Wulka woda poněčim woteběra
Regensburg (dpa/SN). Połoženje wulkeje wody dla w bayerskim Regensburgu wostanje napjate. Wulka woda poněčim woteběra, wostanje pak na wysokim niwowje, zamołwići zdźěleja. Pegel Dunaja pokazowaše dźensa rano šěsć metrow, normalne su tři metry. Tež w Passauwje wulka woda Dunaja spaduje. Tam naměrichu dźensa 8,50 metrow, normalnje je šěsć metrow. Najebać to płaći tam dale najwyši schodźenk warnowanja.
Kandidat AfD z nožom zranjeny
Mannhein (dpa/SN). W Mannheimje je muž wčera wječor kandidata AfD za komunalne wólby z nožom nadběhował a zranił. Policija je skućićela zajała, powěsćernja dpa rozprawja. W běhu dnja chcychu zjawnosć wo nadrobnosćach podawka informować. Po informacijach wokrjesneho zwjazka AfD bě kandidat strony njedaloko Hłowneho torhošća muža lepił, kiž runje wólbne plakaty ze sćežorow torhaše. Na to narěčany, da so skućićel z nožom do politikarja a jeho zrani.
29lětny błyska dla zemrěł
Na francoskim pobrjohu atlantiskeho morja su wčera swjatočnosće k ...
Słowjenska Palestinu připóznawa
Ljubljana (dpa/SN). Něšto dnow po Španiskej, Irskej a Norwegskej je ze Słowjenskej dalši europski kraj Palestinu jako stat připóznał. „Luby palestinski ludo, dźensniši rozsud je poselstwo nadźije a měra. Wěrimy, zo móže jenož rozrisanje dweju statow dołhodobnje měr na Bliskim wuchodźe zaručić. Słowjenska zasadźuje so dale za wěstotu wobeju narodow, Palestinjanow a Israelčanow“, rěka w zdźělence wonkowneho ministerstwa.
Mjeztym tójšto krajow Palestinu jako stat připóznawa. Tole pak njepłaći za wulke zapadne kraje kaž USA, Wulku Britanisku a najwjetši dźěl čłonow EU. Słowjenska je 147. kraj po wšěm swěće, kiž Palestinu jako stat připóznawa. Israel so tomu raznje spjećuje a zasudźuje připóznaće jako „mytowanje terorizma“.
W słowjenskim parlamenće w Ljubljanje běchu dosć kontrowersnje wo njewšědnej diplomatiskej kročeli diskutowali. Liberalna opozicija spytaše, wothłosowanje wo 30 dnjow přestorčić. Frakcija prawicarskeje opozicije wothłosowanje bojkotowaše a žurlu wopušći.
Wulka woda tež w Čěskej
W Liberecu błysk do skupiny ludźi zadyrił – železniski wobchad haćeny
Praha. Opoziciska strona Ano bywšeho ministerskeho prezidenta Andreja Babiša, ma najlěpše wuhlady, wólby do Europskeho parlamenta dobyć. Koalicija SPOLU ze stron KDU ČSL, ODS a Top 09 by sej druhe městno zawěsćiła, wuchadźa z wólbneho naprašowanja woprašowarnje Stem/Mark. Naprašowanja dalšich agenturow su wunjesli podobny wuslědk, po nich stej Ano mjez 26 a 27 procentow hłosow a SPOLU 20 do 22 procentow hłosow docpěłoj. Piraća bychu ze swojej politiku 10 do 12 procentow wobydlerjow přeswědčili a prawicarska strona „Swoboda a direktna demokratija (SPD) ma wosom do 11 procentow podpěraćelow.
„Serbski wokrjes“?
Plajta FTI wiki wulce njezměni
70. róčnicu železnicy woswjećili
Policistka prěje wumjetowanja
Lipsk (dpa/SN). W procesu ilegalneho předawanja sćazanych składowanych kolesow pola Lipšćanskeje policije je wobskoržena policistka wumjetowanja wotpokazała. Wona njeje so wosobinsce wobohaćiła a njeje žane pjenjezy za sebje wobchowała, rjekny prawiznik 47lětneje w jeje nadawku wčera na sudnistwje. Tam dyrbi so wot słužby wuswobodźena hłowna policajska komisarka jako tehdyša zamołwita komory azerwatow padustwa, wobtykanja a falšowanja wopismow dla zamołwić.
Statne rěčnistwo jeje wumjetuje, zo je wot awgusta 2014 hač do nowembra 2028 znajmjeńša 265 zdźěla dosć drohotnych kolesow dale dawała, přewažnje policistam. Na tute wašnje je 4 795 eurow wuzbytkowała a sej znajmjeńša 3 000 eurow zdźeržała. Zwjetša kradnjene kolesa bě policija sćazała.
Žona twjerdźeše, zo je pjenjezy towarstwu přepodała, kiž jeje nan jako předsyda nawjedowaše. „Njejsym ničo zatajiła a swojeho šefa stajnje wo tym informowała“, 49lětna rjekny. Tomu so tehdyši wotrjadnik spjećowaše: „Njejsym ničo wo tym wědźał a bych jej to tež zakazał.“
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje a marketing:
Patricia Róblowa 577 273
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (05.06.24)
Dobrej dwaj dnjej na wjeršku štoma wutrała je žona njedaloko Neu-Ulma w Schwabskej, zo by so před wulkej wodu wuchowała. Pomocnicy namakachu 32lětnu njezranjenju – ale wosłabjenu a wusušenu – a dowjezechu ju do chorownje. Žona bě w nocy na njedźelu w lěsu po puću, jako woda spěšnje stupaše. Wona so z mobilnym telefonom pola policije přizjewi. Potom zalěze na wjeršk štoma. Na to bě aku telefona prózdny.
Spektakularny pad zawlečenja zaběra tuchwilu Lipšćanske sudnistwo. Syriska swójba bě pozdatneho kuzłarja z Lipska do Magdeburga zawlekła. Tón bě swójbu do toho wo 15 000 eurow wobšudźił, jako twjerdźeše, zo móže pjenjezy rozmnožić. Kuzłar pak so z pjenjezami zminy. Na to jeho swójbni pytachu, w Lipsku wuslědźichu a sobu wzachu. Policija muža pozdźišo wuswobodźi.
