Nadeždina wotpokazali
Město blokadow nětko parlament
Berlin (dpa/SN). Protestna skupina Poslednja generacija chce při wólbach parlamenta EU kandidować. Tole zdźěli wčera rěčnica skupiny Carla Hinrichs. „Nětko chcemy naše spjećowanje z dróhi do parlamenta nosyć“, wona na onlinowej konferency wozjewi. Skupina je znata jako tajka, kotraž sej hubu njeda zakazać. Nětko póńdźe wo to w parlamenće skutkować.
Za kandidaturu wólbow parlamenta EU w juniju je chětro pozdźe. Hladajo na wólby pak dosahaja 0,5 procentow hłosow wólbokmanych, to su něhdźe 250 000 ludźi. Nětko chcedźa w skupinje wubědźowanje přewjesć, zo móhli 100 wosobow za akciju nańć, wuswětli čłon Posledneje generacije Henning Jeschke. Tohorunja je za kandidaturu 50 000 eurow trěbnych, kotrež maja nětko najprjedy raz hromadźić.
Dźěło jako srědk integracije
Drježdźany (dpa/SN). Sakska chce ćěkancow spěšnišo do dźěłowych wikow integrować. Tole ma so tež poradźić, jeli njejsu znajomosće němčiny hišće perfektne, praji socialna ministerka Petra Köpping (SPD) srjedu. „Tole přinošuje k spěšnišej integraciji.“ Nadźiju ma ministerka wosebje do nowych poskitkow zwjazkoweho knježerstwa kaž na přikład rěčne kursy paralelnje k dźěłu. Po informacijach dźěłoweje agentury je w Sakskej tuchwilu dohromady něhdźe 22 500 wukrajnikow bjezdźěłnych. Na wšěch 9 800 je so na integraciskich kursach wobdźěliło. Woni za čas kursa jako bjezdźěłni njeliča.
Dohromady je w Sakskej tuchwilu 28 000 ćěkancow přistajenych. Tole je derje tak, ale nětko měli so wosebje absolwenća integraciskich kursow spěšnišo do dźěła wabić. Dohromady 36 800 swobodnych dźěłowych městnow tuchwilu je. Michaela Ungethüm wot dźěłoweje agentury měni, zo je potrjeba za dźěłowe mocy dosć wulka. Tute móhli ćěkancy zdźěla wobsadźić a sej tak tež rěčne kmanosće polěpšić.
Mjaso móhło dróše być
„Cent na dobro zwěrjećeho derjeměća“ ma ratarstwu pomhać
Berlin (dpa/SN). Plany za tak mjenowany „cent na dobro zwěrjećeho derjeměća“ jako popłatk na mjaso w kupnicach bywaja konkretniše. Agrarne ministerstwo je na próstwu frakcijow ample koncept nadźěłało. Tutón je zakład za zawjedźenje přetrjebarskeho zakonja za mjaso a mjasne produkty, rěka w dokumenće ministerstwa.
Wučerjo serbšćiny so dale kubłali
To a tamne (08.02.24)
Prof. dr. habil Klaws Thielmann – serbski medicinar a wědomomostnik
Zrudźaca powěsć je do Łužicy dóšła, zo je štwórtk, 25. januara, po dołhej ćežkej chorosći w Erfurće w starobje 90 lět wuznamny serbski medicinar-wědomostnik prof. dr. habil. Klaws Thielmann zemrěł. Wón narodźi so 29. oktobra 1933 w Połčnicy. Tam měještaj jeho serbska mać a jeho němski nan lěkarsku praksu. W małym městačku zastupi hólčec do šule a poda so potom na Lessingowy gymnazij do Kamjenca. Rady jězdźeše z kolesom k swojemu dźědej Mikławšej Kubašej a k swojej ćeće Mari Kubašec, serbskej wučerce a spisowaćelce, na wopyt do Chasowa. Přez wobeju a přez jeho mać zbudźi so jemu lubosć k serbskej rěči, kulturje a stawiznam kaž tež wšědnemu serbskemu žiwjenju. Tohodla poda so młodźenc po 10. lětniku z Kamjenca na Serbsku wyšu šulu do Budyšina. Na šuli přewza zamołwity nadawk organizatora 1. serbskeje kulturneje brigady a přihotowaše wustupy w tu- a wukraju. Tak zezna so z kulturu wosebje słowjanskich ludow. Wón zajimowaše so za kultury druhich ludow a rěčeše pozdźišo tež běžnje jendźelsce, španisce, rusce a francosce.
Kompleksny sudniski proces z politiskej brizancu
Loni w měrcu je Else-Frenkel-Brunswick-Institut (EFBI) na Lipšćanskej uniwersiće studiju wozjewił, w kotrejž přepytowaše wliw předewzaćelow na prawicarske zmyslenje ludźi we wokrjesomaj Zhorjelcu a Budyšinje (SN rozprawjachu). Do kruha naspomnjenych prominentnych a wliwapołnych wosobow słuša Jörg Drews, jednaćel Budyskeho twarskeho předewzaća Hentschke Bau.
Přećiwo institutej – jako wudawaćelej studije – kaž tež přećiwo skupinje „15 Grad Research“, kotrejež rešerše běštaj awtor Johannes Kiess a awtorka Amelie Feuerer wuhódnoćiłoj a do studije zapřijałoj, Drews ze swojim předewzaćom nětko na krajnym sudnistwje w Drježdźanach skorži. Lětsa, 19. januara, wotmě so prěnje sudniske jednanje přećiwo rešeršowacemu kolektiwej resp. jeho nošerjej: Zjednoćenstwu přesćěhanych nacistiskeho režima – Zwjazkej antifašistow w Sakskej (VVN-BdA). Ze skóržbu přećiwo Lipšćanskemu institutej budźe so sudnistwo w separatnym procesu zaběrać. Termin za to hišće njeje jasny.
Situacija dale a špatniša
Wiesbaden (dpa/SN). Němska industrija so dale a mjenje wuwiwa. Cyłkowna produkcija w předźěłanskim přemysle je wo 1,6 procentow woteběrała, zdźěli dźensa Zwjazkowy statistiski zarjad ze sydłom we Wiesbadenje. Hižo sedmy měsac za sobu ličba spaduje. Fachowcy su překwapjeni, wšako z hódnoty 0,5 procentow wuchadźachu. W decembrje je produkcija předewšěm we wobłukomaj chemiska industrija a twarstwo woteběrała.
Manipulowace powěsće zwěsćić
Berlin/Drježdźany (dpa/SN). Nowa iniciatiwa chce kompetencu za powěsće wobydlerjow w Sakskej hladajo na wólby bóle spěchować. Projekt z mjenom „faktenstark“ stej załožbje Bertelsmann a Amadeu Antonio kaž tež towarstwo Codetekt załožili. „W interneće šěrja so wotpohladnje dale a bóle wopačne informacije, z kotrymž spytaja ludźi zjebać abo manipulować“, iniciatiwa dźensa zdźěli. Nětko su dźěłarnički předwidźane, hdźež móža zajimcy wot staroby 18 lět strategije nawuknyć, kak móža wopačne informacije zwěsćić.
Na lětanišćach stawkuja
