Nimale 7 100 ludźi porjadnu hru widźało
FC Energija Choćebuz
– BFC Dynamo 1:0 (1:0)
Zestawa domjacych: Spahić – Stein, Matuwila, Schlüter, Baude, Putze, Kruse, Ziegenbein, Weidlich (77. Marcelo), Viteritti (88. Gehrmann), B. Förster (70. Mamba)
Po wulkotnych 90 hrajnych mjeńšinach mjez FC Energiju Choćebuz a FC Dynamo Berlinom běchu sej wšitcy přezjedni. Tónle 22. hrajny dźeń měješe wosebitu wobhladanjahódnu partiju w štwórtej lize, w kotrejž zetkaštej so mustwje na samsnej runinje. Najprjedy pak staraštej so dwě móžnosći hosći wo njepřijomne začuće na Choćebuskich tribunach. Hakle poněčim so domjacy lěpje do hry namakachu, bjez toho pak zo bychu sej někajke wjetše šansy za wrota wuhrali. Někotre sekundy do kónca prěnjeho połčasa pak nasta scena, kotraž bě pozdźišo za cyłu hru rozsudna. Kapitan Marcel Baude bě so na prawym křidle přesadźił a kulowatu kožu do směra na dołhi kut sunył. A Benjamin Förster docpě bjez problemow swoje dźesate wrota w aktualnej hrajnej dobje.
Magiska hranica překročena
Po dobyću 4:0 pola Freiburgskich wjelkow su Łužiske liški magisku hranicu 80 dypkow překročili. Lodohokejowe statistiki předkołow zašłych lět pokazuja, zo docpěwaja cyłki z 80 a wjac dypkami tak mjenowane playoff-hry, hdźež so bój wo mišterstwo rozsudźa.
Ale je to tež najlěpša sezona po změnje? Tele prašenje hodźi so hakle po kóncu hłowneho koła wotmołwić. Přiwšěm móžemy hižo raz na „dobru“ lišču dobu pohladać. Lěto, w kotrymž měješe Běła Woda 80 a wjac dypkow na swojim konće, bě sezona 2004/2005. To je team wokoło trenarja Horymíra Sekery 84 ličakow nahromadźił. Tehdom bě jeho syn Martin Sekera wusahowacy hrajer Łužiskich liškow. Dirk Rohrbach a Matthias Wikström jemu při tym pomhaštaj. Tale trójka natřěla 192 scorer-dypkow, štož dosahaše za sedme městno w tabulce po hłownym kole. W štwórćfinalu pak bě přećiwo pozdźišemu mištrej a postupnikej z Duisburga spěšnje kónc: štyri hry – štyri poražki.
Widźał,słyšał, napisał (27.02.17)
Awtor dźensa
Clemens Šmit
W dźensnišej kolumnje wěnuju so tróšku tym koparskim mustwam, kotrež poprawom přeco jenož w sćinje swojich „wulkich bratrow“ steja. W přichodnych linkach wobswětluju tuž aktualnu situaciju rezerwow našich serbskich koparskich mustwow.
Započinam w Chrósćicach. Nastupajo tamniše druhe mustwo njebě do spočatka sezony ani jasne, hač so scyła dosć ludźi hromadźe namaka. Cyłk hrožeše rozpadnyć, a samo wo wotzjewjenju mustwa bě skrótka rěč. Po tym zo bě trójka Bosćij Klimant, Michał Wowčer a Mathias Dórnik nazwučowarnje prowizorisce přewzała, chodźi nětko zaso wjace hrajerjow na trening. Płody angažementa nowych trenarjow pak njepokazuja so jeno na skrućenym mustwowym duchu. Tež aktualne zaměstnjenje w lize – wokrjesna klasa, stafla II – wupokazuje pozitiwnu tendencu. Jako tučasnje prěni tabulki wojuje SJC II samo wo mišterstwo a postup.
Njebjelčanska stara garda turněr dobyła
Ralbicy. Stara koparska garda Sportoweje jednotki Njebjelčicy přewjedźe minjeny pjatk w Ralbicach swój halowy koparski turněr, na kotryž bě sej štyri cyłki přeprosyła.
Dokelž běchu Pančičenjo jeno z dwěmaj hrajerjomaj přijěli, rozsudźichu so wjacori koparjo jim pomhać. Tak hrajachu z nimaj třo koparjo Zeleno-běłych z Hórkow, dwaj wot Sokoła Ralbicy/Hórki a jedyn Njebjelčan. Tale wubranka wobsadźi za Njebjelčanskej SJ druhe městno. Na dalšich pozicijach slědowachu Hórki, Ralbicy a Chrósćicy. Maik Brězan
Zaso přizjewjeni
Wutrajnje do štwórćfinala wokrjesneho koparskeho pokala
TSV 90 Wjazońca
– Sokoł Ralbicy/Hórki 0:7 (0:1)
Zestawa hosći: J. Bjeńš – Šewc, Zynda (70. Bogusz), B. Bjeńš, Lulak (62. Schultz), S. Bjeńš, D. Gloxyn, Korjeńk, Wałda, Kurjat, Domaška (57. Matka)
We wosmifinalu wokrjesneho pokala hrajachu koparjo Sokoła Ralbicy/Hórki sobotu we Wjazóncy. Na krasnym arealu na horje woni wot wšeho spočatka na wuběrnym kumštnym trawniku dopokazachu, zo su jasny faworit. Přez cyłu partiju mějachu bul w swojich rjadach a hru stajnje zaso wotzady natwarjachu. Dołhe třělwy běchu cyle zrědka widźeć. W prěnim połčasu docpěchu najebać wjacore stoprocentne móžnosće jeničke wrota přez Fabiana Korjeńka. Rjanu flanku na dołhu žerdź přez Stefana Bjeńša zamó wón direktnje do saka sunyć (17.). Pětr Domaška docpě z hłójčku jeno žerdź, samlutki na wrotarja běžo wón na nim zwrěšći, Gabriel Kurjat prasny bul z krótkeje distancy wyše wrotow a dalše dobre móžnosće Sokoljo wuwostajichu. Chrystof Gloxyn, kiž steješe tónkróć jako sokołski trenar při liniji, swarješe na njekoncentrowanosć před wrotami, chwaleše pak hrajny natwar hač k přećiwniskej šěsnatce.
Wuslědki (27.02.17)
Wokrjesny koparski pokal – wosmifinale
Liegau-Augustusbad – Rakecy 1:10 (1:3)
Wachau II – Sepicy4:3 (3:2)
Concordia Załom – Ćisk 3:5 (1:1)
Wjazońca – Sokoł Ralbicy/Hórki 0:7 (0:1)
Großröhrsdorf II – Wojerecy2:4 (1:1)
Drohotka Ramnow – Kulow 6:1 (1:1)
Něm. Pazlicy – Łaz/Běły Chołmc 3:2 (1:0)
wokrjesna wyša liga
1. ST Ćisk 17 67 : 10 43
2. Rakečanske ST 16 44 : 23 34
3. Sokoł Ralbicy/Hórki 16 40 : 23 27
4. ST Hnašecy-Dobruša 16 31 : 29 26
5. Póst Germ. Budyšin 16 28 : 26 26
6. SC Großröhrsdorf 17 21 : 16 25
7. Motor Kumwałd 17 27 : 34 24
8. Módro-běli Kulow 16 32 : 29 22
9. ST Kinspork/Łužnica 17 29 : 27 22
10. Drohotka Ramnow 16 27 : 34 19
11. LSV Hory 16 38 : 29 18
12. FV Ottendorf-Okrilla 17 27 : 44 17
Sport (24.02.17)
Volleyballowe hry
Worklečanscy volleyballisća wotměja we wobłuku wobwodneje ligi jutře, sobotu, swoju poslednju hru w Ralbičanskej sportowej hali. Tak přeprošeja wšón serbski volleyballowy přiwisk na partiji přećiwo JTVG Fitnes Koblicam a MSV Budyšinej 04 II. Prěni duel budźe w 14 hodź., druhi w 16 hodź. Jutře w 16 hodź. hraja tohorunja volleyballistki Marijineje hwězdy a to w Chróstawje.
Posledni test za Njebjelčanow
Prěnje koparske mustwo Njebjelčanskeje SJ testuje njedźelu posledni raz do starta druheje połserije. Přećiwnik na kumštnym trawniku w Kamjencu budźe wot 10.30 hodź. ST Ćisk II.
Wosmifinale wo pokal
Najlěpše cyłki na teritoriju Zapadołužiskeho koparskeho zwjazka wuhraja jutře a njedźelu wosmifinale we wokrjesnym pokalnym kole.
25.02. 13:30 SV Liegau-Augustusbad
– Rakečanske ST
25.02. 13:30 ST Hnašecy-Dobruša II
– SG Großnaundorf
25.02. 13:30 TSV Wachau II – Sepicy
25.02. 13:30 FV Załom – ST Ćisk
25.02. 13:30 Wjazońca – Ralbicy/Hórki
25.02. 14:00 SC Großröhrsdorf II
– Wojerowski FC
26.02. 13:30 Drohotka Ramnow
– Módro-běli Kulow
26.02. 13:30 Natwar Němske Pazlicy
– HZ Łaz/Běły Chołmc
Koparske dypkowe hry
25.02. 14:00 Choćebuz – BFC Dynamo
Budyska FSG so stopnjowała
Mixvolleyballisća Budyskeje FSG su na poslednim hrajnym dnju prěnjeje połserije swoje 2. městno w tabulce skrućili, a to z dobyćomaj we Wjazońcy.
Po słabym wukonu druheho hrajneho dnja slědowachu za FSGnikow w minjenymaj měsacomaj tři dobyća. Stopnjowali su so pola amtěrowaceho wicemištra ST Wjazońca. Ze sylnymi a strašnymi nadaćemi wukonjachu woni ćišć na kontrahenta, tak zo bě jeho hrajny natwar njedokładny a smeše hłowneho nadběhowarja z nazhonitosću wobwodneje ligi wobličomne. Budyscy mužojo swojej přihrawarce taktisce mudrje zasadźichu, štož wjedźeše k dobyćomaj 25:16 a 25:15.
