Konferenca UNO pitneje wody dla
New York (dpa/SN). Tři dny trajacu konferencu UNO po wšěm swěće pobrachowaceje pitneje wody dla su dźensa w New Yorku zahajili. Na zetkanju wočakowachu něhdźe 6 500 wobdźělnikow, mjez nimi knježerstwowych šefow, ministrow a zastupnikow hospodarstwa a ciwilneje towaršnosće. Wjeršk ma po woli swětoweje organizacije směrnicy a program dalšeho skutkowanja zdźěłać. Dotal žadyn mjezynarodny program nastupajo pitnu wodu njeeksistuje. Tež UNO žanu organizaciju nima, kiž by so wo to starała.
Problem swět wopřijaceje pobrachowaceje pitneje wody so po přeswědčenju UNO přichodny čas dale přiwótři. Je to sćěh přiběracych wobswětowych a hospodarskich problemow w zwisku z přiběracym zanjerodźenjom wody, rěka w rozprawje UNO. Hižo nětko bydli dźesać procentow swětoweho wobydlerstwa w krajach z wulkim abo jara wulkim strachom zastaranja z pitnej wodu. Dotalne wuspěchi na dobro zachowanja pitneje wody ma UNO za njedosahace, wšako problemy přichodnje dale přiběraja.
Zajim za Braniborsku snadny
Wukrajni fachowcy z „módrej kartu“ měrja so na zapadne zwjazkowe kraje
Podstupim (dpa/SN). Z tak mjenowanej „módrej kartu“ chcedźa derje kwalifikowanych fachowcow zwonka krajow Europskeje unije jednorišo do Němskeje nawabić. Naprašowanje za tutym srědkom je pak w zwjazkowych krajach rozdźělne.
Wot awgusta 2012 ma módra karta připućowanje fachowcow z wukraja wolóžić – dobre dźesać lět pozdźišo je nawal fachowcow do Braniborskeje skerje přewidny. Prěnje połlěto 2022 su 193 fachowcam z krajow zwonka EU w Braniborskej časowje wobmjezowanu dźěłowu dowolnosć přizwolili. To bě 76 wjace hač samsny čas 2021, zwjazkowy zarjad za migraciju a ćěkancow zdźěli.
Přikład módreje karty bě tak mjenowana greencard za wukrajnych fachowcow w USA. Wuměnjenja tajkeho přizwolenja móžneho dźěła w Němskej su wysokošulski studij, dźěłowe zrěčenje abo kruty dźěłowy poskitk z jasnymi wuhladami na měsačnu zasłužbu.
Młodych ludźi zahorić
Wobjed darmo
To a tamne (22.03.23)
Sudnicy postajenja změnili
Luxemburg (dpa/SN). Europske sudnistwo zmjechči postajenja za skóržby kupcow dieselowych awtow nastupajo zarunanje, su-li předewzaća njedowolenu techniku za wotpłun zatwarili. Awtowe koncerny maja tež potom zamołwitosć přewzać, jelizo njejsu wotpohladnje jednali, ale njekedźbliwje. To rozsudźichu dźensa sudnicy w padźe Mercedesa. Što to za němske prawo woznamjenja, hišće jasne njeje.
Wutwar derje postupuje
Bonn/Wolmirstedt (dpa/SN). Prezident zwjazkoweje syćoweje agentury Klaus Müller je dźensa wozjewił, zo wutwar milinowych syćow derje postupuje. Hač do kónca lěta 2024 maja so twarske dowolnosće za wjace hač 2 000 kilometrow wodow wotžohnować. K najwažnišim projektam słuša 540 kilometrow dołha trasa, kotraž ma sewjer z juhom zwjazać. Dźensa su we Wolmirstedće blisko Magdeburga prěni zaryw za připrawu zwoprawdźili, kotryž ma měnjaty prud do jednosměrneho pruda přeměnić, štož hodźi so spěšnišo po syćach transportować.
Lěkarjo stawkowali
Po schwalenju husto diskutowaneje rentoweje reformy je minjenu nóc w ...
„Swójske zajimy zastupował“
Lipsk (dpa/SN). Tež Lipšćanska skupina SPD Lipsk-wuchod/sewjerowuchod je znapřećiwjenje přećiwo wobzamknjenju stronskeje změrcowskeje komisije zapodała, po kotrymž smě bywši zwjazkowy kancler Gerhard Schröder najebać swoje wuske zwiski k Ruskej w stronje wostać. „Zaměr měł być, zmylki strony nastupajo politiku z Ruskej přepruwować. Schröder ma zamołwitosć za swoje zadźerženje přewzać“, zdźěli zastupowacy předsyda Lars Klaus Aßhauer na naprašowanje. Wón wumjetuje kanclerej, zo je so za čas swojeho zastojnstwa za swójske financielne zajimy zasadźił. Z tym je wón SPD a Němskej bytostnje škodźał.
Lipšćanska skupina přizamknje so wobsahowje skupinje SPD badensko-württembergskeho Leutenbacha, kotraž bě spočatk měrca připowědźiła, znapřećiwjenje zapodać. Spočatk měrca bě změrcowska komisija wobwoda SPD Hannover wšitke próstwy wo sankcije strony přećiwo Schröderej wotpokazała.
Dalše rozmołwy Putina a Xi Jinpinga
Moskwa (dpa/SN). Ruski prezident Wladimir Putin a chinski statny a stronski šef Xi Jinping staj dźensa z rozmołwami w Moskwje pokročowałoj. Po wčerawšim zahajenju z wosobinskej rozmołwu wobeju politikarjow wo wójnje w Ukrainje, kotraž traješe dlěje hač štyri hodźiny, steja dźensa jednanja knježerstwoweju delegacijow w srjedźišću. Při tym dźěše předewšěm wo hospodarsku kooperaciju.
Po informacijach Krjemla chcychu dwě zrěčeni wo „wšo wopřijacym partnerstwje“ a „strategiskim zhromadnym dźěle“ podpisać. Na wuradźowanjach wobdźěli so tež ruski minister za zakitowanje Sergej Šojgu. Kaž Krjeml zdźěla, stejachu tež prašenja wojersko-techniskeho zhromadneho dźěła na programje. Na zapadźe so boja, zo móhła China Ruskej brónje za nadpadowu wójnu přećiwo Ukrainje dodawać.
Putinej je wopyt chinskeho hosća dobra składnosć, swětej pokazać, zo njeje mjezynarodnje izolowany. China njeje wójnu Ruskeje přećiwo Ukrainje dotal zasudźiła a chce měrowe jednanja.
Zakoń tež za serbske mjena
Jednaćelka Domowiny wita zakonske plany zwjazkoweho knježerstwa
Drježdźany/Budyšin (SN/MkWj). Zwjazkowy minister za justicu dr. Marco Buschmann (FDP) je připowědźił, zo chcył tuchwilu płaćiwy zakoń wo mjenach w Němskej změnić a w tym zwisku tež Serbam zmóžnić, tradicionalne swójbne mjena wužiwać, mjez druhim žónsku kóncowku „-owa“. Změnu zakonja chcedźa hišće lětsa w zwjazkowym sejmje wobzamknyć. Torsten Herbst, sakski zapósłanc FDP w zwjazkowym sejmje a parlamentariski jednaćel tamnišeje frakcije, je so k tomu wčera wuprajił: „Jako sakski zapósłanc witam, zo so wažna naležnosć serbskeho ludu w změnje zakonja wo mjenach wobkedźbuje. Bě to dołhi puć hač k rozrisanju tutoho problema, kotrež njeje předchadźace knježerstwo bohužel zwoprawdźiło. Wjeselu so tuž ćim bóle, zo bě zwjazkowy minister za justicu namjetam wot wšeho spočatka wotewrjeny a zo je nětko jednał. To je znamjo česćownosće napřećo Serbowkam a Serbam.
