Dokelž bě jimaj pěsk na twarnišću wušoł, staj so twarskaj dźěłaćerjej cyle jednorje na hrajkanišću w delnjofrankskim Kitzingenje posłužowałoj. Mužej sobotu rano z łopaču pěsk do swojeju karow sypaštaj a wotwjezeštaj jón. Susodźa to wobkedźbowachu a wołachu policiju. Ta namaka pěsk kaž tež dźěłaćerjow na bliskim twarnišću. Pječa bě jimaj šef kazał pěsk z hrajkanišća wzać. Přiwšěm mataj wonaj ličić ze skóržbu padustwa dla.
Za „wuprózdnjenje swojeho žołdka do wašeho awta“ je so maturant pola Stuttgartskeje policije zamołwił. Zastojnicy běchu młodeho muža spočatk meje na nalětnim swjedźenju chětro wopiteho před swjedźenskim stanom ležaceho našli a sobu na stražu wzali. Po puću pak wón w policajskim awće bluwaše. „Móžu sej derje předstajić, kak njepřijomne wam to bě“, šuler w lisće pisaše.
Praha (dpa/SN). W Čěskej su z čuwowym jědom „nowičok“ eksperimentowali. Tole je prezident Miloš Zeman wčera wječor w telewizijnym sćelaku Barrandov zdźělił. Eksperiment běchu loni w nowembru we wojerskim instituće w Brnje přewjedli a při tym snadne mnóstwo jěda syntetisce zhotowili, 73lětny rjekny. Atentatnicy běchu z tutym jědom loni w jendźelskim Salisbury bywšeho ruskeho agenta zajědojćili. Pječa bě Ruska za to zamołwita. Argument Moskwy, zo by tež Čěska tajku maćiznu zhotowić móhła, běchu w Praze stajnje wotpokazali.
Allianz do wuhla njeinwestuje
Mnichow (dpa/SN). Najwjetši zawěsćenski koncern Europy Allianz so wot wuhla wotwobroća. Wotnětka nochcedźa hižo wuhlowe milinarnje a jamy zawěsćeć, rjekny šef předsydstwa Oliver Bäte powěsćerni dpa w Mnichowje. Tež kapital nochcedźa hižo do předewzaćow inwestować, kotrež z wužiwanjom wuhla zaměry Pariskeho klimoweho zrěčenja wohrožuja, woćoplenje zemje na mjenje hač dwaj stopjenjej wobmjezować.
Wójsko znowa wusměrić
Budyšin (CS/SN). Sakski hospodarski minister Martin Dulig (SPD) bě wčera ze swojimi rozmołwami za kuchinskim blidom w Budyskim měšćanskim muzeju. Něhdźe 50 wobydlerjow je přeprošenje sćěhowało. Za blidom móžachu so přitomni wěcownje z ministrom rozmołwjeć a prašenja stajeć. Spektrum temow sahaše wot njesprawnosće mjez komunalnymi pěstowarnjemi a kubłanišćemi w swobodnym nošerstwje hač k znatym ćežam, kaž falowacy wučerjo, planowane kubłanske naprawy a problemy kołowokoło Hartz IV. Wězo rozjimachu wčera tež temy „wulkeje“ politiki, na přikład kołowokoło ćěkancow. Někotre prašenja wotmołwješe Martin Dulig zhromadnje z Budyskim wyšim měšćanostu Alexanderom Ahrensom (SPD). „Poprawom cyły wječor wo hódnoćenju rěčimy“, sakski hospodarski minister zwurazni. Wón a tež wyši měšćanosta spóznaštaj, zo je mnoho njesprawnosćow. Mnoho ćežow pak so krótkodobnje rozrisać njehodźi. Tuž je wažne, so wo dowěru prócować, štož móža z rozmołwami za kuchinskim blidom docpěć. Zwjazkowa politika wotbłyšćuje po słowach ministra hłownje zapad Němskeje.
Waršawa. Spočatk meje swjeća Polacy hnydom tři swjatki za sobu. Nimo „Swjedźenja dźěła“ 1. meje je po tym Dźeń pólskeje chorhoje a wčera, 3. meje, bě róčnica schwalenja pólskeje wustawy. Na tutón swjatk su Polacy wosebje hordźi. Je dźě to prěnja europska wustawa scyła a – po ameriskej – druha po wšěm swěće. Wona bu lěta 1791 wobzamknjena, wustawa USA štyri lěta do toho 1787.
Jandźela pěstona při sebi měło je 17 měsacow stare dźěćo při wobchadnym njezbožu na awtodróze A 60 njedaloko Bingena. Kaž policija zdźěli, bě so jedne ze zadnjeju kolesow bydlenskeho mobila puknyło. Dźěle wobruče přerazychu dno awta. Hólc w tym času w swojim dźěćacym sydle spaše, kiž bě runje nad tutym městnom přiwjazane. „Je wulki dźiw, zo njebu dźěćo zranjene“, policija zdźěli. Mobil dyrbjachu wotwlec.
Žana plasta w palasće: Norwegska krónprincowa swójba je spytała, wěsty čas doma bjez plastowych wotpadkow wuńć. Tole njeje wosebje derje fungowało, krónprincesna Mette-Marit (44) zdźěli. „Je njesměrnje ćežko, dźensniši dźeń žanu plastu njewužiwać“, rjekny wona telewizijnemu sćelakej NRK. Ze swojim mandźelskim Haakonom wona akciju ludźi podpěruje, w lěsach wotpadki zběrać.
Ellwangen (dpa/SN). Policija je dźensa při wulkoraciji w přebywarni ćěkancow w badensko-württembergskim Ellwangenje 23lětneho požadarja azyla ze zapadoafriskeho Toga namakała a identifikowała. Jeho chcedźa nětko zhromadnje ze 17 dalšimi požadarjemi azyla, kiž běchu w zašłosći stajnje zaso jako naškararjo njeměrow napadnyli, do druhich domow přepołožić. 23lětneho chcychu w nocy na póndźelu poprawom do Italskeje wotsunyć. Druzy požadarjo pak tomu z namocu zadźěwachu.
Němka w Somaliji zawlečena
Mogadischu (dpa/SN). Němsku sobudźěłaćerku Mjezynarodneho komiteja Čerwjeneho křiža su w somaliskej stolicy Mogadishu zawlekli. To je pomocna organizacija minjenu nóc zdźěliła. „Starosćimy so wo wěstotu našeje koleginy“, rjekny rěčnik misije w Somaliji. Wobrónjeni běchu kompleks Čerwjeneho křiža wčera wječor nadpadnyli a žonu zawlekli. Mjeztym so na wjacorych runinach wo jeje wuswobodźenje prócuja.
Žadaja sej wyši niwow renty