Kwětki na mosće zrumować dali
Moskwa (dpa/SN). K druhej róčnicy morjenja ruskeho opozicionelneho politikarja Borisa Njemcowa je Moskowske měšćanske zarjadnistwo kwětki, swěčki kaž tež wobrazy z městna njeskutka zrumować dało. Kaž Krjemlej kritisce nastajeny rozhłosowy sćelak Echo Moskwa rozprawja, je policija nimo toho šěsć aktiwistow nachwilnje zajała. Hižo něšto hodźin pozdźišo pak su ludźo znowa kwětki na improwizowanym wopomnišću połožili. Zawčerawšim, njedźelu, bě wjele tysac opozicionelnych w ruskej stolicy přećiwo ruskemu knježerstwu demonstrowało. Z fotami, plakatami a kwětkami kročachu wobdźělnicy po dróhach Moskowskeho centruma.
Něhdyšeho zastupowaceho ministerskeho prezidenta běchu atentatnicy 27. februara 2015 na mosće njedaloko Krjemla zatřělili. Tuchwilu jednaja přećiwo pjeć podhladnym. Přiwisnicy Njemcowa na to tukaja, zo sedźa zamołwići atentata w Čečenskej abo samo w Krjemlu. Na městnje njeskutka ludźo wšědnje kwětki kładu. Policija je přeco zaso rumuje.
To a tamne (28.02.17)
Při rjedźenju swojeho awta z milionarom stał je so starc w awstralskim měsće Newcastle. Muž, kiž chce anonomny wostać, nańdźe zabyty lotowy lisćik, kotryž hižo lěto w jězdźidle ležeše. Jako jón w interneće přepruwowa, wón zwěsći, zo je zrazom wo 1 020 496,38 awstralskich dolarow bohatši. Muž prawidłownje loto hraje, njeje pak hišće ženje dobył. Pjenjezy chce wón nětko za wukubłanje swojich wnučkow nałožić.
Rańše mloko dźěćom kradnył bě tydźenje dołho muž w delnjosakskim Hagenburgu. Wot spočatka lěta je sej tam stajnje póndźelu a štwórtk wotstajene połne mlokowe sudobja před dwěmaj pěstowarnjomaj sobu brał. Wčera je policija skućićela na městnje njeskutka lepiła. Kaž 38lětny twjerdźeše, chcyše so jenož strowy zežiwić, za čož pak jemu pjenjezy njedosahachu.
Morjenja dla zasudźenaj
Berlin (dpa/SN). W procesu ilegalneho smjertneho awtoweho wubědźowanja dla je Berlinske krajne sudnistwo wobeju wobskorženeju morjenja dla k jastwu na čas žiwjenja zasudźiło. Je to prěni króć, zo sudnistwo w padźe tajkeho razu tajke wysoke chłostanja wupraji. Wusud njeje hišće płaćiwy. Mužej běštaj ze swojimaj awtomaj před lětom wosrjedź Berlina napřemo smaliłoj. Jedyn z njeju zrazy do jeepa, kotrehož 69lětny šofer zemrě.
Kontroluja staw reformow
Athen (dpa/SN). Zastupnicy mjezynarodnych pjenjezydawarjow su dźensa nowe kontrole reformoweho programa grjekskeho knježerstwa zahajili. W srjedźišću steješe dawkowa politika, kotruž měješe Athenske knježerstwo na njedobro wobydlerjow změnić. Wuměnjenje za dalše pomocne srědki su pak tež reformy stawkoweho prawa, w dźěłarnistwach, při priwatizowanju a w rentowym systemje. Minjeny čas běchu ludźo masiwnje přećiwo tomu protestowali.
Němski zastajenc wotprawjeny
Sanitetarjo dyrbjachu na wčerawšej tradicionalnej paradźe ...
Tysacy ludźiNjemcowa wopominali
Trumpej dalši kandidat wotprajił
Schulz: Unija wina na situaciji
„Pólska njeby šansu měła“
Luxemburgski wonkowny minister kritizuje Waršawske knježerstwo
Berlin (dpa/SN). Luxemburgski wonkowny minister Jean Asselborn na tym dwěluje, zo je Pólska zrała stać so z čłonom EU. „Dźensniša Pólska z Jarosławom Kaczyńskim na čole njeby šansu měła Europskej uniji přistupić“, rjekny Asselborn žurnalistam nowiny Tagesspiegel. K wopodstatnjenju najdlěje w EU jako wonkowny minister skutkowacy politikar praji, zo Pólska Kopenhagenske kriterije njerespektuje, kotryž ma kóždy kraj do přistupa k EU spjelnić. K tomu słuša demokratiski a prawostatny porjad. Komisija EU Waršawskemu knježerstwu mjez druhim wumjetuje, zo njezaruča njewotwisnosć justicy. „Knježerstwo w Pólskej přinjese so při wobmjezowanju prawostatnosće do dźeń a wjetšich wuskosćow. Hdyž wo to dźe, prawniski stat zezhibować, hladaja prawdźepodobnje na madźarskeho knježerstwoweho šefa Viktora Orbána, Asselborn rjekny. „Tola w Pólskej přińdźe hišće něšto wažneho k tomu: Jarosław Kaczyński, šef knježaceje strony Prawo a sprawnosć, je ideologa.
