskitk na dobro potrěbnych wosobow a swójbow redukowali.“ Tohodla chce krajne knježerstwo kóždej z 43 taflow a druhim pomocnym organizacijam z podobnym poskitkom hnydomnu pomoc hač do 10 000 eurow přewostajić.
To a tamne (31.03.23)
Najebać to, zo njeměješe žona w Čěskej kwalifikaciju za powołanje, je wosom lět jako nawodnica zakładneje šule dźěłała. Při požadanju bě wona wopačne certifikaty předpołožiła, zdźěli wčera rěčnica policije. Starši šulerjow kubłanišća w Libcice na Vltavou mějachu podhlad, zo žona kmanosće za nawjedowacu funkciju nima a so na zarjady wobroćichu. Po přepruwowanju bě jasne, zo njeje žona nihdy na Karlowej uniwersiće w Praze studowała. Nětko hroža jej wosom lět jastwa, dokelž je wona wopisma sfalšowała.
Po oficialnym ličenju je w Słowakskej něhdźe 1 200 mjedwjedźow zadomjenych. Stajnje zaso ludźo w přirodźe mjedwjedźa zetkaja, štož móže fatalny wukónc měć. Hakle wčera policija zdźěli, zo je 180 kilogramow ćežke zwěrjo lěsneho dźěłaćerja w gmejnje Nedožery-Brezany nadpadnyło.
Unija wumjetuje Scholzej
Berlin (dpa/SN). Fachowc unije za nutřkowne naležnosće Alexander Throm (CDU) je kanclerej Olafej Scholzej (SPD) hladajo na problemy komunow při zaměstnjenju migrantow wumjetował, zo ničo nječini. „Wot kanclera njejsmy přeco hišće žane słowo nastupajo migracisku krizu słyšeli, pola CDU/CSU je tole dawno šefowa naležnosć“ rjekny nutřkopolitiski rěčnik frakcije CDU/CSU w zwjazkowym sejmje powěsćerni dpa. Na komunalnym wjeršku frakcije chcychu dźensa popołdnju tutón tema wobjednawać.
Bamž Franciskus w chorowni
Rom (dpa/SN). Po zapokazanju do chorownje w Romje měješe bamž Franciskus tam po informacijach powěsćernje Ansa „měrnu nóc“. Agentura cituje žórła polikliniki Gemelli, po kotrychž je mediciniski personal optimistiski, zo budźe bamž hižo za něšto dnjow k bołmončce zaso we Vatikanje. 86lětneho běchu wčera z infekciju dychadła do chorownje dowjezli. Tam dyrbi drje „něšto dnjow“ wostać, rěčnik zdźěli. Dalše lěkarske nadrobnosće najprjedy raz njewozjewichu.
Lěkarjo chorownjow stawkowali
