EU chce Ukrainu dale podpěrować
Brüssel (dpa/SN). Europska unija je z Ukrainu hladajo na wójnu Ruskeje dojednanje nastupajo wěstotnu kooperaciju a dołhodobnu podpěru wotzamknyła. Dokument su ukrainski prezident Wolodymyr Zelenskyj, prezidentka komisije EU Ursula von der Leyen a społnomócnjeny EU za wonkowne naležnosće Charles Michel wčera na wjerškowym zetkanju EU w Brüsselu podpisali.
Zwjazkowy kancler Olaf Scholz (SPD) mjenowaše zrěčenje z Ukrainu „znamjo solidarity w ćežkich časach“. Zelenskyj so dźakowaše, prošeše pak zdobom wo dalšu pomoc krajow EU za spěšne dodawanje bróni a municije.
W dojednanju rěka: „Europska unija je rozsudźena, Ukrainje a jeje wobydlerjam dale tak dołho a intensiwnje kaž je trjeba, politisce, financnje, hospodarsce, humanitarnje, wojersce a diplomatisce pomhać.“ Brüssel chce Ukrainje přilubjenu pomoc 50 miliardow eurow tak spěšnje kaž móžno přewostajić.
To a tamne (28.06.24)
Wósliki Aloisa Rappa z Ochsenhausena su chětro małke a mjez wopytowarjemi dwora wulkosće dla chětro woblubowane. Na cyłkownje 3 000 kwadratnych metrow wulkej pastwje je dosć a nadosć městna za 15 wóslikow, kiž docpěja wulkosć maksimalnje 86 centimetrow. Jelizo su skoćata wosebje małke mjenuja je fachowcy mikro-wósliki. Swójsku heju pak maja tež najmjeńše eksemplary a sej majkanje samo wunuzuja.
Fanojo britiskeho koparskeho narodneho mustwa maja so kónc tydźenja zaso do Gelsenkirchena nawróćić. To je za nje hubjeny wusud, wšako njejsu wo měsće zahorjeni, tak znajmjeńša twjerdźi to žurnalist a fan Paul Brown, kiž rěčeše wo „mazanej dźěrje“. Wyša měšćanostka Karin Welge Gelsnekrichena prosy fanow nětko wo spokojnosć a ma wuprajenja Browna za ataku.
Serbske dźěći do Róžanta putnikowali
„Pace e bene – skromnje žiwy być z Klaru a Francom“ je hesło lětušich nabožnych dnjow. Dźěći a młodostni ze serbskich wosadow putnikowachu wčera do Róžeńčanskeje hnadowneje cyrkwje.
Róžant (mj/SN). „Dźěćom, na wjesołe wašnje a w zhromadnosći wěru dale dać, je mi wulke wjeselo“, praji Anastasia Rawerec přewodnica Ralbičanskich dźěći. Wjeršk tutoho tydźenja je kóždolětne putnikowanje do Róžanta, do hnadowneje cyrkwje. Najdlěši procesion, 157 dźěći, bě sej wčera z Chrósćic do swjatnicy katolskich Serbow doběžał, najkrótši, 22 dźěći, z Baćonja. Tak běchu krótko po dźesaćich dołhe rynki dźěći a młodostnych wot sydom do 15 lět z daloka widźeć. Budyscy dźěći su jako prěnje Róžant docpěli, jako posledni přińdźechu Pančanscy. Cyrkej běše hač na poslednje městno wobsadźena. Na Božej mši knježeše wjesoła atmosfera. Spěwy je kapała z Chróšćanskeje wosady přewodźała.
Rozdźěluja zastojnstwa EU
Brüssel (dpa/SN). Wo znowawobsadźenju wodźacych zastojnstwow Europskeje unije po europskich wólbach chcedźa dźensa a jutře na wjeršku EU w Brüsselu rozsudźić. Chětro wěste je, zo nominuja politikarku CDU Ursulu von der Leyen za druhu dobu zastojnstwa za prezidentku komisije EU. Na zetkanju chcedźa tež zrěčenje wo zhromadnym dźěle z Ukrainu na wěstotnym polu wotzamknyć. Za to wočakuja ukrainskeho prezidenta Wolodymyra Zelenskeho w Brüsselu.
Nowy zakoń staćanstwa płaći
Berlin (dpa/SN). Nowy zakoń nastupajo spožčenje staćanstwa ze skrótšenymi časami čakanja je wot dźensa płaćiwy. FDP hladajo na změnjene prawniske połoženje na to skedźbnja, zo njejsu zadźěwki za spožčenje staćanstwa najebać krótše časy čakanja znižene. Wot amploweje koalicije SPD, Zelenych a FDP formulowany zakoń předwidźi, zo maja wukrajnicy hižo po pjeć – město dotal wosom – lětach prawo na němske staćanstwo, su-li wšitke wuměnjenja za to spjelnili.
Wojerski puč zwrěšćił
Tajke błyski su wčera wječor na juhu a juhozapadźe Němskeje ...
Sejm debatuje wo nahubnikach
Berlin (dpa/SN). Hrožace rizika wjacorych miliardow eurow statnje kupowanych nahubnikow přećiwo koronawirusej dla su dźensa tema w zwjazkowym sejmje. We wobłuku aktualneje hodźiny chcychu zapósłancy wo postupowanju tehdyšeho knježerstwa na spočatku pandemije wuradźować. Tehdy bě mało nahubnikow, kotrež pak nuznje trjebachu. Z tehdyšeho časa leži hišće něhdźe sto skóržbow na sudnistwach z cyłkownymi žadanjemi 2,3 miliardy eurow.
Zo by spěšnišo nahubniki za strowotnistwo dóstało, bě ministerstwo tehdyšeho ministra za strowotnistwo Jensa Spahna (CDU) nahubniki bjez wulkich jednanjow ke krutym płaćiznam skazało. Častodosć su so w Berlinje po tym spjećowali, zličbowanki zapłaćić, pokazujo tež na problemy kwality. Dodawarjo na to ministerstwo wobskoržichu.
Israel nadběhuje objekt w Syriskej
Žadaja sej pjenjezy EU za mjezu
Brüssel (dpa/SN). Hladajo na wohroženje přez Rusku a Běłorusku žadaja sej Pólska, Letiska a Litawska podpěru EU za wojerske a ciwilne zawěsćenje mjezy. „Trjebamy zakitowansku iniciatiwu, zo móhli Europjanow nětko a přichodne lěta škitać“, pisaja statni a knježerstwowi šefojo krajow do wjerška EU prezidentce komisije EU Ursule von der Leyen a prezidentej Rady EU Charlesej Michelej. Wjeršk wotměwa so dźensa a jutře w Brüsselu.
Jako konkretny projekt mjenuja politikarjo „natwar zakitowanskeho infrastrukturneho systema podłu wonkowneje mjezy EU k Ruskej a Běłoruskej“. Tole móhło nuznej trěbnosći wotpowědować, EU před wojerskimi a hybridnymi wohroženjemi škitać. Hybridne wohroženje je krajam předewšěm zaměrna a wot Ruskeje a Běłoruskeje instrumentalizowana migracija ćěkancow z chudych krajow do Pólskeje ze zaměrom, EU wosłabić.
Rozměr kóštow za planowany system zakitowanja žada sej z wida awtorow pjenježnu podpěru EU. Planowanje a twar projekta chcedźa z NATO wothłosować.
Njewjedra w Němskej zachadźeli
Tež w Sakskej wočakuja cyły dźeń zliwki, hrimanja a zapławjenja
Offenbach (dpa/SN). Po sylnych zliwkach na juhu a juhozapadźe Němskeje so njepřijomne wjedro dale po Němskej rozpřestrěwa. Dźensa wočakowachu we wjacorych dźělach kraja hrimanja a sylne njewjedra. Hižo wčera běchu jednotliwe kónčiny Badensko-Würtembergskeje a Bayerskeje wot sylnych zliwkow a wichorow potrjechene.
W nutřkownym měsće Stuttgarta dyrbjachu wčera fanowe pasmo za europske koparske mišterstwa njewjedra dla krótkodobnje zawrěć. Bórze na to pak policija warnowanje zaso zběhny, dźakujo so přiwisnikam kopańcy za sćerpnosć a zrozumjenje za naprawy.
To a tamne (27.06.24)
W ródnym domje Ericha Honeckera, bywšeho předsydy statneje rady NDR, w posaarskim Neunkirchenje, je woheń wudyrił. Kaž wohnjowa wobora zdźěla, bě minjenu nóc woheń třěchu domskeho zapalił. Płomjenja rozpřestrěchu so na susodnej twarjeni. 40 wobydlerjow dyrbjachu w nuzowych kwartěrach zaměstnić. Cyłkowna škoda wučinja 750 000 eurow. Přičina wohenja njeje hišće znata. Honecker bě so 1912 w domje narodźił.
Bolosće w chribjeće mějachu hižo stari Egyptowčenjo. Tole je Petra Brukner Havelková ze swojimi sobudźěłaćerjemi w čěskim Narodnym muzeju w Praze wuslědźiła. Přepytowali su kosće 69 dorosćenych, kotrychž běchu 2 000 lět do Chrystusa w Egyptowskej pochowali. 30 z nich běchu pismawučeni. Wočiwidnje sedźachu woni tehdy při swojim dźěle na zemi z křižowanymaj nohomaj.
