Woporaj dale na intensiwnej staciji
Srědki za spěšny internet
Informaciska jězba Sakskeho hospodarskeho ministra Martina Duliga
Halštrowska Hola (dpa/SN). Zamołwići Łužiskeje jězoriny chcedźa ličbu hosći wob lěto hač do lěta 2025 podwojić. Tuchwilu přińdźe kóždolětnje 750 000 turistow do regiona južneje Braniborskeje a wuchodneje Sakskeje. Potom ma jich 1,5 milionow być, zastupnicy turistiskeje branše wčera při Parcowskim jězoru zdźělichu. Tam bě so sakski hospodarski minister Martin Dulig (SPD) wo wotpowědnych projektach informował. Při tym wón namjetowaše, wjace turistow ze susodneje Čěskeje nawabić. Hižo nětko něhdźe dźesać procentow hosći wottam přichadźa. W tym zwisku su dalše inwesticije do wodosporta a transporta turistow z łódźemi planowane.
Kanclerka sej Özila jara waži
Katastrofa w Grjekskej –połsta mortwych při wohenjach
Athen (dpa/SN). Wulkej lěsnej wohenjej njedaloko grjekskeje stolicy Athen stej sej po informacijach grjekskeho rozhłosa znajmjeńša 50 smjertnych woporow žadałoj. Njedaloko města Rafina su pomocnicy 26 ćěłow namakali. Do toho bě rozhłós wo 24 smjertnych woporach rozprawjał. Wjace hač 150 ludźi poćerpi zranjenja. Mnozy z nich su w kritiskim stawje. Rybarjo, mórska straža a dowolnicy z gumijowymi čołmami su mjeztym wjace hač 700 ludźi ewakuowali, kotřiž běchu sej před płomjenjemi k morju wućeknyli. Tysacy přenocowachu pod hołym njebjom, w awtach abo sportowych halach. Mnozy spytachu z awtami ćeknyć, štož wjedźeše ke chaotiskim poměram na dróhach. Kura dla wjacore dróhi zawrěchu.
Wopory tołkańcy wopominali
To a tamne (24.07.18)
Bjez chłostanja drje wostanu fanojo spěwarki Heleny Fischer, kotřiž běchu za čas jeje koncerta w Frankfurće nad Mohanom na awtodróze parkowali, policija zdźěli. Něhdźe sto wopytowarjow běchu swoje awta na A 3 stejo wostajili, zo bychu dypkownje do bliskeho stadiona doběželi. Tež busy zastachu, a dachu wopytowarjam koncerta wulězć. Přiwšěm policija warnowaše, to přichodny króć zaso tak činić.
Wačokownju lětadła wočinił je psyk, jako so mašina lětanišću ruskeje stolicy Moskwy bližeše. Zwěrjo bě so we wačokowni Boeing 737 z klětki wudobyło a mylnje na knefl tłóčiło, z kotrymž so durje wočinja. Hnydom system pilota alarmowaše, kotryž dyrbješe na to nuzowe přizemjenje zahajić, dokelž bě so ćišć we wysokosći 4 000 metrow znižił. Lětadło móžeše přizemić, nichtó so njezrani.
Wo nabožinach rozswětleć
Magdeburg (B/SN). Ministerski prezident Saksko-Anhaltskeje Reiner Haseloff (CDU) ma rozswětlenje wo islamje za wuměnjenje integracije w Němskej. Wón skedźbnja w tym zwisku na „rozswětlenje wo křesćanstwje. Kóžda kultura, kotraž njeje ze swojej nabožinu rozswětlenje dožiwiła, njehodźi so integrować, je přećiwna kultura a wjedźe faktisce k zamylenjam, čemuž mamy zadźěwać.“
Wótra kritika lěhwow dla
Brüssel (B/SN). Zastupjerjo cyrkwjow a pomocnych skutkow su wuslědki wjerškoweho zetkanja Europskeje unije kritizowali. Vatikanski zamołwity za migraciju Michael Czerny warnowaše před lěhwami ćěkancow w Libyskej. Kraj njehodźi so za to, „rozrisać europske problemy“. Azylowa ekspertka Carity Europy Leila Bodeux rjekny, zo njeje Libyska docyła kmana idejowe prašenja rozrisać.
Medali za swoju knihu dóstał
Nowa wustawa na Kubje
Havanna (dpa/SN). Parlament na Kubje je nowu wustawu schwalił, kotraž zmóžnja mjez druhim jenakosplažne mandźelstwa, priwatne wobsydstwo a wukrajne inwesticije w kraju. We wčera wobzamknjenym naćisku so zapřijeće „komunizm“ hižo njejewi. Přiwšěm wostanje komunistiska strona jenička legalna strona socialistiskeho karibiskeho stata. Wobydlerjo Kuby změja w nowembru składnosć, wo prěnjej nowej wustawje po lěće 1976 wothłosować.
Trump a Ruhani sej hrozytaj
Washington (dpa/SN). Prezident USA Donald Trump a jeho iranski kolega Hassan Ruhani staj sej z chětro raznymi słowami mjezsobu nadawałoj a před nowymi hroženjemi warnowałoj. „Njewohrožujće ženje wjace USA, hewak dožiwiće konsekwency, kotrež njejsće w swojich stawiznach hišće ćerpjeć trjebali“, Trump minjenju nóc twitterowaše. Wón reagowaše na Ruhanija, kotryž bě Trumpej w zwisku z hospodarskimi sankcijemi wumjetował, zo sej z wohenjom hrajka. Nimo toho Ruhani hrožeše, Persiski zaliw za wšitke wolijowe łódźe blokować.
Němscy wobornicy pomhaja
Wjace hač 20 000 ludźi je wčera w Mnichowje přećiwo prawicarskim ...
Barley: Alarmowacy signal
Berlin (dpa/SN). Zwjazkowa ministerka za justicu Katarina Barley ma wumjetowanja wotstupjeneho hrajerja němskeje narodneje koparskeje wubranki Mesuta Özila rasizma dla za signal hłuboko sahaceho towaršnostneho problema. „Je alarmowace znamjo, hdyž nječuje so němski kopar kaž Mesut Özil w swojim kraju rasizma dla akceptowany a wot koparskeho zwjazka hižo reprezentowany“, politikarka SPD wčera wječor twitterowaše.
Z dotal njesłyšanymi wumjetowanjemi rasizma dla přećiwo šefej koparskeho zwjazka DFB Reinhardej Grindelej a druhim funkcionaram DFB bě Özil wčera němske narodne koparske mustwo wopušćił. We wjacdźělnym stejišću w Gelsenkirchenje rodźeny kopar z turkowskimi korjenjemi pisaše: „We wočach Grindela a jeho pomocnikow sym Němc, hdyž dobudźemy, ale imigrant, hdyž přěhrajemy.“ Özil sej žada: „Ludźo z rasistiskim diskriminowacym pozadkom njesměli dlěje w najwjetšim koparskim zwjazku swěta dźěłać směć, kotryž ma telko hrajerjow ze swójbow wšelakeho pochada. Njejsym dlěje winik jeho njekompetentnosće a njekmanosće“, Özil hladajo na Grindela piše.
