Washington (dpa/SN). Po swojim cofnjenju z aktualneho wólbneho boja chce so prezident USA Joe Biden cyle na swoje zastojnstwo w Běłym domje koncentrować. „W přichodnych měsacach chcu swoje nadawki jako prezident spjelnić“, rjekny demokrat w swojej wječornej narěči wobydlerstwu kraja. Tajke narěče z běrowa prezidenta su jenož we wuwzaćnych padach z wašnjom. Rozsud Bidena, za zastojnstwo prezidenta hižo dlěje njekandidować, je wusahowaca cezura dobre tři měsacy do wólbow, 5. nowembra.

81lětny bě so swojeje staroby a strowotniskeho stawa dla ćišćej swójskeje strony podwolił a so z wólbneho boja wróćo sćahnył. W narěči rjekny, zo chcył stronu demokratow po tutym puću „zjednoćić“. Iniciatiwu měli nětko młodźi ludźo přewzać, wón rjekny.

Přichodne měsacy chcył dale na tym dźěłać, płaćizny znižić, hospodarstwo wožiwić a wosobinske prawa wobydlerjow zakitować. Dale chce Biden Nato skrućić a ruskemu prezidentej Putinej znjemóžnić, sej Ukrainu přiswojić.

Ukrainski wonkowny minister Kuleba w Chinje – Ruska zdźeržliwa

Kijew/Peking (dpa/SN). Ukrainski prezident Wolodymyr Zelenskyj je w zwisku z jězbu wonkowneho ministra Dmytra Kuleby k zwjazkarjej Ruskeje, Chinje, zwuraznił, zo zhladuje optimistisce na móžne diplomatiske rozrisanje. „Mamy jasny signal, zo China teritorialnu integritu a suwerenitu Ukrainy podpěruje“, Zelenskyj w Kijewje rjekny.

Ukrainski wonkowny minister je tuchwilu w Pekingu, zo by pozicije swojeho kraja a Chiny za diplomatiske rozrisanje we wójnje Ruskeje přećiwo Ukrainje zbližił. Kuleba je w tym zwisku tež zajim Kijewa na direktnych rozmołwach z Ruskej wobkrućił. Dotal su w Moskwje na tajke poskitki zdźeržliwje reagowali.

China je najwažniši zwjazkar Ruskeje. Pekingej připisuja wulki wliw na Moskwu. Zelenskyj chwaleše, zo China dotal swoje přilubjenje dodźerži a Ruskej žane brónje njesćele. Za dalše dopóznaća čaka na nawrót Kuleby.

Šěsćlětneho syna prosće zabył je muž na awtodróhowym parkowanišću na A 13 pola Radeburga. Policija dyrbješe žałosćace dźěćo z małym barikom tróštować, doniž so nan njenawróći. Tón bě po krótkej přestawce dale jěł a njebě ani pytnył, zo je hólc mjeztym z awta wulězł. Skónčnje móžeštaj nan a syn zhromadnje z jězbu do Berlina pokročować.

Prěni spionažny skandal maja na olympiskich hrach w Parisu, prjedy hač su so hry započinali. Žónske koparske mustwo Neuseelandskeje bě při treningu wospjet trut wuhladało, kotryž žony wobkedźbowaše. Lětacy objekt słušeše kanadskim koparkam, prěnim přećiwnikam neuseelandskich žonow dźensa wječor. Kanada je asistencnu trenarku Jasmine Mander mjeztym domoj pósłała. Trenarka mustwa Bev Priestamnn njebudźe dźensa na kromje hrajnišća stać.

Berlin (dpa/SN). 5 000 nowych dźěłowych městnow w zarjadach a slědźenišćach je zwjazkowe knježerstwo we wuhlowych rewěrach připowědźiło. 2 094 z nich je dotal wobsadźenych. To wuchadźa z wotmołwy zwjazkoweho hospodarskeho ministerstwa na naprašowanje Lěwicy w parlamenće. Konkretne planowanja wobsteja tuchwilu za 3 531 městnow. Lěwica ma to za wostrózbjacu bilancu.

Hižo w inwesticiskim zakonju za wuhlowe regiony předchadźaceho knježerstwa je zawjazk zapisany, hač do kónca 2028 znajmjeńša 5 000 nowych, přidatnych dźěłowych městnow w zarjadach abo druhich zarjadnišćach Zwjazka wu­tworić. Přikład je wotnožka Zwjazkoweho zarjada za hospodarstwo a kontrolu wuwožowanjow w Běłej Wodźe.

„W tutym tempje to ničo njebudźe ,z wustupom z brunicy w najidealnišim padźe hač do 2030‘, kaž ampla to hišće propaguje“, měni parlamentariski jednaćel Lěwicy w zwjazkowym sejmje, Christian Görke. Wón wočakuje, zo stanje so „strukturna politika w rewěrach woprawdźe z šefowej naležnosću zwjazkoweho knježerstwa“.