Chicago (dpa/SN). US-demokraća hoł­dowachu na swojim stronskim zjězdźe wotsadźenemu předsydźe Joej Bidenej. Aplaws přewodźeše narěč 81lětneho, kotryž wuži swój wustup wosebje k tomu lěpšiny swojeho nimale zakónčeneho prezidentstwa wuchwalować a čłonow na nowu kandidatku wo zastojnstwo prezidentki Kamalu Harris přihotować. „Amerika, sym swoje najlěpše za tebje dał“, praji prezident USA a citowaše z tym z teksta spěwa. Dale wuzběhowaše: „Bě mi česć žiwjenja wam jako prezident słužić. Lubuju tutón nadawk, ale hišće bóle lubuju swój kraj.“ Na Bidena čakaja nětko poslednje pjeć měsacy jeho prezidentskeje periody, prjed hač woteda spočatk januara zastojnstwo na noweho prezidenta a swoju dołhu karjeru zakónči.

Lipsk (dpa/SN). Při wólbach do krajneho sejma 1. septembra měri so Bündnis ­Sahry Wagenknecht w Sakskej a Durinskej na wuslědki nad dźesać procentami. To je aktualny wuslědk wólbneho naprašowanja instituta Forsa, w nadawku nowiny Stern a sćelaka RTL. W Sakskej móhła strona tak 13 procentow a w Durinskej 18 procentow zdobyć. CDU by w Sakskej po naprašowanju z 33 procentami najsylniša strona bywa, na nju slěduje AfD z 30 procentami a BSW. SPD a Zelenym by so ze šěsć procentami poradźiło, dale w krajnym sejmje sobu skutkować, Lěwicy z třomi procentami nic. FDP by samo mjenje hač tři procenty měła. We wobeju krajomaj staj amtěrowacaj ministerskaj prezidentaj wo wjele woblubowanišej hač jeju stronje. Při direktnych wólbach by Michael Kretschmer (CDU) 50 procentow hłosow dóscpěł. Za Jörga Urbana (AfD) by so jenož 14 procentow a za Sabinu Zimmermann (BSW) jeničce dwaj procentaj rozsudźili. Tež w Durinskej by so 42 procentow za Boda Rammelowa (Lěwica) rozsudźiło.

Producent chipow TSMC zasydli so z wulkej twornju w Sakskej

Drježdźany (dpa/SN). Hišće wot noweho projekta přichoda w Sakskej wjele widźeć njeje, ale w přichodnych měsacach so tójšto předewza w Silicon Saxony – tak pomjenuje swobodny stat swoju branšu mikroelektroniki a połwodźakow wokoło Drježdźan. 2027 chce taiwanske předewzaće TSMC zhromadnje z třomi ­partnerami na sewjeru Drježdźan chipy wosebje za awtomobilowu industriju produkować. Po cyłym swěće najwjetši producent siliciumoweje mikroelektroniki přińdźe z tym do Europy. Dźensa mějachu za to symboliski prěni zaryw, na kotrymž wobdźělichu so nimo zwjazkoweho kanclera Olafa Scholza (SPD) a prezidentki komisije EU Ursule von der Leyen tež Budyski krajny rada Udo ­Wićaz (CDU).

Köln (dpa/SN). Ličby branše online-hrow pokazuja na spomaleny rozrost. 2021 powjetši so ličba games-předewzaćow wo 20 procentow na 749, 2023 wu­činješe plus hišće 15 procentow (na 908). Wo­srjedź lěta 2024 bě jich 948 a tak štyri procenty wjace hač hišće lěto do toho. Přistajenych je pola wuwiwanskich studijow a wudawaćelow tuchwilu 12 048 ludźi, štož je tři procenty wjace hač hišće loni. Samsny čas loni wučini rata rozrosta hišće sydom procentow. Wosebje mjeńše studija poněčim zawru. Wjetše zawody su tohorunja potrjechene, ale dawno nic tak jara kaž njewotwisne mjeńše firmy. Cyłkownje pak branša ­online-hrow dale rozrosće: Techniske móžnosće bywaja dale a lěpše a naprašowanje stupa. Ale wunoški lětsa ­prěni raz spaduja. Za čas korony pak su čim razantnišo stupali. Na mjezynarodnych ­wikach maja němske předewzaća jenož mały podźěl. Online-hry, kotrež so w Němskej programěruja, docpěwaja ­ně­hdźe pjeć procentow globalnych wu­noškow. Wot tutych pjeć procentow profituja mjezynarodne firmy ze sydłom w Němskej najbóle.