To a tamne (13.03.23)
We wjacorych kinach w Němskej a druhich krajach je minjene dny k wukročenjam dóšło. W běhu předstajenja filma „Creed III“ młodostni w kinje stawachu, po sedłach krosnowachu, z popcornom mjetachu a napoje rozkidachu. Na syći TikTok su wideja tajkich mylenskich akcijow wulku kedźbnosć wuwabili. Policija w Essenje je pokazki na wubědźowanje namakała. Při tym čuja so akterojo k tomu pohnući, sej ze swojimi akcijemi přetorhnjenje kinowych předstajenjow wunuzować a tak kedźbnosć pola TikTok dóstać.
Na swójskim kwasnym dnju měješe njewjesta w Oberfrankenje njedawno hubjenu naladu. Najprjedy je 32lětna z frizerskeho wobchoda ćeknyła, bjeztoho zo je cyłkownu sumu za swoju njewjesćinsku frizuru zapłaćiła. Po tym je wona do awta frizerki zajěła. Hač da so žona na wonym dnju přiwšěm hišće zwěrować, njemóžeše rěčnik policije rjec.
Syć za e-awta natwarić
Stuttgart (dpa/SN). Awtotwarc Mercedes-Benz je swoje plany k syći za nabiwanje elektroawtow konkretizował. W Němskej a Francoskej chcedźa lětsa prěnje stołpy za spěšne nabiwanje twarić, rozłoži šef předsydstwa Mercedes-Benz Mobility Franz Reiner nětko w Stuttgarće. Nastać ma wobšěrna syć. Kupcy e-awtow předewzaća maja z toho profitować, dokelž móža sej wotpowědne stołpy rezerwować.
Wšitcy dyrbja energiju lutować
Brüssel (dpa/SN). Europska unija dyrbi hač do lěta 2030 znajmjeńša 11,7 procentow mjenje energije přetrjebać. Na to dojednachu so zastupjerjo europskeho parlamenta krajow EU dźensa rano w Brüsselu. Zakład za to tworja ličby z lěta 2020. Kóždy kraj EU ma tomu přinošować. Na zakładźe formule chcedźa narodne přinoški wuličić. Kraje maja je po móžnosći dodźeržeć. Jenož hač do 2,5 procentow smědźa wot přinoška wotchileć.
Žadaja sej jednoriše postajenja
Wočakuja znowa wjele ćěkancow
Přetwar tepjenjow spěchować
Hospodarski minister Habeck planuje wobšěrny pomocny program
Berlin (dpa/SN). Za raznje diskutowany poněčimny přetwar tepjenjow na klimje přichilene připrawy přilubja zwjazkowy minister za hospodarstwo a škit klimy Robert Habeck miliardy eurow wopřijacy spěchowanski program. Pomoc měła so na dochodach ludźi orientować, je ministerstwo Habecka wčera w Berlinje připowědźiło. „Nichtó njepoběži do pincy, zo by tepjenje zwutorhał“, rjekny politikar Zelenych hladajo na tuchwilu hišće wjele wužiwane płunowe a wolijowe tepjenja. Předwidźane su tuž „mnoholičbne wuwzaća, přechodne rozrisanja a časowe předpisy“, rěka w dokumenće z titulom „Derjeměće klimoneutralnje wobnowić“, kotryž Habeck w tym zwisku w Berlinje předstaji.
Mortwi po amokowym běhu
W Brüsselu so na Němsku mjerzaja
Šansa młodźinje
Drježdźany (dpa/SN). Softwarowy koncern SAP je campus w Drježdźanskim nutřkownym měsće wotewrěł. Nowy kompleks z běrowami na Póstowym naměsće skića městno za 400 sobudźěłaćerjow, zdźěli koncern wčera w Drježdźanach. Předewzaće SAP chce z campusom kapacity za wuwiće zesylnić. „Wjeselimy so, zo Drježdźanske wědomostne a inowaciske stejnišćo dale rosće a zo so zhromadne dźěło z lokalnymi a regionalnymi partnerami zesylnja“, wuzběhny šef techniskeho wobłuka pola SAP Jürgen Müller. SAP chce na městnje regionalnu syć wutworić. „Nimo wurjadnych slědźenjow na Techniskej uniwersiće a dalšich zaměstnjenych institucijow je w měsće tež hišće lokalnych iniciatiwow a techniskich centrumow“, koncern w zdźělence rozkładźe. Zhromadne dźěło z lokalnymi akterami ma so wutwarić.
Sakski ministerski prezident Michael Kretschmer (CDU) podšmórny, zo je so koncern SAP w mjezynarodnym wubědźowanju za stejnišćo w Drježdźanach rozsudźił. „SAP zhladuje na jónkrótne wuwiće. Hižo lětdźesatki to wobkedźbujemy“, Kretschmer rozkładźe. Za młodostnych w regionje je campus wulka šansa.
To a tamne (10.03.23)
Płunowód porjedźić
Drježdźany (dpa/SN). Sakski ministerski prezident Michael Kretschmer (CDU) podpěruje plany energijoweho předewzaća EON, zničeny płunowód Nord Stream 1 w Baltiskim morju reparować. „Wězo je wažne, pozadki zničenja wotkryć a skućićelow pochłostać“, rjekny politikar CDU wčera w Drježdźanach. Runje tak wažne pak je, dalšemu wobškodźenju płunowoda přez mórsku wodu zadźěwać, wón doda. Po dotalnych dopóznaćach je pječa skupina Ukrainjanow płunowód kónc septembra rozbuchnyła.
CDU a SPD jednatej w Berlinje
Berlin (dpa/SN). Dobre tři tydźenje po wospjetowanych wólbach w Berlinje stej wólbny dobyćer CDU a SPD dźensa jednanja wo zhromadnej knježerstwowej koaliciji zahajiłoj. Spočatnje chcychu so wuzwoleni fachowcy wobeju stron wo zasadnych prašenjach dojednać. Wot spočatk tydźenja chcedźa w cyłkownych 13 dźěłowych skupinach prawidłownje wuradźować. Młodźinska organizacija SPD je so hišće raz doraznje přećiwo koaliciskim jednanjam z CDU wuprajiła.
Planowany zakoń cofnjeny
