To a tamne (27.09.17)
Po wšěm zdaću ćělnje zbrašeny jaty je zastojnikam w Sewjernej Šwabskej twochnył. 45lětneho, kiž sedźeše w Kaisheimskim jastwje, běchu bolosćow w chribjeće dla do kliniki dowjezli. Kaž rěkaše, móžeše so muž chorosće dla jeno ćežko hibać. Tak dowjezechu jateho ze stólčkom do chorownje. Pacienta wobstražować tuž trjeba njebě, měnješe policija. Kaž dźiw pak je so muž „spontanje wustrowił“, tak zo móžeše ćeknyć.
Formulacija ignorancy „Pissed“ Donalda Trumpa je znateho kanadiskeho wuměłca Cassilsa k njewšědnej twórbje pozbudźiła. Něhdźe poł lěta je wón swójski urin hromadźił, a to na wšě 750 litrow. Rezultat móža sej wopytowarjo nětko w New-Yorkskej galeriji wobhladać, hdźež je přewidny tank z urinom wustajeny. Před smjerdom su bohudźak přelutowani, dokelž ma zběrnik wěko.
Tilich za změnu kursa
Berlin (dpa/SN). Sakski ministerski prezident Stanisław Tilich (CDU) liči hladajo na wulke straty wólbnych hłosow za swoju stronu ze změnu kursa w swobodnym staće. Tilich z toho wuchadźa, zo njemóžemy „dale tak“ dźěłać, ale swójska politika budźe znowa wusměrjena. CDU je w Sakskej nastupajo druhi hłós wolerjow jenož druhe městno za AfD docpěła. „Hospodarstwo so derje wuwiwa, po wšěm zdaću pak ludźi něšto druhe zaběra. A to njejstej jenož temje ćěkancy abo šula“, praji wón w dźensnišim wudaću Sächsische Zeitung.
Gauland: Ćežki spočatk AfD
Berlin (dpa/SN). Načolny kandidat AfD Alexander Gauland nadźija so po wotprajenju zwjazkoweje rěčnicy strony Frauke Petry, zo so jej dalši woleni kandidaća njepřizamknu. To je ćežki spočatk AfD w zwjazkowym sejmje. Dźensa so nowa frakcija strony prěni raz schadźuje. Hakle potom móže Gauland posudźować, hač ma Frauke Petry w stronje dalšich podpěrarjow. Překwapjacy bě za njeho wčerawši rozsud Petry, zo njebudźe frakciji AfD w zwjazkowym sejmje přisłušeć.
Za njewotwisnosć hłosowali
Za samsne žiwjenske wuměnjenja
Trjebin (SN). Přirada wuwićoweho koncepta za gmejny Trjebin, Slepo a Dźěwin pod wuměnjenjom dołhodobneho brunicoweho hórnistwa je so tele dny na swoje 37. posedźenje w Trjebinje zešła. Ćežišćo wuradźowanja bě přesydlenje Miłoraza a tamne infrastrukturne předewzaća. Zaměr je, we wšěch wjesnych dźělach samsne žiwjenske wuměnjenja njewotwisnje wot mjeztym redukowanych přesydlenjow wutworić, kaž regionalny planowanski zwjazk Hornja Łužica-Delnja Šleska zdźěla.
Přirada diskutowaše wo tuchwilnym stawje noweho stejnišća za Miłoraz. Nimo indiwiduelnych móžnosćow móža potrjecheni mjez alternatiwami w Trjebinje abo Slepom wolić. Při tym je wažne, zo so Miłoraženjo po móžnosći zhromadnje přesydla. Runje tak rěčachu wo přichodnym wuwiću sydlišća.
Wuslědk za region dramatiski
Reakcija po wólbach: Łužica njeje w Berlinje hižo skutkownje zastupjena
Budyšin (SN/BŠe). „Wólbny wuslědk Lěwicy njespokoja“, praji kandidatka strony za wólby zwjazkoweho sejma Caren Lay, kotraž budźe znowa w opoziciji zwjazkoweho sejma skutkować. „Po wšej Sakskej, wosebje na wuchodźe swobodneho stata smy wjele hłosow zhubili. Zo je direktny kandidat AfD Karsten Hilse w Budyskim wólbnym wokrjesu wjetšinu hłosow wolerjow dóstał a jeho prawicarskopopulistiska strona hladajo na druhi hłós prědku leži, je dramatiske. Přesadźiła je so strona, kotraž nima žane rozrisanja za realne socialne problemy.“ Caren Lay je sej wěsta, zo so AfD zaso wotkuzła.
Rženje dale dźe
To a tamne (26.09.17)
Oranžowe awto z morcheju zaměnił bě wóslik w hessenskim městačku Schlitz. Gießenska ciwilna komora ma nětko rozsudźić, hač dyrbi mějićel skoćeća 5 000 eurow škody na blisko pastwy parkowacym awće zapłaćić. Dwójce bě wóslik do njeho kusnył. Policija trochowaše škodu samo na 30 000 eurow. Naddimensionalnu „morchej“ zwuporjedźeć pak potom tola tak drohe njebě.
Plěsniwa pomazka je wulkozasadźenje policije w badensko-württembergskim Mutlangenje wuskutkowała. Muž bě tyzku z pomazku na swojej zahrodźe našoł. Jako ju wočini, rozpřestrěwaše so mróčel kura. Bórze na to koža muža spodźiwnje reagowaše, a wón alarmowaše policiju a wuchowansku słužbu. 54 muži z dychanskim škitom přijědźe tuž na pomoc. Fachowcy pak jenož plěsniwu pomazku jako winika wuslědźichu.
Wjac swobody při přełožkach
Rom /Fulda (B/SN). Při přełožowanju liturgiskich tekstow změja jednotliwe kraje w přichodźe wjace swobody. Tole přizjewi bamž Franciskus w swojim njedawnym spisu „Magnum principium“. Što móhło to za wobstejace teksty w Němskej rěkać, wo tym wuradźuje Němska biskopska konferenca wot dźensnišeho hač do 28. septembra na swojim nazymskim hłownym posedźenju w Fuldźe.
Nabožina pod ćišćom
Berlin (B/SN). Kubłanski wědomostnik Peter Schreiner widźi wučbu nabožiny w Němskej pod přiběracym ćišćom. Přeco zaso ma wona „wo swoje připóznaće wojować“. Tež konfesionelna orientacija hladajcy woteběra. W Sakskej, Saksko-Anhaltskej a Durinskej pak je podźěl šulerjow, kotřiž so na wučbje nabožiny wobdźěleja, porno 90tym lětam přiběrał.
Bamžowske počesćenje
Berlin (B/SN). Hans-Joachim Meyer, statny minister na wuměnku a něhdyši prezident Centralneho komiteja němskich katolikow, bu wot bamža Franciskusa pomjenowany z rjadom swjateho Gregora Wulkeho počesćeny. 5. septembra je jemu arcybiskop Heiner Koch Gregorijowy rjad přepodał.
Přehladka žněje wulki wothłós
Petry so frakciji njepřizamknje
Berlin (dpa/SN). Předsydka AfD Frauke Petry nochce frakciji swojeje strony w zwjazkowym sejmje přisłušeć. Tole zdźěli wona dźensa rano w Berlinje. K přičinam njeje so hišće wuprajiła. – Po słowach předsydki Zelenych Simony Peter ma SPD najebać špatny wólbny wuslědk dale zamołwitosć přewzać. Jeli tak mjenowana jamaiska koalicija z CDU, FDP a Zelenych njebudźe, ma SPD k dispoziciji być. „Njeje móžno, zo nětko hižo wo nowych wólbach rozmyslujemy. SPD je wužadana, tule w demokratiskej strukturje ze wšěmi tamnymi stronami rozmyslować, kak móže dale hić“, Simone Peter podšmórny.
Wothłosuja wo njewotwisnosći
Erbil (dpa/SN). Na sewjeru Iraka, hdźež bydla Kurdojo, su wo njewotwisnosći dźensa wothłosowali. Wjace hač 5,2 milionaj ludźi měješe wo tym rozsudźić, hač ma so awtonomny region wot Iraka dźělić. Liča drje z wulkim wothłosom wolerjow za njewotwisnosć, ale wothłosowanje njeje zwjazowace. Centralne knježerstwo w Bagdadźe zdźěli, zo referendum wustawje njewotpowěduje.
Wjetšina za lětanišćo Tegel
We wjacorych městach Němskeje su sta ludźi po wozjewjenju dotalnych ...
Nadźijeja so wujednawanskeho hamta
Podstupim (dpa/SN). Braniborske hospodarske ministerstwo nadźija so dale zarjadowanja wujednawanskeho hamta za hórniske škody we Łužicy. Dotal Zwjazk tajke městno wotpokazuje, w decembru pak su dalše jednanja planowane, zdźěli tele dny nawoda wotrjada za energiju a surowizny hospodarskeho ministerstwa Klaus Freytag.
Zwjazk ma so sobu zapřijeć, dokelž je přez Łužisku a srjedźoněmsku towaršnosć hórnistwoweho zarjadnistwa (LMBV) w regionje aktiwny. Předewzaće Łužiska energija a milinarnje (LEAG) je hižo signalizowało, zo je zwólniwe we wujednawanskim hamće sobu skutkować. Tež Sakska podpěruje plany, wo kotrychž w Braniborskej hižo wjacore lěta diskutuja.
Wujednawanske městno měło na přikład zakročić, zwěsća-li wobsedźerjo domow škody na twarjenjach. W tym padźe ma so přepytować, hač su škody hórnistwa dla nastali. Wujednawanski hamt měł so dale wo to starać, zo wobsedźerjow domow bjez kompleksnych sudniskich jednanjow wotrunaja.
