Berlin (SN/JaW). Ćežišća a žadanja awtochtonych narodnych mjeńšin a narodnych skupin Němskeje w 19. legislaturnej periodźe Němskeho zwjazkoweho sejma stejachu w srjedźišću prěnjeje dźěłoweje rozmołwy nawodnicy mjeńšinoweho sekretariata Judit Šołćineje ze zapósłancom zwjazkoweho Axelom Müllerom (CDU). Wo tym informuje sekretariat w nowinskej zdźělence.

Kaž w zdźělence dale rěka, bě zetkanje minjeny tydźeń wažne za wobě stronje. Müller je w nutřkownym wuběrku zwjazkoweho sejma rozprawjer frakcije CDU/CSU za narodne mjeńšiny Němskeje. Zdobom je studowany jurist čłon a zastupowacy čłon poradźowaceju wuběrkow za naležnosće němskich Sintow a Romow kaž tež Serbow. „Wosobinske rozmołwy ze zapósłancami sejma mam za jara wažne“, Judit Šołćina rozłožuje. „Dawamy tak politikarjam nadrobny dohlad do skutkowanja narodnych mjeńšin. Tuž bě nam na rozmołwje bytostne, knjeza Müllera jako noweho zapósłanca za naše skutkowanje sensibilizować ­a zdobyć.“ Wo detailach nimale hodźinskeje dźěłoweje rozmołwy wobaj ničo njeprajištaj.

Waršawa (dpa/SN). W justicnej zwadźe mjez komisiju Europskeje unije a pólskim narodnokonserwatiwnym knježerstwom njeje najebać dalše rozmołwy hišće žane rozrisanje wotwidźomne. Komisija EU bě přidatne informacije z Waršawy nastupajo dwělomne zakonje dóstała a chce je nětko analyzować, zdźěli wiceprezident komisije Frans Timmermans po zetkanju z pólskim ministerskim prezidentom Mateuszom Morawieckim wčera we Waršawje. „Nadźijam so, zo móžemy konstruktiwny dialog dale wjesć, rjekny Timmermans. Tež Pólska je zwólniwa naležnosć rozrisać, Morawiecki potwjerdźi.

Komisija EU ma mnohich reformow knježaceje strony Prawo a sprawnosć dla njewotwisnosć pólskich sudnistwow za wohrožene. Dotalne korektury Waršawy njezamóchu wobmyslenja w Brüsselu wotstronić.

Po zdźěla hižo płaćiwych zakonjach je Waršawske knježerstwo wjele sudnikow pušćiło a ze swójskimi kandidatami narunało, pólscy fachowcy kritizuja a maja samo najwyše sudnistwo za wohrožene.

Spušćejo so na nawigacisku funkciju swojeho mobilneho telefona bě muž w Schleswigsko-Holsteinskej ze swojim lěhadłowym kolesom nadobo na awtodróze A1 po puću. 43lětny z USA policiji rjekny, zo je ducy z Osla do Barcelony a zo je jeho smartphone na awtodróhu pósłał. Zastojnicy su muža powučili a jeho ze słowami „dobru jězbu“ po prawym puću dale pósłali.

Kwasna nóc Berlinskeho porika je so z policajskim zasadźenjom w jednym z Braunschweigskich hotelow skónčiła. Wopitaj běštaj so nowaj mandźelskaj tak zwadźiłoj, zo 50lětna njewjesta zastojnikow alarmowaše. Wona płakaše a skoržeše, zo bě ju 62lětny mandźelski bił a jej kwasny šat roztorhał. Tón wšak jej wumjetowaše, zo je „jenož za pjenjezami“. Muž dyrbješe na to hotel wopušćić.

Budyšin/Drježdźany (SN/at). Runoprawosć serbskeje rěče je po wólbach kraj­neho sejma nětko tež při komunalnych wólbach w Sakskej lěpje zaručena. To rjaduje wot 12. junija płaćiwy nowy komunalnowólbny porjad (KomWO) sakskeho ministerstwa nutřkowneho. Jeho paragraf 63 wobjednawa serbski sydlenski rum a z nim zwjazanu dwurěčnosć.

„Minjene lěta su so Serbja přeco zaso hóršili, zo njejsu wólbne podłožki tež w maćeršćinje dóstawali“, zwěsća Marja Michałkowa, předsydka Rady za serbske naležnosće Sakskeje. Tež Domowina bě z tajkimi zapodaćemi konfrontowana. „Wosebje při komunalnych wólbach jewjachu so zmylki, abo dwurěčnosć njebu scyła wobkedźbowana. Na přikład nje­běše při zašłych wólbach w Budyšinje móžno, z wólbnym zarjadom w serbskej rěči komunikować abo serbske adresy podać“, wudospołnja Borbora Felberowa, nowinska rěčnica Domowiny.