Washington (dpa/SN). Po raznej kritice swojich wuprajenjow na wjerškowym zetkanju z ruskim prezidentom Wladimirom Putinom dla je prezident USA Donald Trump twjerdźił, zo je so „zaprajił“. Na nowinarskej konferency z Putinom w Helsinkach bě Trump rjekł, zo nima ruske nutřměšenje do prezidentskich wólbow USA za dopokazane. „Čehodla dyrbjała Ruska za to zamołwita być?“, wón rjekny. Wčera Trump nowinarjam praješe, zo bě poprawom runje to nawopačne rjec chcył: „Čehodla njedyrbjała Ruska to być?“ Prezidentej USA bě tónle „zmylk“ pječa při přehladanju swojich rěčnych manuskriptow napadnył. Hač móže Trump swojich kritikarjow z tym změrować, je skerje njewěste. Dementi Putina bě wón „ekstremnje sylny a mócny“ mjenował. Dopóznaća tajneje słužby USA, kotrež nutřměšenje Ruskeje do wólbow pječa dopokazuja, bě wón zjawnje do prašenja stajał.

Mjeztym jewja so w USA přiběrajcy tež mjez republikanami kritiske hłosy. Sćelak Fox News, Trumpej dotal přichileny, jeho tohorunja kritizuje.

Berlin (dpa/SN). Němski zwjazkowy mini­ster za dźěło Hubertus Heil (SPD) chce přichodne lěta hač do 150 000 ludźi z doł­hodobneje bjezdźěłnosće wjesć. To je­ wón w rańšim magacinje sćelaka ZDF připowědźił, pokazujo na naćisk zako­nja, kotryž chcyše zwjazkowe knježerstwo hišće dźensa wobzamknyć.

Kaž dźěłowy minister rjekny, je drje połoženje na dźěłowych wikach dosć dobre­, je pak trěbne, „dołhodobnu bjezdźěłnosć wotstronić, za čož su štyri miliardy eurow k dispoziciji. Nowe městna chcył wón pjeć lět spěchować, hdyž su potrjecheni znajmjeńša sydom lět Hartz IV dóstali a w tym času jenož krótki čas dźěło měli. Minister Heil wotpokaza w tym zwisku kritiku, zo je doba spěchowanja předołha. Ludźo, kotřiž su sydom lět zwonka dźěłowych wikow byli, „trjebaja chwile so zaso do powołanja namakać. Woni trjebaja dołhodobnu perspektiwu.“ Prašani su nětko dźěłodawarjo runje tak kaž pomocne organizacije a komuny.

Wobswěto- a přirodoškitne zwjazki hotuja so na demonstraciju

Lipsk (SN/MkWj). Saksojo zapłaća wudobywanje brunicy ze swojej pitnej wodu. Zo móhli w brunicowych jamach dźěłać, dyrbja hoberske mnóstwa dnowneje wody wotklumpać. W Sakskej bě to jeničce lěta 2013 něhdźe 200 miliardow litrow we wuhlowych jamach Łužicy a Lipšćanskeje kónčiny, informuje přirodoškitny zwjazk BUND w nowinskej zdźělence. K přirunanju: Najwjetši sakski jězor w ně­hdyšej brunicowej jamje, Bjerwałdski, wobsahuje 174 miliardow litrow wody.

Město kaž Běła Woda z cyłkownje 35 000 wobydlerjemi w měsće a wokolinje wotwisuje hižo dźensa wot pitneje wody z druhich kónčin, dokelž w susodnej wu­hlowej jamje dnownu wodu­ wotklumpaja. BUND je to z přičinu, sej hladajo na přichod najspěšniši kónc wudoby­wanja brunicy žadać, rěka w pismje zwjazka. „Doniž njebudu składźišća dnowneje wody po kóncu brunicy zaso pjelnjene, móža lětdźesatki zańć. W časach wulkeje suchoty, kajkuž Sakska tuchwilu dožiwja, pobrachuje woda­ w ratarstwje a w domjacnosćach“, měni Felix Ekardt, před­syda sakskeje wotnožki BUND.

Chcyše so připołdnišej horcoće wuwinyć a je tak kedźbnosć policije zbudźił: 60lětny je minjenu nóc w Eisenachu na twarnišću molerske dźěła wukonjał. Po­licisća, kotřiž swěcu wuhladachu, tukachu na paducha a sej objekt bliže wobhladachu. Dźěłaćer jim rozłoži, zo bě w třoch dźěłać započał, zo by horcoty dla hižo připołdnju hotowy był. Zastojnicy njemějachu žanu přičinu, na tym dwělować, a dachu molerja dale dźěłać.

Chłostanka wjacorych tysac eurow hrozy­ runje slubjenemu porikej z Aw­striskeje. Wonaj staj w Italskej dospołnje nahaj do Gardaskeho jězora skočiłoj, po tym­ zo běštaj sej mandźelstwo slu­biłoj. Při tym wšak njejstaj dołho za někajkim schowanym městnom pytałoj, ale skočištaj hnydom njedaloko hosćenca do wody. Někotrym pak so to docyła njelubješe, a tak zawołachu policiju.