Njewšědny swětnišćowy objekt je wot najnowšeho na njebju widźeć: Nižozemske předewzaće Rocket Lab je ze swojej prěnjej raketu nimo komercielnych satelitow tež naddimensionalnu diskotekowu kulu do swětnišća pósłało. Něhdźe meter wulka „hwězda čłowjestwa“ ze 65 reflektowacymi płoninami je po informacijach předewzaća při schadźenju a chowanju słónca po wšěm swěće bjez pomocnych srědkow widźeć.

Něhdźe 50 000 eurow škody staj Markneukirchenjanaj načiniłoj, jako spytaštaj kachle zatepić. Dokelž běštaj młodostnaj w starobje 17 a 22 lět drjewo „njefachowsce“ wužiwałoj, dóńdźe z rozpłunjenju a wohenjej. A tón so po bydlenju rozšěri. Młodostneju dowjezechu do chorownje, dokelž běštaj zajědojćenje z kurom poćerpjełoj. Wohnjowa wobora płomjenja we wjaceswójbnym domje podusy.

Berlin (dpa/SN). Wulka koalicija je minjene štyri lěta wo wjele wjace brónjenskich eksportow dowoliła hač knježerstwo CDU a FDP do toho. Cyłkowna hódnota wuwoza bróni wot lěta 2014 do 2017 wučinješe 25,1 miliardu eurow a tak 21 procentow wjace hač za čas čorno-žołteje koalicije wot 2009 do 2013. Tole zdźěli hospodarske ministerstwo w Berlinje na naprašowanje Lěwicy. Fachowc Zelenych za zakitowanje Omid Nouripur přiběrace eksporty raznje kritizuje, wšako su němske zakonje dosć krute. „To njehodźi so rjanym słowam wonkowneho ministra Gabriela a druhich.“

Dwě bombje rozbuchnyłoj

Tripolis (dpa/SN). Při dwójnym bombowym atentaće we wuchodolibyskim měsće Bengasi je znajmjeńša 27 ludźi žiwjenje přisadźiło. 42 wosobow so zrani, kaž zamołwići zdźěleja. Bombje běštej krótko za sobu njedaloko mošeje rozbuchnyłoj. Prěnja bomba detonowaše, jako wěriwi mošeju wopušćichu. Mjez woporami je pječa tež nawoda lokalneje milicy. Štó je wina na nadpadźe, dotal njewědźa.

Ludźo ćěkaja před ofensiwu