Wo swětowy měr so modlili
Rom (B/SN) Po tym zo bě bamž Franciskus prěni swjaty dźeń hód na Pětrowym naměsće w Romje ludźi po cyłym swěće z „Urbi et orbi“ žohnował, je wón tam wčera prěnju Božu mšu lěta 2018 swjećił a so z wěriwymi wosebje wo měr na swěće modlił.
Mór na Madagaskaru wudyrił
Würzburg (B/SN). Hrózbna chorosć mór je sej loni na kupje Madagaskar mnohe wopory žadała. Po informacijach Swětoweje strowotniskeje organizacije zahiny 24 ludźi, 131 je so inficěrowało. Z antibiotikami drje hodźitej so mór a jeho wudyrjenje lochce přewinyć, medicinske zastaranje na Madagaskaru pak njeje wšudźe dosć zaručene.
Bamž za změnu Wótčenaša
Dalši mortwi w Iranje
Teheran (dpa/SN). Protesty w Iranje so dale rozšěrjeja. Minjenu nóc je po informacijach statneje telewizy prěni króć tež čłon rewoluciskich gardow, paramilitariskeje organizacije za škit systema, žiwjenje přisadźił. Ličba při njeměrach morjenych wosobow powjetši so tak na cyłkownje 20, po tym zo bě policija minjenu nóc wosom demonstrantow moriła. Ludźo žadaja sej hospodarske a politiske změny w kraju.
Poskićeja bórzomny dialog
Seoul (dpa/SN). Južna Koreja je Sewjernej Koreji namjetowała, so přichodny tydźeń w pomjeznym městačku Panmunjon zetkać, a na wysokej runinje wo móžnym wobdźělenju Sewjerneje Koreje na Olympiskich zymskich hrach w južnokorejskim Pyeongchangu jednać. Kaž sewjerokorejski mócnar Kim Jong Un dźensa w swojej nowolětnej narěči připowědźi, chcył wón delegaciju kraja do Južneje Koreje pósłać. Tole su w Seoulu jako zwólniwosć k dialogej interpretowali.
Projekt přetorhnjeny
Tójšto dźěła mějachu wohnjowi wobornicy wčera rano w Lubiju. Na ...
Na wěstotne dźěry skedźbnjeli
Lipsk (dpa/SN/JaW). Wěstotne dźěry při nabiwanju elektroawtow stejachu njedawno w srjedźišću 34. chaos communication kongresa w Lipsku. „W běhu dweju mjeńšin móžeš daty tajkeje nabiwanskeje stacije wotkryć“, rjekny wobdźělnik Mathias Dalheimer. Wučitać hodźi so mjez druhim lisćina z čisłami poslednich sto wužiwarjow, kotrež su trěbne za wotličenje nabiwanja. Hacker Dalheimer je spytał zwisk k wobhospodarjerjam nabiwanskich stacijow nawjazać a na problem pokazać, bohužel bjez wuspěcha.
Whistleblower Edward Snowden wobdźělnikow kongresa namołwi, zo njeměli popušćić a dyrbja dale kritisce postupować. „Naše dźěło je dźeń a wažniše“, wuzběhny bywši sobudźěłaćer ameriskeje tajneje słužby NSA. Wón bě z pomocu widejoweje telefonije z Moskowskeho eksila z kongresom zwjazany.
Na kongresu hackerow, kotryž wotmě so hač do minjeneje soboty, wobdźěli so nimale 15 000 ludźi, zo bychu tak zjawnosć na wěstotne problemy kompjuteroweje techniki skedźbnili.
Sym podpisał, dokelž ...
... trjebamy spušćomny ramik, kotryž je zapołoženy w politiskim zakładnym zrozumjenju, hladajo na dalše wuwiće a přichod tež našeho serbskeho ludu.
Za přewšo wažne mam, skrućić swoju identitu a swoje narodne wědomje z wobstejnosćemi, kotrež wusměrjamy na wobšěrne spěchowanje rěče, kubłanja a kultury. Njeparujomny faktor při tym je wězo tež mjezsobna wuměna nazhonjenjow z dalšimi mjeńšinami a narodami cyłeje Europy. Zawěsće wotkrywamy sej tak tež dalše njeznate potenciale a móžnosće, kotrež nam a dalšim ludam a narodam w Europje do přichoda sylnje pomhaja.
Podpisajće tež Wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Federalistiskeje unije europskich narodnych mjeńšin FUEN Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mailowu adresu: .
Swjeći jubilej
To a tamne (02.01.18)
Jako dobry skutk chcyše Berlinjan swoju drogowu plantažu wusprawnić. Trjeba ju, zo by swójbu zežiwił, rjekny wón policiji. Ta bě 150 konopjowych rostlin w jeho bydlenju namakała. Susodźa běchu zastojnikow poprawom wótreje hudźby pola 31lětneho dla wołali. Jako pak woni jeho a dalšeho muža při braću drogow překwapichu, sej bydlenje bliže wobhladachu a nańdźechu plantažu.
W Jerusalemje je so tele dny 38lětna žona z wowku stała a někotre hodźiny pozdźišo sama trójniki porodźiła. Z nimi je wona nětko mać cyłkownje jědnaće dźěći. Jako bu 22lětny najstarši syn nan a jeje prěni wnučk w samsnej chorowni na swět přińdźe, bě rozpjeršenje wulke. Wšako bě wona hakle w 33. tydźenju samodruha a hrona běchu hižo zasadźili. Trójnikam, kotrež dyrbjachu wurězać, so derje dźe.
Najhórša katastrofa zašłych lět
New York. Woheń we wysokodomje w New-Yorkskim měšćanskim dźělu Bronx je sej dotal dwanaće mortwych, mjez druhim tež ćěšenka, žadał. Štyri wosoby so ćežko zranichu, zdźěli w nocy New-Yorkska wohnjowa wobora. „Smy jednu z najhóršich tragedijow zašłeho štwórć lětstotka dožiwili“, rjekny měšćanosta Bill de Blasio. Płomjenja běchu w přizemju štyriposchodoweho domu wudyrili a so spěšnje rozpřestrěli, přičina njeje dotal znata.
Chcedźa dialog zesylnić
Brüssel. NATO chce so klětu wo intensiwniše rozmołwy z Ruskej prócować. „Wuchadźam z toho, zo budźemy so časćišo zetkawać a tež wojerske komunikaciske kanale sylnišo wužiwać“, připowědźi generalny sekretar NATO Jens Stoltenberg powěsćerni dpa. Prócowanja su na woběmaj bokomaj widźomne a zwjazkarstwo to podpěruje. Wo zaměrnišu wuměnu z Ruskej we wobłuku NATO bě so naposledk tež Němska zasadźała. Zo změja prócowanja wuspěch, njebě před tydźenjemi hišće wotwidźeć.
Žada sej solidarnu rentu
