Přeslědźa zašłosć
EU reformuje jězbnu dowolnosć
Wjac hač połojca za komuny
Rozdźělenje pjenjez wosebiteho zamóženja w Sakskej jasne
Drježdźany (dpa/SN). Swobodny stat Sakska a komuny su so na to dojednali, kak chcedźa pjenjezy z wosebiteho zamóženja Zwjazka za infrastrukturu a neutralitu klimy rozdźělić. Dohromady 4,8 miliardow eurow staja Zwjazk za dobu dwanaće lět k dispoziciji. Partnerojo su sej přezjedni, zo chcedźa znajmjeńša 60 procentow cyłkowneje sumy pjenjez za inwesticije do komunalneje infrastruktury a předewzaća w zajimje komunow inwestować, zdźěli finančne ministerstwo. Dźesać procentow – to je 483,8 milionow eurow – chcedźa za dalši wutwar krajneje šule za wohnjowu woboru a škit před katastrofami w Narću, za masterplan za juhozapadnu Saksku, za projekty digitalizacije kaž tež za podpěru sakskeho požadanja wo wuhotowanje olympiskich hrow w lěće 2040 nałožować. Komuny dóstanu 2,8 miliardow eurow, zo bychu swoje móžnosće inwestowanja zawěsćili. Z 1,5 miliardami eurow chce kraj dohromady něhdźe 30 procentow pjenjez za swójske projekty wužiwać.
Awta na prěnje městno
To a tamne (21.10.25)
Při rozkorje před nakupnišćom w měsće Lemgo w Porynsko-Westfalskej je młodostny swoje žiwjenje přisadźił. Po zwadźe na parkowanišću a při kasy bě muž młodostneho z wótrym objektom zranił. 33lětnemu nětko wumjetuja, zo je młodostneho na smjerć zranił. Statne rěčnistwo w Detmoldźe a policija w Bielefeldźe pad přepytujetej.
Jimi Blue Ochsenknecht je telewizijne wubědźowanje „Promi Big Brother“ dobył. Publikum wuzwoli 33lětneho, kiž je mjez druhim z filmow „Die wilden Kerle“ znaty, jako dobyćerja. W finalu přesadźi so wón přećiwo designerej Haraldej Glööcklerej a doby dohromady 100 000 eurow. W live-wusyłanju sćelaka Sat1 wón po wozjewjenju swojeho dobyća płaćo přizna, zo je z wusyłanjom dopokazać chcył, zo je wón dobry čłowjek, na kotrehož móžeš so spušćeć.
Na korjenje spominać a přichod twarić: Myto Domowiny 2025
Na swjatočnym zarjadowanju je předsyda Domowiny Dawid Statnik pjatk wječor w Budyskim Serbskim domje angažowanym Serbam Myto Domowiny, Myto Domowiny za dorost a Čestne znamješko přepodał.
Budyšin (LS/SN). W swojich dźaknych słowach nawjaza předsyda Domowiny Dawid Statnik na citat serbskeho molerja Měrćina Nowaka-Njechorńskeho: „Nochcu być wuměłc jenož za wuměłstwo a wuměłstwa dla, nic serbski moler, chcu jenož słužownik serbskeho ludu być a wo nim swědčić. To je moje dźěło, mój nadawk!“
Nabožinske kubłanje wjaza
Berlin (B/SN). Mjezynarodna studija uniwersity w Münsteru je w Němskej, Kanadźe, Italskej, Finskej a Madźarskej posrědkowanje nabožiny pruwowała. Profesorka Christel Gärtner: „Najwažnišu rólu hraja při tym swójbni a cyrkej. Hdyž dźěći a młodostni cyrkej jako rum dožiwjeja, w kotrymž so eksistencielne prašenja wobjednawaja, móže trajna wjazba nastać. Potom cyrkej jako spiritualnu domiznu ze swojimi ritualemi rady wužiwaja.“
Swjata hora Yaripo
Brasilia (B/SN). Narodna skupina Yanomami na sewjeru Brazilskeje zhladuje na 1 000lětne stawizny. Hora Yaripo leži srjedź dešćoweho lěsa Amaconasa w narodnym parku, na kotrejž su po měnjenju Yanomami jich předchadnicy žiwi. Wobydlerjo su wusko z přirodu zwjazani a wěrja, zo ma wšitko dušu. Tajke spirituelno-nabožne zhladowanje mjenuja animizm.
Židam ćeknyć pomhał
Paduši nadal ćěkaja
Paris (dpa/SN). Za paduchami, kiž běchu so do swětosławneho muzeja Louvre zadobyli, po cyłej Francoskej pytaja. Hač do redakciskeho kónca pak jich hišće našli njejsu. Policija wuchadźa wot skupiny štyrjoch wosobow. Woni su dohromady wosom debjenkow pokradnyli. Jich hódnotu trochować njemóža. Cyłu francosku towaršnosć padustwo wulce jima, wšako je Louvre muzej z wulkim prestižom w tu- kaž tež we wukraju.
Pozitiwna bilanca wikow
Frankobrod nad Mohanom (dpa/SN). Knižne wiki w Frankobrodźe su z wjace wopytowarjemi hač loni zakónčili. Na cyłkownje pjeć dnjach hač do njedźele wječora bě 120 000 wopytowarjow (2024: 115 000) wiki wopytało. Tež 118 000 fachowcow (2024: 115 000) bě přichwatało. Dohromady 4 350 akterow z cyłeho swěta (2024: 4 300) předstaji swoje produkty. Direktor knižnych wikow Juergen Boos je z bilancu wikow jara spokojom.
Kónc lěwicarskeje ery
Miliony ludźi su sobotu po cyłych USA pod hesłom „No kings“, ...
Friedrich Merz potwjerdźa škitnu murju
Berlin (dpa/SN). Wot wčerawšeho schadźuje so wjednistwo CDU w Berlinje na dwudnjowskej klawsurje, na kotrejž wuradźuja wo zasadnym kursu strony we wobchadźe z AfD. Hladajo na dohromady pjeć wólbow krajneho sejma klětu zwurazni zwjazkowy kancler a šef CDU Friedrich Merz, zo CDU z AfD kooperować njebudźe, znajmjeńša nic z nim na čole strony. „AfD je strona, kotraž wšitko do prašenja staja, štož je republiku w poslednich lětdźesatkach sylniło a skrućało“, wón wuzběhny. Z tym reagowaše Merz na žadanja wjacorych politikarjow CDU – mjez nimi generalneho sekretara sakskeje CDU Toma Ungera a braniborskeje zapósłanče CDU w zwjazkowym sejmje Saskije Ludwig –, kotřiž běchu minjene dny postulat škitneje murje přećiwo stronje AfD do prašenja stajeli. Dźensa chcetaj Friedrich Merz a generalny sekretar CDU Carsten Linnemann na nowinarskej konferency wo wuslědkach strategiskich wuradźowanjow informować.
