Žane dypki w zestupnym boju
FC Carl Zeiss Jena – Budissa Budyšin 4:0 (1:0)
Zestawa hosći: Wohlfeld – Kolan, Klippel, Patka, Iliadis, Stehr, Hoßmang, Rosendo, Žuljević (26. Große), Šisler (59. Hausdorf), Salewski, Hänsch (59. Barnickel)
Po słabych dwanaće dypkach z prěnich 18 hrow je sej Budissa Budyšin w boju přećiwo zestupej dypkować. Před 2 474 přihladowarjemi nastupichu koparjo Budissy w Jenje přećiwo načolnikej regionalneje ligi sewjerowuchod. Tam chcychu so wo překwapjenku postarać, kaž bě so jim to njedawno přećiwo mustwu z Meuselwitza poradźiło. Z Josefom Müllerom a Tobiasom Heppnerom pak dwaj wažnej stołpaj wupadnyštaj. Prěni raz w zestawje Budissy pak běchu dorostowy hrajer Anton Stehr kaž tež nowopřichady Marko Žuljević, Theocharis Iliadis a Ezequiel Horacio Rosendo.
Widźał,słyšał, napisał (13.02.17)
„Ta ćma, ta ćma tak wulka je, hdyž my te dźěła pisamy, wo sinusu a ‚Potsdamje‘ a žadyn přehlad nimamy ...!“ Takle spěwachmy před nimale 40 lětami na kóncu našeho šulskeho časa. Što pak ma tale tehdyša ćma ze sportom a z tuchwilnymi zymskimi prózdninami činić?
Sylny wukonpola sylneho přećiwnika
Fortuna Trjebin
– Sokoł Ralbicy/Hórki 1:2 (1:1)
Zestawa hosći: K. Gloxyn – M. Matka, B. Bjeńš, T. Schultz (46. J. Bjeńš), Šewc, D. Gloxyn, B. Bejma, Korjeńk, Wałda, Kurjat, Domaška
Z mustwowym duchom k dobyću
Viktoria Worklecy – Traktor Mittelherwigsdorf 3:0 (21:25, 21:25, 22:25)
Po pjatkownym treningu stejachu volleyballisća Viktorije Worklecy před hoberskim problemom. Zranjenjow a wosobinskich přičin dla mějachu jenož pjeć hrajerjow k dispoziciji, kotřiž móžachu dźeń pozdźišo puć k ćežkemu duelej we wobwodnej lize do Mittelherwigsdorfa nastupić. Mustwo dźě wuznamjenja, zo steji na kóncu sylny cyłk na parkeće. Marka Smołu wotewzachu Worklečenjo sobotu tuž na twarskich róštach, a ćežko naraženeho Milana Budarja tež hišće zapakowachu. Wutrobny dźak wam, hólcy! Tež Jan Bětnar so najebać zranjenje do awta sydny, zo by znajmjeńša w prěnjej hrě Worklečanski kolektiw jako sudnik podpěrał.
Sport (10.02.17)
Halowe koparske turněry BFV
Biskopičanske koparske towarstwo (BFV) přewjedźe w zymskej přestawce wjacore halowe koparske turněry. Wone budu wot 17. do 19. februara a wot 24. do 26. februara w Biskopičanskej sportowej hali Wesenitz. Mustwa smědźa so hišće přizjewić, startowy pjenjez wučinja 30 eurow. Naprašowanja prošu na Tina Gottlöbera pod Tino.Gottloeber@ bfv08.de abo telefon 0152/27939516 abo faks 03594-715120
17.02. 18:00 turněr młodźiny A
18.02. 09:00 turněr młodźiny C
18.02. 15:00 turněr młodźiny B
19.02. 14:30 turněr žónskich cyłkow
Přihotowanski turněr Škitarjow
Wólnočasne volleyballowe mustwo Škit Budyšin přewjedźe pjatk, 3. měrca, w 20 hodź. w sportowni na Budyskej Kamjentnej přihotowanski turněr za 35. sokołski volleyballowy turněr wo pokal Domowiny. Nimo hosćićela chcetej so tež mustwje Sorabija Lipsk a Bratrowstwo Róžant na turněrje wobdźělić. Škit Budyšin bě loni druhe městno na sokołskim turněrje docpěł a słuša tuž k faworitam na dobyće pokala.
Termin sej zaplanować
Wot pjatka, 23., do njedźele, 25. měrca, chce towarstwo Viktoria Worklecy 1992 swoje 25lětne wobstaće swjećić. Potom ma Worklečanska sportowa hala pře- a dotwarjena być.
Prěni test w přestawce přěhrali
ST Hnašecy/Dobruša
– SJ Njebjelčicy 3:1 (2:0)
Zestawa hosći: Ričel – Zeller (46. Lejnart), Kral, Hübental, Haška, Hanuza, Hrjehor, Šołta, Šram, Korjeńk, Janca
Při najlěpšim wjedrje a jara dobrych wuměnjenjach na Kamjenskim kumštnym trawniku wotměchu koparjo Njebjelčanskeje SJ swoju prěnju testowu hru w zymskej přestawce 2016/2017. Po treningowym lěhwje, kotrež běchu we Werdauwje přewjedli, pak měještaj trenarjej wulku nuzu, hrajerjow za partiju hromdu dóstać. Zasadźištaj tuž štyrjoch z druheho zastupnistwa.
Hižo po dwaceći mjeńšinach nawjedowachu Hnašečenjo/Dobrušenjo 2:0. Do přestawki wotzamkny jeničce Jurij Haška wjele lubjacy nadběh z niskej třělwu, njeměješe pak wuspěch.
Jednota derje přihotowana
Prěni raz koparski pokal sej wuwojowali
K 22lětnemu wobstaću fanoweho kluba Biskopičanskeho koparskeho towarstwa 08 přeprosychu sej ,,Ći swěrni“ mjez druhim Worklečanskich koparskich přećelow na halowy turněr. Worklečenjo nastupichu hnydom z dwěmaj teamomaj.
Prěnje Worklečanske zastupnistwo nastupi hnydom w prěnjej hrě dnja a přesadźi so ze 4:0 přećiwo teamej „Přeco lačni“. Damian Pěčka a Richard Kmjeć trjechištaj jónu, Tomaš Čornak dwójce. Bohužel pak zazběhowy wuspěch ze zranjenjemi Bosćija Lukaša a Roberta Wagnera droho zapłaćichu. Wobaj njemóžeštaj hižo sobu hrać. W druhim duelu podležachu ,,Drjewjanym noham“ 0:5 a w třećim 0:1 ,,Rynje-juh“. Poslednju partiju předkoła přećiwo cyłkej „Ruß-Chantz-Blaublüter“ pak 5:2 dobychu. Pěčka třěli štwore wrota, Enrico Schulz jedne. W finalnych hrach kopaše Worklečanske prěnje zastupnistwo přećiwo „Cottauskim hólcam“ a jich po wrotach Pěčki a Schulza z 2:1 přewiny.
Kedźbyhódny remis docpěli
FC Energija Choćebuz
– FC Hornja Łužica Neugersdorf 1:1 (1:1)
Na přeće FC Hornjeje Łužicy Neugersdorf je do druheje połserije k njewšědnej testowej partiji dóšło. Napřećo steještej sej cyłkaj, kotrejž hrajetej w samsnej koparskej klasy. Před měsacomaj bě so FC Energija Choćebuz na samsnym městnje hišće z 2:1 přesadźiła, při nowonakładźe pak wuwojowa sej mustwo trenarja Vragela da Silvy wulce zasłuženy remis 1:1. Hižo w 4. min. bě so Oliver Merkel wo nawjedowanje hosći postarał. kotrež Tim Nattermann hišće do połčasa wuruna.
W cyłym hrajnym času pak hrajerjo FC Hornjeje Łužicy Neugersdorf bóle přeswědčichu hač faworit FC Energija Choćebuz. Tež ličba šansow bě na stronje hóstnych koparjow wjele wjetša. Woni su nětko po wšěm zdaću derje na dalšu połseriju přihotowani.
Georg Zielonkowski
Jónu přěhrali, jónu dobyli
Z probowym alarmom wohnjowych woborow zarjadniskeho zwjazka započa so zašły hrajny dźeń wobwodneje volleyballoweje ligi w Pančičanskej sportowni. Nimo toho dyrbjachu hišće něšto we wotběhu změnić, dokelž běchu Ochranowske volleyfantki hakle wutoru wo přepołoženje dypkoweju hrow prosyli. Na zbožo wšitke hrajerki ST Marijineje hwězdy kaž tež Zhorjelčanki tomu přihłosowachu, štož scyła tak samozrozumliwe njeje.
ST Marijina hwězda
– Ochranowske volleyfantki 0:3
(12:25, 15:25, 24:26)
Kotry cil běchu sej chowanče trenarja Ralfa Wachsmanna stajili? Znajmjeńša dypk chcychu sej wuwojować. K tomu pak njedóńdźe. Hakle w třećej sadźbje so Marijine hwězdźički do hry namakachu, přepozdźe. Hač bě zažny start připołdnju w dwanaćich špatna ideja była? Zmylki hwězdźičkow so wot sekundy k sekundźe kopjachu: Špatne přiwzaća bula a słaby blok běchu wosebje w prěnimaj sadźbomaj wulke manko.
Po hórkej poražce bě nětko wažne přećiwo žonam ze Zhorjelca dobyć, a to hladajo na zaměstnjenje w tabulce a zdruha za swójske sebjewědomje kaž tež za wjeselo nad sportom.
