Hamburg (dpa/SN). Ludźo w Němskej a druhich europskich krajach maja po najnowšim přepytowanju towaršnosć swojeho kraja přiběrajcy za pačenu. 81 procentow woprašanych w Němskej to takle widźi. Nimo toho 73 procentow praji, zo pačenje dźensa bóle začuwaja hač hišće před dźesać lětami. Samsneho nastajenja su ludźo w Šwedskej, Italskej a Wulkej Britaniskej. Europjenjo su měnjenja, zo ma migracija najwjetši konfliktny potencial. W Němskej rjeknje to 46 procentow. Podobne wuslědki zwěsćichu tež w druhich europskich krajach. W Italskej měni to samo 61 procentow. Porno tomu maja wobydlerjo Ruskeje a Chiny rozdźěle mjez bohatymi a chudymi ludźimi za žórło konfliktow. Přiwšěm widźa ludźo tež zhromadnosće: 61 procentow woprašanych Němcow měni, zo ludźi po wšěm swěće wjace zwjazuje hač dźěli. W tamnych krajach bě to 65 procentow. Woprašeli běchu so 19 000 ludźi w 27 krajach.

Waršawa (dpa/SN). Něhdyši ministerski prezident Pólskeje Donald Tusk je so před Waršawskim sudnistwom k lětadłowemu njezbožu w Smolensku wuprajił. W běhu štyri hodźiny trajaceho woprašowanja tuchwilny prezident Rady EU kóždužkuli zamołwitosć za katastrofu wotpokazuje. „Njeje nadawk premiera abo prezidenta, někajke rozsudy nastupajo městno přizemjenja, čas přizemjenja abo wuzwolenje lětadła wobwliwować“, Tusk wčera rjekny.

Dnja 10. apryla 2010 bě při znjezboženju prezidentskeho lětadła njedaloko ruskeho Smolenska 96 ludźi žiwjenje přisadźiło. Mjez nimi bě prezident Lech Ka­czyński, dwójniski bratr předsydy knježaceje narodnokonserwatiwneje strony Prawo a sprawnosć Jarosława Kaczyńskeho.

Zwada wo přičinach njezboža pólsku towaršnosć hač do dźensnišeho pači. W oficialnej přepytowanskej rozprawje knježerstwa liberalneho ministerskeho prezidenta Donalda Tuska bě rěč wo čłowjeskim zaprajenju a techniskich njedostatkach. Kaczyński tole prěje.

Z runje šěsć km/h na awtodróze po puću był je muž w Hessenskej. Traktor bě tuž wo wjele pomałši hač dowolene, policija rozprawja. „Jězdźidła dyrbja znajmjeńša 60 km/h docpěć, zo móhli awtodróhu wužiwać“, policija wujasni. Zastojnicy traktor zadźeržachu. Prawdźepo­dobnje njebě 83lětny wodźer ani pytnył, zo bě na awtodróze jěł. Policisća zwě­sćichu pola njeho prěnje zjawy demency a sćazachu klučik traktora.

Na toaleće spěšnika zamknjeny był je politikar Berlinskich Zelenych. „Z někajkeje přičiny durje blokuja. Móžeće mi pomhać?“, zdźěli Matthias Oomen na internetnej platformje Twitter. Tole sobudźěłaćerjo železnicy woprawdźe móžachu. Na Drježdźanskim hłownym dwórnišću politikarja z njelubeje situacije wuswobodźichu. Oomen bě z Berlina přijěł. Čehodla durje blokowachu, njewědźa.

Protesty přećiwo koncertej prawicarjow we Wostrowcu měrne wostali

Wostrowc (dpa/CRM/SN). We wuchodosakskim Wostrowcu při němsko-pólskej mjezy su so minjeny kónc tydźenja wuspěšnje prawicarskoekstremnym wobarali. Hinak hač wočakowane, wostachu protesty přećiwo festiwalej neonacijow „Tarč a mječ“ měrne. Po informacijach policije wobmjezowachu so konflikty zwjetša na werbalne rozestajenja. Funkcionar NPD Thorsten Heise rěčeše wo něhdźe tysac wobdźělnikach prawicarskeho koncerta. Po informacijach policije bě jich něhdźe 1 200. Wostrowc wobaraše so z „Měrowym swjedźenjom“. Tam zličichu wjace hač 3 000 wobdźělnikow.

Policija bě sčasom z 1 900 zastojnikami prezentna. Sakskich policistow podpěrachu kolegojo z Badensko-Württembergskeje, Berlina a Durinskeje. Tež zastojnicy z Čěskeje a Pólskeje běchu zasadźeni. Wot pjatka hač do njedźele zliči policija 70 chłostajomnych njeskutkow.