Najebać přiměrjenje su renty wjele­lětnych zawěsćenych na wuchodźe dale jasnje niše hač na zapadźe. Zwjazkarstwo Sahry Wagenknecht žada sej mjez druhim wobmjezowanje dawkow na rentu.

Berlin/Drježdźany (dpa/SN). Za šefowku BSW Sahru Wagenknecht su jenak wulke renty na wuchodźe a zapadźe hišće přewšo zdalene. „1 385 eurow renty w Sakskej po 40 lětach dźěła nima z wukonosprawnym systemom renty ničo činić. Zo rentnarjo w Sakskej přeco hišće 169 eurow mjenje pjenjez dóstawaja hač w zapadźe, pokazuje, zo smy wot jednoty renty daloko zdaleni“, rjekny wona powěsćerni dpa. Mnozy ludźo w Sakskej maja hišće jasnje mjenje w móšni.

„Zakonska renta lědma hišće žiwjenski standard zawěsća, ale woznamjenja za dźeń a wjace wobydlerjow socialny zestup w starobje. A potom přińdźe dawk na rentu hišće k tomu. Štóž změje rentu z mjenje hač 2 000 eurow měsačnje, toho měł fiskus na pokoj wostajić“, žada sej politikarka. Jeje zwjazkarstwo žada sej wyše renty po přikładźe Awstriskeje a wobmjezowanje dawka na rentu.

Düsseldorf/Berlin (dpa/SN). Wobchadni ministrojo zwjazkowych krajow wuradźuja dźensa na wosebitej konferency w Düsseldorfje wo přichodźe cyłoněmskeje ­jězdźenki za 49 eurow. Zwjazk njeje hač dotal přizwolene pjenjezy krajam přewostajił, čehoždla so wobchadni ministrojo boja, zo so tiket podróši . Prawdźepodobnje je zwyšenje hišće lětsa wot 1. oktobra trěbne.

Z cyłoněmskej jězdźenku, kotraž wob měsac 49 eurow płaći, móža sobujěducy bliskowobchadne srědki po cyłym Zwjazku wužiwać. Zwjazk a kraje pak dyrbja tiket financielnje podpěrać, štož płaći wob lěto 1,5 miliardow eurow. Wobchadne předewzaća niskich płaćiznow jězdźenkow dla wotpowědnje mjenje pjenjez ­zasłuža a tuž je tajka podpěra nuznje ­trěbna.

Poprawom su kraje a Zwjazk płaćiznu lětsa garantowali. „Hižo poł lěta čakamy na to, zo zwjazkowy kancler Olaf Scholz (SPD), swoje přilubjenja dodźerži“, zdźěli bayerski wobchadny minister, Christian Bernreiter (CSU).

Njewočakowany wuslědk wólbow parlamenta – premier Attal wotstupił

Paris (dpa/SN). Dźeń po njewočakowanym wólbnym wuslědku při wólbach parlamenta dyrbi so Francoska znowa orientować. Politiske nachilenje do prawicarskeho směra je słabše hač myslene. W nowej narodnej zhromadźiznje budźe prawdźepodobnje lěwicarski zwjazk najsylniša móc. Ministerski prezident Gabriel Attal je prěnje konsekwency sćahnył a swój wotstup připowědźił. Nowe jednanja kmane knježerstwo njeje při wšěm wotwidźeć. K tomu so přidruži, zo nimaja lěwicarjo zhromadne nawodnistwo a žadyn program. Runje tak njewěste je, kajke wuskutki změje wólbny wuslědk za přichod Europy a za poměr mjez Francoskej a Němskej.

Zwjazk lěwicarjow Nouveau Front Populaire, wobstejacy z komunistow, socialistow a Zelenych, je sej njewočakowano najwjetši dźěl wšěch 577 mandatow narodneje zhromadźizny zdobył.

Wjerški kaž Europeada 2024 žadaja sej stajnje zaso wuhódnoćenje, w sportowym kaž tež powšitkownym zmysle: Zaso raz su so mustwa přesadźili, kotrež mějachu w swojich rjadach hrajerjow z wyšich ligow. Po tutym puću su lětsa samo faworizowanych Južnych Tirolčanow z prěnjeho městna wutłóčili. Hrozy strach, zo tute sportowe „napřemobrónjenje“ zakładnu mysličku Europeady zniči, mjezsobne styki mjeńšin ze sportowym wubědźowanjom pěstować? Serbscy fanojo su dopokazali, zo móžeš mysličce Europeady ze zhromadnosću a strowym serbskim duchom najlěpje wotpowědować. Je derje, zo woni zahoritosć za serbsku wubranku, ­kotruž smy 2012 we Łužicy zrodźili, přez lěta dale njesu. Zajimawe bě widźeć, kak wšelako su so Serbja na puć podali. Někotři su sej samo bydlenski mobil wupožčili. Tuta zahoritosć a njesebična wosobinska iniciatiwa je to, štož je so mi najbóle w pomjatku zašćěpiło, najebać wšě sportowe debaty. Marko Wjeńka